NASEPTE 28
28
Malta Ah Paul Gul In Atu
1Huan gam a ka suahtak un, tuikulh min tuh Malta ahi chih ka theita uhi. 2Tuikulh gam mite'n asiam theihtawp uh suah in hon na hehpih ua; vuah ahong zuk ziak leh khovot ziak in mei atoh ua, ka vek un hon na kipahpih uhi. 3Paul in singlom khat atom a mei ah achih a, asat ziak in gul ahong vakkhia a, akhut a tu in atangden hi. 4Tuikulh gam mite'n ganhing akhut a kikhaiden amuh un, “Hiai mi tualthat ahi ding, tuipi a kipan taikhe mahleh diktatna in ahin phalta lou ahi,” achi uhi. 5Himahleh ama'n mei ah gul asingkhia a, bangmah achi kei hi. 6Amau bel abawk hiam, thakhat a puk pah a si ding in agingta uh; hun sawtpi angak nilouh ua, bangmah achi kei chih atheih un alungsim uh akheng ua, Pathian ahi achi zaw uhi.
Publias Hihdamna
7Huai mun kiang ah huai tuikulh a hausapa, amin Publias a-om a, huai mi in ahon na kipahpih a, ni thum siamtak in ahon tungsak hi. 8Publias pa khosik leh santen vei in ana lum a; akiang ah Paul alut a, athum a, atung ah akhut koih in ahihdamta hi. 9Huai ahihdam khit in tuikulh a midang natna nei peuhmah ahong ua; adam chiatta uhi. 10Huai mite'n nakpitak in ahon na pahtawi ua; ka pai ding un long ah ka vante uh ahong koih uhi.
Rome Zuan A Zin Zelna
11Huan kha thum nung in, Aleksandria kho long, phalbi a tuikulh a omsa, unau phik, Kastor leh Pollux lutang kisuanna long ah ka pai uhi. 12Sairakus khua ka tawn ua huai ah ni thum ka taam uhi. 13Huai a kipan ka paikawi ua, Rejiam khua ka tung ua; ni khat nung in sim huih ahong nung a, azing nawn in Puteoli khua ka tung nawn uhi. 14Huai ah unaute ka mu ua, akiang uah ni sagih taam ding in ahon khou ua; huchibang in Rome kholam ah ka pai zelta uhi. 15Huan unaute'n ka Tanchin uh azaktak un huai a kipan in Appii dawr leh Khualbuk thumte omna chiang ah hong dawn ding in ahong kuan ua; Paul in huai mite amuh in Pathian kiang ah kipahthu agen a, alungmuang mahmahta hi.
Rome Khopi Ah Paul
16Rome a ka lut un Paul bel avengpa sepaih kiang a amah kia a om aphal uhi. 17Ni thum nung in, Paul in Juda heutute asamkhawm a; akihoukhawm ua, akiang uah, “Unaute leh mite aw, i pipute dan tung ah bangmah ka hihkhelh louh in leng Jerusalem a kipan in Rome a mite kiang ah ahon hentasak uhi. 18Amau ahon etchet khit un, sihna khop hial ka tung ah bangmah amuh louh ziak un khah ahon tum uhi. 19Himahleh Judate'n huai asel ziak un Kaisar kiang tun lou thei ka hita kei a; himahleh ka chipihte hekna nei a hih bel ka hi kei hi. 20Huai lam thu a noumau hon mu a hon houpih ding in ka hon sam ahi; Israelte lamet thilte toh kisai a khainiang bun ka hi ngal a,” achi hi. 21Amau akiang ah, “Na tanchin Judia gam a kipan lai in ka mu kei ua, unau hiai a hong omte kuamah in na tungtang thubuai bangmah apulak kei ua, gen leng agen ngei kei uhi. 22Himahleh hiai pawl zaw gam teng ah gensiat ahi ngal ua, nang bangchi in ahia na ngaih chih theih ka utzaw uhi,” achi uhi.
23Huan ni achiam ua, huai atunna ah akiang ah mi tampi ahong ua; zing a kipan nitaklam pha in akiang uah huai thu ahilhchian a, Pathian lalgam thu atheisak a, Mosi Dan laibu thu leh zawlneite laibu thu in Jesu lam ah amaute athuzoh zel hi. 24Khenkhat in athugen agingta ua, akhen in agingta kei uh. 25Huan akituakta kei ua, Paul in thu agen khit in apaikheta uhi. Athugen tuh hiai ahi: Kha Siangthou in zawlnei Isai kam a na pipute uh kiang a athugen adik mahmah ahi chi in:
26“Hiai chite kiang ah va gen in,
bil in zaw na za na ding ua,
angaihna ahihleh na thei kei hial ding uh; muh zaw na mu ding ua,
theih ahihleh na thei kei hial ding uh.
27Hiai chite lungtang atakta a,
abilte uh ana ngong deuh a,
amit uh leng asi ua,
huchi lou in zaw amit un amu ding ua, abil un aza ding ua,
alungtang un leng athei ding uh, akiheikik ding ua,
ke'n ka hihdam kha ding hi,” achi, achih pen ahi.
28“Huaiziak in Pathian hotdamna thu Zentelte kiang a khakkhiak ahi chih thei un, amau bel ngaih leng angaikhe ding uh,” achi hi. 29Huchi a hiai thute agen khit nung in, Judate apawtkheta ua, alak uah nakpitak in kiselna apiang hi.
30Huchi in kum nih vengveng ama inn luahna mun ah Paul a-om a, akiang a hoh peuhmah ana kipahpih hi. 31Pathian lalgam thu ahilh a, hangsantak in Toupa Jesu Khrist thu agen zel a, kuamah in amah akham kei uhi.
Currently Selected:
NASEPTE 28: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
