NASEPTE 5
5
Ananias Leh Sapphira
1Himahleh mi khat amin Ananias in azi Sapphira toh athil neih uh azuak hi. 2Huan azi theih in ama'n akhen a-iim a, akhen hon tawi in sawltakte khebul ah ahong koih hi. 3Himahleh Peter in, “Kha Siangthou khem ding leh gam man akhen iim ding in bangziak a Setan in na lungtang hihkhauh ahia? 4A-om lai teng leng nang a ahi gige kei a hia? Na zuak nung in leng na thuthu in a-om kei a hia? Bang achia hiai thute na lungtang a ngaihtuah? Mihing khem na hi kei a, Pathian khem na hi zaw,” achi hi. 5Ananias in huai thu azaktak in apuk a, asita hi; aza kha peuh in alau mahmah uhi. 6Tangvalte athou ua, tuam in azawngkhia ua, avuita uhi. 7Dakkal thum ding hiam nung in, thil omdan thei lou in azi ahong lut hi. 8Peter in akiang ah, “Hon hilh in, hiai zah phet in maw gam na zuak uh?” achi hi. Ama'n, “Hi, hiai zah phet in ahi,” achi hi.
9Huan Peter in akiang ah, “Bang achia Toupa Kha ze-et ding a kithutuak na hi ua? Ngai in, kongkhak bul ah na pasal vuite khepek ahong omta, nang leng ahon zawngkhe ding uh,” achi hi. 10Huchi in thakhat in akhebul ah apuk pah a, asi hi; tangvalte ahong lut ua, amah si in ahong mu ua, azawngkhia ua, apasal kiang ah avuita uhi. 11Huan saptuamte leh huai thu za peuhmahte'n alau mahmah uhi.
Chiamtehna Leh Thillamdangte
12Huan mi lak ah Pathian in sawltakte khut in chiamtehna leh thillamdang tampi ahih zel hi. Huan amaute avek un lungsim mun khat in Solomon inlim ah akikhawm zel uhi. 13Midang bel kuamah alak uah apang ngamta kei uhi; himahleh mi'n amaute angaisang uhi. 14Huan Toupa lam ah numei leh pasal gingthak tampi behlap semsem in a-om uhi. 15Huchi in mi damloute kongzing ah alumsak ua, Peter pai kawm a alim bek in alak ua khat bek aliahtheihna ding in, achi uhi. 16Jerusalem kho kim a kipan mipite leng huai damloute dawi nin hihgimte hon pi in ahong paikhawm ua; huaite leng ahong dam chiat uhi.
Vaihawm Upate Ma Ah Peter Leh Johan Adingh Nawn Uh
17Huan siampu lianpen akisa a, akiang a omte tengteng toh, alawmte tuh Saddukai pawl ahi ua; amau hazatna in adim uhi. 18Sawltakte aman ua, vantang khumna ah akhumta uhi. 19Zankim in Toupa angel khat in kongkhakte hong in, apikhia hi. 20“Tempul ah pai unla, va dingh in mite kiang ah hiai hinna thu va gen un,” achi hi. 21Huan huai thu azak un, khua hong vak phet in tempul ah ava lut ua, thu ava gen uhi. Himahleh, siampu Lian leh alawmte ahong ua, vaihawmte leh Israel suante upate tengteng asamkhawm ua, sawltakte va pi ding in suangkul ah mi asawl uhi. 22Suangkul ah heutute va hoh mah le uh, amau ava mu kei ua; huchi in akik nawn uhi. 23“Suangkul bittak a kikhak in, avengte leng kongkhak bul a dingh amu uhi, himahleh ka hong ua, asung ah kuamah ka mu kei uh,” chi in agen uhi. 24Huan tempul upa leh siampu liante'n huai thute azak un, hiai bangchi phet in athang diam aw? chi in athu ah amangbang petpet uhi. 25Huan mi khat ahong pai a akiang uah, “Ngai un, suangkul a na mikhumte un tempul a dingh in thu agen uh,” chi in ahong gen hi. 26Huchi in sepaih heutupa toh heutu liante ava kuan ua, vantang akihtak ziak un hiamgamna om lou in sawltakte ahon pi ua, huchi hi keileh suang a den ahi kha ding uhi.
27Huan apitung un, vaihawmte ma ah adingsak uhi. Siampu lianpen in akiang uah, 28“Huai min in thu hilh louh ding ka hon chita ua; thei un na thuhilh un Jerusalem ahihdim vekta hi, hiai mipa sisan hon khuksak tum na hi ve ua,” chi in asal hi.
29Himahleh Peter leh sawltakte'n, “Mihing thu sang in Pathian thu i man zawk ding ahi,” achi uhi. 30“Nou sing ah Jesu khaikang in na that ua, i pipute Pathian in akaithou nawnta hi. 31Amah mah Pathian in Kumpipa leh Hondampa a om ding in ataklam ah ahihlianta hi. Israelte khelhna a pan kiheisak ding leh ngaidam ding in. 32Huai thute kou atheihpihte ka hi ua; Kha Siangthou, Pathian in athu zui peuhte kiang a apiak tak, atheipa ahi nawn lai,” chi in adawng uhi.
33Amau huai thu azak un asin uh athak mahmah a, hihlup atumta uhi. 34Himahleh vaihawmte lak ah, amin Gamaliel, Pharisai, dan sinsakmi, mi tengteng lak a minthangpi khat adingtou a, huai mite inn polam a omsak takdih ding thu apia hi. 35Huan vaihawmte kiang ah, “Nou Israel mite aw, hiai mite tung a na thilhih tup uah pilvang un. 36Tuma lam in Theuda kichi, mi khat ahong om a, huai mipa kiang ah mi tampi, zali phial, a-awn uhi, amah tuh hihlup in a-omta a; athu zui peuhmah avek un adalhzakta ua bangmah ahita kei uhi. 37Huai mi om nung in kisimpi lai in, Galili gam ah mi khat Judas kichi ahong om nawn hi; alam ah mi khenkhat ahip nawn hi; himahleh amah leng asita a, athu zui peuhmah avek un adalhzakta uhi. 38Huaiziak in tu in ka hon hilh ahi, hiai mite khoih kei unla, amau om-om in omsak un; hiai athiltup uh leh athilhih uh mihing a kipan ahihleh amang ding hi. 39Himahleh Pathian a kipan ahihleh amau na hihmang thei kei ding uh; huchi lou in zaw Pathian dou na hi zaw kha ding uh,” achi hi.
40Huan agen lem asata ua; huchi in sawltakte asam ua, avua ua; avuak khit un, Jesu min a thu gen lou ding chi bikbek in akhahta uhi. 41Huchi in vaihawmte lak a kipan apawtkhia ua, Khrist min ziak a daina thuak tak a seh ahih ziak un akipak mahmah uhi. 42Huan niteng in tempul leh amaute inn ah, Jesu Khrist ahi, chi in thuhilh leh sinsak atawp kei uhi.
Currently Selected:
NASEPTE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
