NASEPTE 20
20
Masidonia Leh Grik Gam Zinna
1Buaina aven nung in, Paul in nungzuite asamsak a, ahanthawn a, kampha in akha a, Masidonia gam a pai ding in apawtta hi. 2Thu tampi anungzuite hanthawn in huai gam atawnsuak a, Grikte gam atungta hi. 3Huan huai ah kha thum ataam hi. Siria gam a long a azin dek kuan in, Judate'n amah thah asawm ziak un, Masidonia gam tawn a kilehkik atum zawta hi. 4Asia gam tan a amah zuite, Beriah khomi Pirhas tapa Sopater, Thessalonika a pan Aristarkhas leh Sekundas, Darbe khomi, Gaias, Timothi leh Asia gam a Taikikas leh Trophimaste ahi uh. 5Huaite'n ka ma uh akai ua, Troas ah hon na ngak uhi. 6Kou bel Tanghou Silngou Soh Louh ni abei in Philippi a kipan long in ka pawt ua, ni nga nung in Troas ah akiang uh ka tung uhi; huai ah ni sagih ka taam uhi.
Tangval Eutikas Hihdamna
7Huan nipikal a ani masapen in, tanghou balkham ding a ka kikhop lai un, Paul in akiang uah thu agen hi; ama'n azingchiang a pai atup ziak in zankim tan hial thu agen hi. 8Huan indan tungnung, ka omkhawmna uah khawnvak tampi a-om hi. 9Huan amin Eutikas tangval khat tohlet ah atu a, nakpitak in ana ihmu hi. Huan Paul in thu agen sawt tak ziak in ama'n a-ihmut suak a thuakzou nawnta kei a, insawng thumna a kipan in aketa a, asisa in aphong uhi. 10Himahleh Paul akumsuk a, bohkhum in a-angpom a, “Lunglau kei un, alaitat kei lai hi,” achi hi. 11Huan Paul akahtou nawn a, tanghou balkham in an ane a, khovak pha in akiang uah thu agen a, huai nung in apaita hi. 12Huan valnoupa dam in api ua, akhamuang petmah uhi.
Miletas A Zinna
13Huan koute Assos khua zuan in long in ka na pai masa ua, long ah Paul tuansak ka tum uhi; ama'n khe a paina lam tot atup ziak in huchibang tuh amah geldan ahi. 14Huan Assos a ahon tuah chiang in, long ah ka tuangsakta ua, Mitilini khua ka tung uhi. 15Huan huai a kipan in long in ka pai nawn ua, azing in Khios tuikulh gal ka tung ua; huan azing nawn in Samo tuikulh ka tung ua, Troguliam ah ka giak uhi. Azing nawn in Miletas khua ka tung nawn uhi. 16Huan Paul in Asia gam a om sawt lou a, long a Ephesa khua khen atupsa him ahi a, ahihtheihleh Jerusalem a Pentikost ni huam tum in akinpai hi.
Ephesa Saptuam Upate Kiang A Paul Thu Nanung
17Huan Miletas a kipan in Ephesa ah mi asawl a, akiang ah saptuam upate asamsak hi. 18Huan akiang ahong tun un, ama'n akiang uah, Asia gam ka tot chil ni a kipan na kiang ua ka om sung teng in ka omdan na thei uhi. 19Thunuailutpen kawm leh Judate'n hon thah asawm ziak ua khitui kai leh thil haksa ka tung a tungte thuak kawm in Toupa nna ka sem hi. 20Huchibang in aphatuam ding thu na kiang uah bangmah iim ka nei kei a, vantang lak leh inn teng ah thu ka hon hilh zel a, 21Judate leh Grikte kiang ah leng Pathian lam a kisikna thu leh i Toupa Jesu Khrist lam a ginna thu ka theisak zel hi. 22Ngai un, tu in Kha in hon sawl teitei a ka theih ziak in, Jerusalem a hoh dia kisa ka hi, huai ah ka tung a thil hong tung ding bangmah ka thei kei; 23Kha Siangthou in, henna leh haksatna in nang ahon dawn hi, chi in kho teng ah ahon hilh zel hi, tuate kia ka theih ahi. 24Himahleh ka kitaitehna lam ka maban tun ding leh Pathian hehpihna tanchinhoih a dia theihpihtu a pang ding a Toupa Jesu kiang a huai nasepna ka muh pen sem khin phot leng, ka hinna leng khiaklah tham in ka sep kei hi.
25“Huan thei un, noute tengteng, Pathian lalgam thu tangkoupih a ka vakvaknate'n ka mel na mu nawnta kei ding uh chih ka thei hi. 26Huaiziak in mi tengteng sisan ah ka hul ahi chih tuni in ka hon theisak hi. 27Pathian vaihawm tengteng avek in na kiang uah iim ka nei kei hi. 28Pathian saptuamte, ama sisan a aleite, vak ding in noumau leh na heute tengteng uh tung ah pilvang un, Kha Siangthou in atung uah nou heutu in ahon bawl hi. 29Ka pai nung in na lak uah ngehangte ahong lut ding ua, pawlte ahawi kei ding uh chih ka thei hi. 30Noumau lak a mi nangawn, nungzui pawlte amau lam a kaimang ding in thu tuam gen na hong om ding uh. 31Huaiziak in limsak unla; kum thum hilhial khitui ke kawm a, sun leh zan a michih taihilh ka tawplouhdan, theigige un.
32“Tu in noute Pathian leh ahehpihna ah ka hon kemsak hi, huai in noute ahon bawllian thei a, mi lungsim siangthoute kiang ah goutan ahon neisak thei lai hi. 33Kuamah dangka, dangka-eng leh puansilh ka eng ngei kei. 34Hiai khutte'n keimah leh ka lawmte taksap asepkhiak zeldan, noumau ngei in na thei uhi. 35Bangkim ka hih peuhmah na chin ding ua ka hih ahi, huchibang a semgim leh Toupa Jesu thu theigige kawm in mihatloute na panpih ding uh ahi; amah mah in, ‘Lak sang in piak in lukhawng anei zaw’ achih,” achi hi.
36Huai thu agen khit in akhukdin a, avek un athum uhi. 37Huan avek un akap huphup ua, Paul ngawng ah kawi in atawp uhi. 38Amel amuh nawn tak louh ding thu agen alungkhamna pen uh ahi. Huan long pha in amah ava kha uhi.
Currently Selected:
NASEPTE 20: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
