ÏOANNIS 15
15
U Jisu u long u dieng sohwaiñ bashisha
1“Nga, nga long u dieng sohwaiñ bashisha, bad U Kpa jong nga u long u nongsumar brisoh. 2U ngor noh ïa kano kano ka tnat kaba don ha nga ka bymseisoh, bad u khyllad ïa kano kano ka tnat kaba seisoh, khnang ba kan long khuid bad kan kham seisoh. 3La pynlong khuid lypa ïa phi da ka jinghikai kaba nga la ai ha phi. 4To ïaineh ha nga, bad ngan ïaineh ha phi. Ka tnat kam lah ban seisoh da lade hi; ka lah ban seisoh tang lada ka ïaineh ha u dieng sohwaiñ. Ha kajuh ka rukom, phi ruh phim lah ban seisoh lymda phi ïaineh ha nga.
5“Nga long u dieng sohwaiñ, bad phi long ki tnat. Uno uno uba ïaineh ha nga, bad ma nga ha u, un seisoh shibun; naba phim lah ban leh ei ei khlem ma nga. 6Ïa uno uno u bymïaineh ha nga yn bret noh ïa u kum ka tnat bad u ïap tyrkhong; kum ïa kita ki tnat, la lumlang bad la bret noh ha ka ding, ha kaba la thang ïa ki. 7Lada phi ïaineh ha nga bad ki ktien jong nga ki ïaineh ha phi, te phin pan ïa kaei kaei kaba phi kwah, bad phin ïoh ïa ka. 8Ka burom U Kpa jong nga ka paw da ka jingseisoh ba bun jong phi; bad ha kane ka rukom phi long ki synran jong nga. 9Nga ieit ïa phi kumba U Kpa u ieit ïa nga; to ïaineh ha ka jingieit jong nga. 10Lada phi kohnguh ïa ki hukum jong nga, phin ïaineh ha ka jingieit jong nga, kumba nga la kohnguh ïa ki hukum U Kpa jong nga bad nga ïaineh ha ka jingieit jong u.
11“Nga la ïathuh ha phi ïa kane khnang ba ka jingkmen jong nga kan ïoh long ha phi bad ba ka jingkmen jong phi kan long kaba dap pura. 12#Ïoan. 13:34; 15:17; 1 Ïoan. 3:23; 2 Ïoan. 1:5Ka hukum jong nga ka long kane: To ïa-ieit iwei ïa iwei pat, kumba nga ieit ïa phi. 13Ka jingieit kaba khraw tam kaba u briew u lah ban don na ka bynta ki paralok jong u ka long ban aiti ïa la ka jingim na ka bynta jong ki. 14Bad phi long ki paralok jong nga lada phi leh ïa kaei kaba nga hukum ïa phi. 15Ngam khot shuh ïa phi ki shakri, namar u shakri um tip aïu u kynrad u leh. Pynban, nga khot ïa phi ki paralok, namar nga la ïathuh ïa phi ïa kiei kiei baroh kiba nga la ïohsngew na U Kpa jong nga. 16Phim shym la jied ïa nga; nga la jied ïa phi bad nga la thung ïa phi ban leit bad ban seisoh shibun, u jait soh uba ïaineh. Bad kumta U Kpa un ai ha phi ïa kaei kaei kaba phi pan na u ha ka kyrteng jong nga. 17Kane, te, ka long kaei kaba nga hukum ïa phi; to ïa-ieit iwei ïa iwei pat.
Ka jingshun ka pyrthei
18“Lada ka pyrthei ka shun ïa phi, to kynmaw ba ka la shun ïa nga nyngkong. 19Lada phi long jong ka pyrthei, te ka pyrthei kan ieit ïa phi kum la ki jong hi. Hynrei nga la jied ïa phi na kane ka pyrthei, bad phim long shuh ki jong ka; na kata ka daw ka pyrthei ka shun ïa phi. 20#Mat. 10:24; Luk. 6:40; Ïoan. 13:16To kynmaw ïa kaei kaba nga la ong ha phi: ‘U mraw um long kham khraw ban ïa la u Kynrad.’ Lada ki pynshitom ïa nga, kin pynshitom ïa phi ruh; lada ki la kohnguh ïa ka jinghikai jong nga, kin kohnguh ïa ka jong phi ruh. 21Hynrei kin leh ïa kane baroh ïa phi namar ba phi long ki jong nga; naba kim ithuh ïa uta uba la phah ïa nga. 22Kin ym da la sngewrem ïa la ka pop lada ngam shym la wan bad ngam shym la kren ha ki; kumba ka long, kim don nia ei ei shuh na ka bynta la ka pop. 23Uno uno uba shun ïa nga u shun ïa U Kpa jong nga ruh. 24Kin ym da la sngewrem ïa ka pop lada ngam shym la leh hapdeng jong ki ïa kiei kiei kiba ym don uno uno uwei pat uba la ju leh; kumba ka long, ki la ïohi ïa kaei kaba nga la leh, bad ki shun ïa nga bad ïa U Kpa jong nga. 25#Salm. 35:19; 69:4Kane, pynban, kaba la dei ban jia, khnang ba ïa kaei kaba la thoh ha ka Hukum jong ki kan urlong shisha: ‘Ki la shun ïa nga khlem daw ei ei.’
26“U Nongïarap un wan — U Mynsiem, uba pynpaw ïa ka jingshisha shaphang U Blei bad uba wan na U Kpa. Ngan phah ïa u na U Kpa, bad un kren shaphang jong nga. 27Bad ma phi, ruh, phin kren shaphang jong nga, namar ba phi la don lem bad nga naduh kaba sdang.
Currently Selected:
ÏOANNIS 15: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.