NASEPTE 18
18
Korinth Khua Ah Paul
1Huai thilte zoh in Athen a kipan Paul apawt a, Korinth ah ahohta hi. 2Huan amin Akuila, Juda khat amu a, huai mi Pontus gam a piang ahi a, Klaudias in Judate tengteng Rome a kipan pawt thu apiak ziak a azi Priscilla toh Itali gam a kipan hong tung phet ahi uhi. Huai mite kiang ah Paul atungta hi. 3Anasep uh kibang ahih ziak in amau akikoppih in nna asemkhawm ua; anasep uh puanin bawl ahi. 4Sabbath teng in sinagog ah chitaktak in thu agen zel a, Judate leh Grikte thuzoh atum hi.
5Masidonia gam a kipan Silas leh Timothi ahong tun un, Paul tuh kha phutluih in thu nasem in a-om a, tua Jesu zaw Khrist ahi chih Juda mite kiang ah atheihpih zel hi. 6Himahleh akalh un agensia ua, Paul in apuan asing a, akiang uah, “Na sisan moh uh noumau lutung ah om hen; kei zaw ka hul ahi; tuban Zentelte kiang ah ka paita ding,” achi hi. 7Huan huai a kipan apai a, amin Titas Justas mi khat inn ah alut a, huai mi'n Pathian abe zel hi, a-inn leng sinagog toh kizom ahi. 8Huan Krispus pa sinagog heutu in a-inkuanpihte tengteng toh Toupa agingta a, Korinth a mi tampi'n leng za in agingta ua, baptisma atang uhi.
9Zan in Toupa'n Paul kiang ah mengmu bang in, “Lau ke'nla, dai lou in thu gen zel in; 10kei na kiang ah ka om akei hiam, sihna ding in kuamah in na tung ah khut akha kei ding uhi; hiai khua ah mi tampi ka nei ngal a,” achi hi. 11Huan huai ah alak uah Pathian thu hilh in kum khat leh kha guk a-omta hi.
Gallio Leh Paul
12Huan Akaia gam-ukpa Gallio ahih lai in Judate'n kituak in Paul kalh in buaina abawl ua, vaihawmna tutphah ma ah api uhi. 13“Huai mi'n dan lou bang in a Pathian be ding in mi athuzoh,” achi uhi. 14Paul in adawn dekleh Gallio in, Judate kiang ah, “Judate aw, hiai thil diklou thu hiam, thilhihkhelh thu hiam bek hileh, pel lou in ka hon awlmoh ding hi. 15Himahleh thumalte leh minte, noumau dan thu lel zaw noumau kingaihtuah zaw un; ke'n zaw huchibang thu ngaihtuah ka ut kei,” achi hi. 16Huan vaihawmna tutphah a kipan in amau adelhkheta hi. 17Huan Grik mi tengteng in sinagog heutu Sostheni aman ua, vaihawmna tutphah ma ah avua uhi. Gallio in athilhih uh khawk asa kei hi.
Siria Antiok A Kik Nawnna
18Huai zoh in Paul ni sawttak ataam nilouh a; huai zoh in unaute kampha in akha a, huai a kipan Siria gam lam ah long in apaita a, akiang ah Priscilla leh Akuila leng apai uhi. Paul in thuchiam aneih ziak in Kenkriai ah sam amet phot hi. 19Huan Ephesa atung ua, huai ah amau anusia a; himahleh amah kia sinagog ah alut a, Judate kiang ah chitaktak in thu asutpih hi. 20Huan sawt deuh taam ding in akhou ua, himahleh ama'n lem asa kei a, 21“Pathian in aphalleh na kiang uah ka hong nawn ding,” chi in kampha in akhen a, Ephesa a kipan long in apaita hi. 22Huan Kaisaria ah ahong kai a, Jerusalem ah ahohtou a, saptuamte chibai buk in, Antiok ah ahohsukta hi. 23Huan huai a sawt kuam a-om nung in apai nawn a, nungzuite tengteng hihhat in Galatia gam leh Phrigia gam atawnsuak vek hi.
Ephesa Ah Apollos
24Huan Juda mi khat, amin Apollos, Aleksandria a piang, mipiltak, Ephesa ah ahohsuk a; ama'n Laisiangthou anak theih mahmah hi. 25Hiai mi'n Toupa Lampi thu zilsa ahi a, lungsim a phatuamngaitak ahih ziak in Toupa thu ahilh zel hi, Johan baptisma thu kia athei hi. 26Sinagog ah hangsantak in thu agen hi. Huchi in Priscilla leh Akuila in athugen azak un, a-inn uah leh akiang ah Pathian Lampi thu kichian sem in ahilhchianta uhi. 27Ama'n Akhaia gam a paikai atuptak in unaute'n ahanthawn ua, amah ana kipahpihna ding un nungzuite kiang ah lai agelhsak uhi. Huan atun in, Pathian hehpihna ziak a gingtate nakpitak in apanpih hi. 28Vantang theih in Judate nakpitak in aseldong a, Laisiangthou zang in tua Jesu zaw Khrist ahi ngei chih atheisak hi.
Currently Selected:
NASEPTE 18: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
