HABAKKUK 3
3
Ka jingduwai u Habakkuk
1Kane ka long ka jingduwai u Habakkuk u nongïathuhlypa:
2A Trai, nga la ïohsngew ïa kaei ba me la leh,
bad nga la dap da ka jingtiengburom.
Mynta to leh biang ha ki por jong ngi ïa ki kam bakhraw kiba me la ju leh.
To leh-isynei, wat haba me bitar.
3U Blei u wan biang na Edom;
U Blei bakhuid u wan na ki lumrit ka Paran.
Ka burom jong u ka dap ïa ki bneng,
bad ka pyrthei ka dap da ka jingïaroh ïa u.
4U wan bad ka jingthaba ka leilieh;
ka jingshai ka phalang na ka kti jong u,
dei hangta ba ka bor jong u ka rieh.
5U phah ïa ka jingpang ha shuwa jong u
bad hukum ba ka jingïap kan bud ïa u.
6Haba u sangeh, ka pyrthei ka khih;
u tang shu peit, ki jaitbynriew ki kyiuh.
Ki lumbah ba bymjukut ki khih;
ki lumrit baneh junom ki ngam shapoh,
ki lumrit ha kiba u ju ïaid ha ki por mynbarim.
7Nga la ïohi ïa ki briew ka Kushan ba ki sheptieng
bad ki briew ka Midian ki khynñiuh.
8Hato la dei ki wah kiba la pynlong ïa me ban bitar, A Trai!
Hato la dei ka duriaw kaba la pynlong ïa me ban bitar shla?
Me shong kulai halor ki lyoh;
u lyoh ka 'erïong u la long ka kali ïapom jong me,
mynba me la wallam jingjop ha la ki briew.
9Me pynkhreh ban pyndonkam ïa la ka ryntieh,
me khreh ban siat ïa la ki khnam.
Ka leilieh jong me ka pynpait ïa ka khyndew.
10Haba ki lumbah ki la ïohi ïa me, ki kyiuh;
ka um ka hap na ki sahit bneng.
Ki um hapoh ka khyndew ki kyrhuh,
bad ki jingat phyllung jong ki,
ki kiew shalor.
11Ha ka jingthaba jong ki khnam baher stet
bad ka jingtyngshaiñ na u sum baphyrnai,
ka sngi bad u bnai ki sangeh hajuh.
12Me thom sawdong ka pyrthei ha ka jingbitar;
ha ka jingbitar shla me ïuh halor ki jaitbynriew.
13Me mihnoh ban pyllait ïa la ki briew,
ban pyllait ïa u syiem ba la jied jong me.
Me pynkyllon ïa u nongïalam jong ki bymman
bad pynjot thiaw ïa ki nongbud jong u.
14Ki khnam jong me ki sam lyngba ïa u nongïalam ka kynhun shipai jong u
haba u la wan kum ka 'erïong ban pynsakma ïa ngi,
da ka jingsarong kum kito kiba banbeiñ ïa kiba duk ha kaba rieh.
15Me ïuh halor ka duriaw da ki kulai jong me,
bad ki umbah ki thnam shaid.
16Nga ïohsngew ïa kane baroh, bad nga kyiuh;
ki rmiang shyntur jong nga ki khih da ka jingsheptieng.
Ka met jong nga ka jem lwep,
bad ki kjat jong nga ki jynthut hapoh jong nga.
Ngan ap jar jar ïa ka por ka ban wan haba U Blei un pynshitom ïa kito kiba tur ïaleh ïa ngi.
17Wat la ki dieng Dumbur kim don soh bad ym don sohwaiñ ba mih ha ki dieng sohwaiñ,
wat la u dieng Olib um sei ei ei bad ki lyngkha kim pynmih kew,
wat la ki langbrot baroh ki ïap bad ki sem masi ki thylli,
18Ngan ïai lehkmen bad shadkmen,
namar U Trai U Blei u long u nongpynim jong nga.
19 #
2 Sam. 22:34; Salm. 18:33 U Trai Nongsynshar u ai ha nga ka jingkhlaiñ.
U pynlong ïa nga uba skhem ki kjat kum ka skei
bad u sumar ïa nga halor ki lumbah.
Currently Selected:
HABAKKUK 3: KHACLBSI
Highlight
Copy
Compare
Share
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
