ÏOANNIS 13
13
U Jisu u sait ïa ki kjat jong ki synran jong u
1Ka la dei shi sngi ha shuwa ka Jingkhawai Niam Ka Jinglait. U Jisu u la tip ba ka kynta ka la poi ban iehnoh ïa kane ka pyrthei bad ban leit sha U Kpa. U la ju ieit borabor ïa kito kiba ha ka pyrthei kiba long ki jong u hi, bad u la ieit ïa ki haduh kaba kut.
2U Jisu bad la ki synran ki dang ïabam jingbam miet. U Ksuid u la bsuh lypa ha ka dohnud jong u Judas, u khun jong u Simon Iskariot, ka jingpyrkhat ban shetkylla ïa U Jisu. 3U Jisu u la tip ba U Kpa u la ai ha u ïa ka bor baroh; u la tip ba u la wan na U Blei bad ba un sa leit sha U Blei. 4Kumta u la ïeng na ka miej bam, u la law noh ïa la ka jaiñkup, bad u la teh ïa ka jaiñ ñiad ha la ka syngkai. 5Nangta u la theh khyndiat ka um ha ka dabor bad u la sdang ban sait ïa ki kjat jong ki synran bad ñiad pynrkhiang ïa ki da kata ka jaiñ ñiad ba la teh ha la ka syngkai. 6U la wan ha u Simon Petros, uba la ong ha u, “Hato men sait ïa ki kjat jong nga, ko Trai?”
7U Jisu u la jubab ïa u, “Mem sngewthuh satia mynta ïa kaei kaba nga leh, hynrei men sa sngewthuh hadien.”
8U Petros u la pynbna, “Da lei lei ha kano kano ka por men ym ïoh ban sait ïa ki kjat jong nga.”
“Lada ngam ïoh ban sait ïa ki kjat jong me,” U Jisu u la jubab, “men ym ïoh long shuh u synran jong nga.”
9U Simon Petros u la jubab, “Ko Trai, to wat sait tang ïa ki kjat jong nga, te! To sait ruh ïa ki kti bad ïa ka khlieh jong nga ruh.”
10U Jisu u la ong, “Uno uno uba la dep sum u long uba la khuid bha bad um donkam ban da sait ïa lade, lait noh ïa la ki kjat. Baroh na phi, phi long kiba khuid — baroh lait noh uwei.” 11(U Jisu u la lah tip lypa uei u ban sa shetkylla ïa u; na kata ka daw balei u la ong, “Baroh na phi, lait noh uwei, phi long kiba khuid.”)
12 #
Luk. 22:27
Hadien ba U Jisu u la sait ïa ki kjat jong ki, u la kup biang ïa ka jaiñkup bad u la leit phai sha la ka jaka ha ka miej. “Phi sngewthuh ïa kaei kaba nga dang shu dep ban leh ïa phi?” u la kylli. 13“Phi khot ïa nga ‘U Nonghikai’ bad ‘U Trai’, bad ka long kaba dei ba phi leh kumta, namar kata ka dei kaei kaba nga long. 14Ma nga, U Trai bad U Nonghikai jong phi, nga la sait ïa ki kjat jong phi. Phi, te, phi dei ban sait ïa ki kjat para ma phi. 15Nga la pyn-i ka nuksa ïa phi, ba phin leh kumba nga la leh ma nga ïa phi. 16#Mat. 10:24; Luk. 6:40; Ïoan. 15:20Nga ong ha phi ïa ka jingshisha: U mraw um long kham khraw ban ïa u kynrad jong u, bad u nonglamktien um long kham khraw ban ïa uta uba la phah ïa u. 17Mynta ba phi tip ïa kane ka jingshisha, katno kiba kmen phin long lada phi pyntreikam ïa ka!
18 #
Salm. 41:9
“Ngam shym kren shaphang jong phi baroh; nga tip ïa kito kiba nga la jied. Hynrei ka Jingthoh Bakhuid ka dei ban urlong shisha, kaba ong, ‘U briew uba la ïabam lang ïa ka jingbam jong nga u phai pyrshah ïa nga.’ 19Nga ong ha phi ïa kane mynta, khnang ba haba kata kan jia, phin ngeit ba ‘Nga long uba nga long.’ 20#Mat. 10:40; Mrk. 9:37; Luk. 9:48; 10:16Nga ïathuh ha phi ïa ka jingshisha, uno uno uba pdiang ïa uno uno uba nga phah, u pdiang ïa nga ruh; bad uno uno uba pdiang ïa nga, u pdiang ïa uta uba la phah ïa nga.”
