MATTHAÏOS 2
2
Ki nongwan jngoh na mihngi
1Ïa U Jisu la kha ha ka shnong Bethlehem ha Judia, ha ka por mynba u Herod u long u syiem. Shen hadien kata, katto katne ki rangbah kiba la peit bniah ïa ki khlur ki la wan na sha mihngi sha Jerusalem bad ki la kylli, 2“Hangno u don u khunlung uba la kha ban long u syiem jong ki Jiw? Ngi la ïohi ïa u khlur jong u mynba u la mih ha ka phang mihngi, bad ngi la wan ban mane ïa u.”
3Haba u Syiem Herod u la ïohsngew shaphang kane, u la khuslai shibun eh, bad kumta ka la long ha uwei pa uwei ha Jerusalem. 4U la khot lang ïa baroh ki rangbah lyngdoh bad ïa ki nonghikai Aiñ bad u la kylli ïa ki, “Hangno yn kha ïa u Messaïah?”
5“Ha ka shnong Bethlehem kaba ha Judia,” ki la jubab. “Naba kane ka dei kaei kaba u nongïathuhlypa u la thoh:
6 #
Mik. 5:2
“ ‘Ko Bethlehem ha ka ri Judah,
pham long kaba rit tam hapdeng ki nongbah kiba paw jong ka Judah;
namar na pha un mih u nongïalam
u ban kdew lynti ïa ki briew jong nga ki Israel.’ ”
7Kumta u Herod u la khot ïa ki nongwan jngoh kiba na mihngi sha ka jingïakynduh kaba jar jar bad ban shem na ki ïa ka por kaba thikna ha kaba u khlur u la lah mihpaw. 8Nangta u la phah noh ïa ki sha Bethlehem ryngkat bad kine ki jingbthah: “Khie leit bad da wad biang biang ïa u khunlung, bad haba phi shem ïa u, pyntip sha nga, ba kumta nga ruh nga lah ban leit bad mane ïa u.”
9-10Bad kumta ki la mihnoh, bad ha ka jingïaid lynti jong ki, ki la ïohi ïa ujuh u khlur uba ki la ïohi ha ka phang mihngi. Haba ki la ïohi ïa u, katno ki la kmen eh, ka jingkmen jong ki kaba haduh katta katta! U la leit ha shuwa jong ki tad haduh ba un da sangeh halor ka jaka ha kaba u khunlung u don. 11Ki la leit rung shapoh ka ïing, bad haba ki la ïohi ïa u khunlung lem bad ka kmie jong u ka Mari, ki la dem khohsiew bad ki la mane ïa u. Ki la sei ïa ki jingai sngewbha jong ki da ka ksiar, ka jingiwbih bad ka Mirr, bad ki la ai ïa ki ha u.
12Nangta ki la leit phai noh sha la ka ri na kawei pat ka lynti, namar U Blei u la maham ïa ki ha ka jingphohsniew ban ym leit phai pat sha u Herod.
Ka jingphet sha Ijipt
13Hadien ba ki la lah mihnoh, u angel jong U Trai u la paw ha ka jingphohsniew ha u Joseph bad u la ong, “U Herod un sa wad ïa u khunlung khnang ban pynïap ïa u. Kumta to ïeng joit, ïalam ïa u khunlung bad ïa ka kmie jong u bad phet noh sha Ijipt bad sah hangta tad haduh ba ngan da ong ïa me ba men mihnoh.”
14U Joseph u la ïeng joit, u la ïalam ïa u khunlung bad ka kmie jong u bad u la mihnoh ha ka por mynmiet sha Ijipt, 15#Hos. 11:1ha kaba u la sah tad ynda u Herod u la ïap. Ïa kane la leh ban pynlong ïa kaei kaba U Trai u la lah kren lyngba u nongïathuhlypa kan urlong shisha, “Nga la khot ïa u khun jong nga na Ijipt.”
Ka jingpynïap ïa ki khunlung
16Haba u Herod u la sngewthuh ba ki nongwan jngoh na mihngi ki la shukor ïa u, u la bitar lep. U la ai hukum ban pynïap ïa ki khynnah shynrang baroh ha Bethlehem bad ha ki shnong ba-marjan kiba la dap ar snem bad kiba kham rit — ïa kane la leh kat kum kaei kaba u la tip na ki nongwan jngoh shaphang ka por mynba u khlur u la lah mihpaw.
17Ha kane ka rukom keiñ kaei kaba u Jeremaïah u nongïathuhlypa u la kren ka la wan urlong shisha:
18 #
Jer. 31:15
“La ïohsngew ïa ka jingsawa ha Ramah,
ka jingsawa jong ka jingïam kthang.
Ka Rakhel ka ïam na ka bynta la ki khun;
ka kyntait ba yn pyntngen ïa ka,
namar ba ki la shah pynïap.”
Ka jingwanphai pat na Ijipt
19Hadien ba u Herod u la ïap, u angel U Trai u la mihpaw ha ka jingphohsniew ha u Joseph ha Ijipt 20bad u la ong, “To ïeng joit, shim ïa u khunlung bad ka kmie jong u, bad khie leit phai noh sha ka ri Israel, namar kito kiba pyrshang ban pynïap ïa u khunlung ki la ïap.” 21Kumta u Joseph u la ïeng joit, u la shim ïa u khunlung bad ka kmie jong u bad u la leit phai pat sha Israel.
22Hynrei haba u Joseph u la ïohsngew ba u Arkhelos u la mih bujli ïa u Herod, u kpa jong u, kum u syiem ka Judia, u la sheptieng ban leit shata. La ai shuh shuh ha u shibun ki jingbthah ha ka jingphohsniew, kumta u la leit sha ka probins#2:22 probins: Kane ka dei ba shu bud beit ïa ka kyntien Province ha ka jingspeldak Khasi. jong ka Galilaïa 23#Mrk. 1:24; Luk. 2:39; Ïoan. 1:45bad u la shong la sah noh ha ka shnong kaba kyrteng ka Nasareth. Bad kumta kaei kaba ki nongïathuhlypa ki la lah ong ka la urlong shisha: “Yn khot ïa u, u nong Nasareth.”
Currently Selected:
MATTHAÏOS 2: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.