JOB 41
41
1“Leviathan chu ngakuoiin i hnûk dawk thei ding am a nih?
Annawleh, a lei chu hruiin i keihnuoi zo ding am a nih?
2A hnâr chu hruihruolin i khit thei ding am a nih?
Annawleh, a khâk chu thalin i suntlang thei ding am a nih?
3I kuoma chun hninahai tamtak siemin,
I kuoma chun thu innêmhai chu a hril ding am a nih?
4Ama chu siehlawa kumkhuoa i nei zingna dingin,
I kuoma chun thutiem a siem ding am a nih?
5Vate inhnelpui angin ama chu în hnelpui ding am a nih?
Annawleh, i rawngbâwltunu ta dingin ama chu i khit ding am a nih?
6Ngamantuhai chun innêpnain an hmang ding am a nih?
Sumdâwng mihai lai chun ama chu an sem dar dîm a nih?
7A vun chu thîr kibar neiin i suksip thei ding am a nih?
Annawleh, a lu chu ngakhâwfeihaiin?
8Ama chunga chun i kut hei inlet hrim la.
In inthaw dân chu hre zing i ta,
Thaw nâwk ta ngai naw ti nih.
9Ngai ta, ama hne în zuomna chu a thlâwn el a na,
Ama hei hmu ngawt khawmin mi chu a beidawng nghâl el a nih.
10Ama suktho ding khawpa huoisen tukhawm an um nawh a,
Chuong a ni chun tu am keia hmaa ngir thei ding?
11Ama ka pêk kîr nâwk dingin tuin am ka kuomah an pêk hmasa hlak a?#Ama inthawpuia dam suok ding tu am? Khawvêla mi tukhawmin thei naw nih (TEV) or Ama ka thung nâwk ding tuin am dawng thei a ta? Ch.11 hi Hebraiah a chieng nawh.
Iengkim vânkhuphnuoia thil taphawt chu ka ta a nih.
12A kehai hrâtzie chu hril thei bâk a nih,
A tha hrâtzie a taksa muk ṭhat dân khawm chu.
13A silfên chunghnung chu tuin am hâwk ngam a ta?#A vun chunghnung, amanih “a mithi vun” khawm tu am hîk thei ding?
Tuin am thîrse thuo hni hung insêdetir thei a ta?
14Tu am a khâk chela a bau keika thei ding?
A ha intlar kuol ṭhut chu ṭi a um sih a.
15A vun char inuoi chu a suong tak a na,
Chârde ang ela khawng rût chu,
16Pakhat chun a dang a hnai hleh a,
A kâra chun boruok hrim a lût dêr nawh.
17An inṭingmat tuo tlat a,
Kei ṭhe thei ruol a ni nawh.
18Ân simhai chun var a suksuok a,
A mithai chu vârṭien var ang el a nih.
19A baua inthawk chun meiser chawklaihai a suok a,
Meisihai chu a vuong suok bawk a.
20A hnârkuoa inthawkin meikhu a suok a,
Thil suongna bêl le hlobuk kâng ang elin.
21A thuok chun meilinghai chu a mûtchawk a,
A baua inthawk chun meichawk a suok a.
22A rînga chun hrâtna a um a,
A hmaa chun ṭiumna chu a lâm a.
23A tisa hlawmhai chu ân zawm khâwm tlat a,
A chunga chun ân nghat tlat a,sukchâng ruol an ni nawh.
24A lung chu lung anga ngar a na,
Anih, bu râwtna lung hnuoihnung ang elin.
25Ama chu a hung tho pha chun, mi hrâthai chu an ṭih a:
Ṭitna leiin anni chu an inhâwrkhâwm a.
26Miin kâwlhnâmin sât sien khawm sât pawp naw nih,
Annawleh, fei khawmin, thal khawmin, hmawlzum khawmin sun pawp naw nih.
27Thîr chu bupâwl angin a ngai a,
Dârsen chu thing hmawn angin.
28Thalhai chun ama chu a suktlân thei nawh a,
Saihlumhai khawm chu ama kuoma chun pâwlbul ang a nih.
29Hmawlzumhai khawm chu pâwlbul ang chaua ngai a na,
Fei inlap zawk zawkhai khawm chu a nuisan a.
30A hnuoihrût tieng chu bekawihâr ngei ang an na,
Dûm chirdiek chu buchilna hrizâwl angin a hrût cham duoi a;
31Li inthûk chu bêl angin ân phultir a,
Tuisuoriet chu thilhnâk angin a siem hlak.
32A hnunga chun a fêna lampui chu a sukhuom vâr a,
Li inthûk chu mi chun hmul vâr amani a sâwn rau khawpin.
33Hnuoi chunga hin ama ang an um nawh a,
Ṭitna nei loa siem chu.
34Thil insâng tinrêng chu a hmuh a,
Chapona naupahai po po chunga lal a nih,” tiin.
Currently Selected:
JOB 41: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
