MATTHAÏOS 7
7
Kaba bishar ïa kiwei pat
(Luk. 6:37-38,41-42)
1“Wat bishar ïa kiwei pat, khnang ba U Blei un ym bishar ïa phi, 2#Mrk. 4:24naba U Blei un bishar ïa phi ha kajuh ka rukom kumba phi bishar ïa kiwei pat, bad un pyndei ha phi ïa kijuh ki jingthew kiba phi pyndei ïa kiwei pat. 3Balei, te, ba phi khmih ïa u thiat ha ka khmat u para jong phi, bad phi khlem pynleit jingmut ïa ka lyngkhot dieng hapoh ka khmat jong phi hi? 4Kumno phi nud ban ong ha u para jong phi, ‘Sngewbha, shah ïa nga ban khlaw noh ïa u thngiat na ka khmat jong phi,’ haba phi don ka lyngkhot dieng ha la ka jong ka khmat? 5Phi u riewarsap! Nyngkong eh weng noh ïa ka lyngkhot dieng na la ka khmat jong phi hi, bad nangta phin lah ban ïohi shai kdar ban khlaw ïa u thiat na ka khmat u para jong phi.
6“Wat ai ïa kaei kaba khuid ha ki ksew — kin shu phai pynban bad tur ban dait ïa phi. Wat bret ïa ki mawlynnai ha khmat ki sniang — kin shu ïuh pynban ïa ki hapoh ka kjat.
Pan, wad, tied
(Luk. 11:9-13)
7“To pan, bad phin ïohpdiang; to wad, bad phin shem; to tied, bad ïa ka jingkhang yn plie ïa phi. 8Naba uno uno baroh uba pan un ïohpdiang, bad uno uno uba wad un shem, bad ka jingkhang kan plie ïa uta uba tied. 9Hato uno uno na phi uba long u kpa un ai ïa la u khun da u maw haba u pan ïa u kpu? 10Lane hato phin ai ha u da u bseiñ haba u pan ïa ka dohkha? 11Phi kiba sniew eh, phi tip kumno ban ai kiei kiei kiba bha ïa ki khun jong phi. Kaba katno tam keiñ, ba U Kpa jong phi uba ha bneng un ai kiei kiei kiba bha ha kito kiba pan na u!
12 #
Luk. 6:31
“Leh ïa kiwei ïa kaei kaba phi kwah ïa ki ba kin leh na ka bynta jong phi: Kane ka long ka jingmut jong ka Hukum u Moses bad jong ki jinghikai ki nongïathuhlypa.
Ka khyrdop kaba khim
(Luk. 13:24)
13“Rung shapoh lyngba ka khyrdop kaba khim, namar ka khyrdop sha ka dujok ka long kaba kylluid bad ka lynti kaba ïalam sha ka, ka long kaba suk, bad don shibun kiba ïaid na ka. 14Hynrei ka khyrdop sha ka jingim ka long kaba khim bad ka lynti kaba ïalam sha ka, ka long kaba eh, bad don khyndiat ki briew kiba shem ïa ka.
U dieng bad ki soh jong u
(Luk. 6:43-44)
15“To sumar ïa lade na ki nongïathuhlypa balamler; ki wan sha phi ki da i kum ki langbrot ha kaba shabar, hynrei ha kaba shapoh ki long shisha kum ki suri barunar. 16Phin ithuh ïa ki da kaei kaba ki leh. Ki bniap shiah kim ju pynmih ki sohwaiñ, bad ki shiah buid kim ju pynmih ki soh Dumbur. 17U dieng uba plung bha u pynmih ki soh kiba bha, hynrei u dieng uba swai u pynmih ki soh kiba sniew. 18U dieng uba plung bha um lah ban pynmih ki soh kiba sniew, bad u dieng uba swai um lah ban pynmih ki soh kiba bha. 19#Mat. 3:10; Luk. 3:9Bad ïa uno uno u dieng u bym pynmih u soh uba bha la ju khet noh bad bret hapoh ka ding. 20#Mat. 12:33Kumta te, phin ithuh ïa ki nongïathuhlypa balamler da kaei kaba ki leh.
Ngam ju la ithuh ïa phi
(Luk. 13:25-27)
21“Ym u briew baroh uba khot ïa nga, ‘A Trai, A Trai’ u ban ïohrung shapoh Ka Hima ki bneng, hynrei tang kito kiba leh ïa kaei kaba U Kpa jong nga uba ha bneng u kwah ïa ki ban leh. 22Haba ka Sngi Bishar ka poi, kiba bun kin ong ha nga, ‘A Trai, A Trai! Ha ka kyrteng jong me ngi la kren ïa ka khubor jong U Blei, da ka kyrteng jong me ngi la beh noh ïa shibun ki ksuid bad ngi la leh shibun ki kambah!’ 23#Salm. 6:8Nangta ngan ong ha ki, ‘Ngam ju la ithuh ïa phi. Khie leit noh na nga, phi ki briew bymman!’
Ar ngut ki nongtei ïing
(Luk. 6:47-49)
24“Kumta te, uno uno uba ïohsngew ïa kine ki ktien jong nga bad uba kohnguh ïa ki u long kum u briew uba stad uba la tei ïa la ka ïing halor u mawsiang. 25U slap u la hap, ki wah ki la shlei, bad ka lyer ka la beh jur pyrshah ïa kata ka ïing. Hynrei kam shym la khyllem, namar la tei ïa ka halor u mawsiang.
26“Hynrei uno uno uba ïohsngew ïa kine ki ktien jong nga bad u bymkohnguh ïa ki u long kum u briew uba bieit uba la tei ïa la ka ïing halor u shyiap. 27U slap u la hap, ki wah ki la shlei, ka lyer ka la beh jur pyrshah ïa kata ka ïing, bad ka la khyllem. Bad katno ka jingkhyllem bashyrkhei ka la long!”
Ka iktiar U Jisu
28 #
Mrk. 1:22; Luk. 4:32 Haba U Jisu u la dep kren ïa kine kiei kiei, u paidbah u la sngewphylla ïa ka rukom kaba u la hikai. 29Um shym la long kum ki nonghikai Aiñ; pynban, u la hikai da ka iktiar.
Currently Selected:
MATTHAÏOS 7: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.