U Jisu u ïathuh lypa ïa ka jingshetkylla ïa u
(Mat. 26:20-25; Mrk. 14:17-21; Luk. 22:21-23)
21Hadien ba U Jisu u la ong ïa kane, u la khuslai jur bad u la pynbna da kaba shai, “Nga ïathuh ha phi ïa ka jingshisha: Uwei na phi un sa shetkylla ïa nga.”
22Ki synran ki la ïa-peit uwei ïa uwei pat da ka jinglyngngoh kaba jur, shaphang jongno u mut. 23Uwei na ki synran, uta ïa uba U Jisu u ieit, u da shong shaniah ha U Jisu. 24U Simon Petros u la pyn-i dak ïa u bad u la ong, “Kylli ïa u ba u kren shaphang jongno.”
25Kumta uta u synran u la tur kham sha jan U Jisu bad u la kylli, “Ko Trai, u dei uno?”
26U Jisu u la jubab, “Ngan wieh katto katne u kpu ha ka sos bad ngan ai ha u, uta ha uba nga ai; u dei uta u briew.” Kumta u la shim shi lyngkhot u kpu, u la wieh ha ka, bad u la ai ha u Judas, u khun jong u Simon Iskariot. 27U Judas tang mar ïashim ïa uta u kpu, u Soitan u la rung hapoh jong u. U Jisu u la ong ha u, “Leh noh kloi ïa kaei kaba men sa leh!” 28Ym don uwei na kita kiba la shong bam kiba la sngewthuh balei U Jisu u la ong ïa kane ha u. 29Namar ba u Judas u long uba bat ïa ka pla pisa, don na ki synran ki la pyrkhat ba U Jisu u la ong ïa u ban leit bad thied ïa kaei kaba ki donkam na ka bynta ka Jingkhawai Niam, lane ban ai ei ei ïa kiba duk.
30U Judas u la pdiang ïa u kpu bad mar kumta u la mihnoh shabar. Ka la long ka por mynmiet.
Ka Hukum kaba thymmai
31Hadien ba U Judas u la mihnoh, U Jisu u la ong, “Mynta ïa ka burom U Khun U Briew la pynpaw; mynta ïa ka burom U Blei la pynpaw lyngba u. 32Bad lada ïa ka burom U Blei la pynpaw lyngba jong u, te U Blei un pynpaw ïa ka burom jong U Khun U Briew ha lade, bad un leh kumta kumne kumne. 33#Ïoan. 7:34Ko ki khun jong nga, ngan ym don shuh bad phi slem nangne. Phin ïawad ïa nga; hynrei nga ïathuh ïa phi mynta ïa kaei kaba ba nga la ïathuh ha ki nongsynshar jong ki Jiw, ‘Phim lah ban leit shano sha ba nga ngan leit.’ 34#Ïoan. 15:12,17; 1 Ïoan. 3:23; 2 Ïoan. 1:5Bad mynta nga ai ha phi ka hukum kaba thymmai; to ïa-ieit iwei ïa iwei. 35Lada phi don ka jingieit iwei ïa iwei, te baroh kin tip ba phi long ki synran jong nga. Kumba nga la ieit ïa phi, kumta phi dei ban ieit iwei ïa iwei.”
U Jisu u ïathuh lypa ïa ka jinglen u Petros
(Mat. 26:31-35; Mrk. 14:27-31; Luk. 22:31-34)
36“Ko Trai, shano men leit?” u Petros u la kylli ïa u.
“Mem lah ban bud ïa nga mynta shano sha ba ngan sa leit,” U Jisu u la jubab; “hynrei hadien men sa bud ïa nga.”
37“Ko Trai, balei ngam lah ban bud ïa me mynta?” u Petros u la kylli. “Nga kloi ban ïap na ka bynta jong me!”
38U Jisu u la jubab, “Hato me long ba la kloi shisha ban ïap na ka bynta jong nga? Nga ïathuh ha me ïa ka jingshisha: Ha shuwa ba u syiar un kyn-ih men len ïa nga lai sien ba mem ithuh ïa nga.
Currently Selected:
ÏOANNIS 13: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.