JEREMIA 4
4
1“Aw Israel, i hung kîr chun, LALPA Pathien chun a tih: ka kuomah i hung kîr ding a nih; i tirdakumnahai chu ka mithmua inthawka i sie hmang chun nang chu sukchângin um naw ti nih;
2chuongchun, nang chun, ‘LALPA chu a hring zing angin, thudikah, rorêlnaah, felnaah, hnamhai chu amaa chun engthâwl an ta, amaa chun chawimawiin um an tih,’ tiin ṭawng inkhâm i ta.”
3Jerusalema le Juda rama mihai kuoma chun, LALPA chun hieng hin a ti sih a: In hnuoi inlet lo chu suknawi unla, hling lai chun chi thlâk naw ro.
4LALPA kuoma chun ser intan unla, in lungril ser chu tan ro, nangni Jerusalema mihai le, Juda rama mi- hai; chuong naw chun ka lunginsenna chu mei angin fe suok a ta, i thilthaw- hai rîtlona lei chun; tukhawm iṭhel ruol loin kâng a tih.
Juda rûn dinga inṭhiin a um
5Juda rama chun hrilfie unla, Jerusalema chun phuong ro, “Rama chun tawtawrâwt chu mût unla, khêk inring unla, hieng hin ti ro: Hung inkhâwm tâwl unla, khawpui kul- neiahai chun fêng ei tiu,” tiin.
6Zion tienga chun puonzâr chu khai unla, himna dingin tlânhmang unla, muong naw ro; hmar tienga inthawkin thil ṭha naw sietna nasa- tak chu ka hung intlungtir ding a ni sih a.
7Sakeibaknei chu a chîmbuka in- thawk chun a hung suok tah a, hnam- hai sukbohmangtu ding chu; a lam- puia chun a thang mêk a, a hmuna inthawk chun a suok tah a, i ram chu râusana siem ding le, i khawpuihai khawm hluotuhai um loa sukse dingin.
8Hi hi lei hin saiip puon dierkei unla, sûn unla, ṭap inrûm ro; LALPA lunginsenna ṭium chu einia inthawk- in a hnungkîr si nawh a.
9Chuong nia chun LALPA chun a tih: Lal lungril chu bohmang a ta, rorêltuhai le thiempuhai lungril chun maktîng a tih; zâwlneihai khawma maktîng an tih.
10Chun, kei chun, “E, Lalpa PATHIEN! Hi hnam le Jerusalem hi i lo hlêm let dêr a ni hi, ‘Muongna nei in tih,’ tiin i lo hril a, kâwlhnâm hlak chun hringna ngei a sun ta lem si hi,” ka tih a.
11Chu huna chun chu hnam le Jerusalem kuoma chun, “Thlalêra bâwlhmunhaia inthawkin ka mihai naunuhai tienga chun thli lum tak, mûtdeina ding ni si lo, sukfai ding khawm ni lo;
12thli hrâttak hienga inthawk hin ka kuomah hung a tih; tuta an chungthu rêla hriltu khawm hi kei ka nih,” ti nîng a tih.
13Ngai ta, ama chu sûmhai angin a tungin hung a ta, a sakawr tawlai- lîrhai chu thlivir ang nîng an tih, a sakawrhai khawm chu mupuihai nêkin an hrât lem a nih. Ei chung a va rik de! suksietin ei um sih a.
14Aw Jerusalem, sandama i um theina dingin i khawhlonaa inthawk chun i lungril chu sâwpfai rawh. I ngaituona rilohai hi ieng chen am i lungrila chun a châm ding a na?
15Dana inthawk chun râwl chun a hung hrilfieh a, Ephraim muolhaia inthawk chun thil suol a hung phuongdar a;
16hnamhai kuoma chun hrilna nei rawh; ngai ta, Jerusalem chunga chun phuong la, vêngtuhai chu ram hlataka inthawkin an hung a, Juda khawpuihai chu demin an râwlhai an insuo a nih.
17Lo vêngtuhai ang elin, a vêlin an umnghah a; keia chungah a lo hel ta leiin, LALPA chun a tih.
18I thilthawhai le i lampui chun hieng thilhai hi ân neitir che a ni hi; hi hi i khawhlona chu a nih: khâk khawm a kha sih a; i lung chen a tlung ta sih a.
19Ka phîng, ka phîng! ka lungah a na; ka lung chu a to ṭawk ṭawk naw tawp a; ka to ṭawk ṭawk thei nawh; indona inṭhi lâwkna tawtawrâwt ri chu, aw ka thla, i lo hriet ta leiin.
20Bohmangna chungah bohmang- na a tlung a; ram pumpui chu suksiet a ni ta sih a, chawmkhat kârin ka puon inhai chu suksiet an na, mit- khap kâr loin ka puonzârhai khawm chu.
21Ieng chen am puonzâr chu ka hmuin, tawtawrâwt ri chu ka hriet zing ding a na?
22“Ka mihai an invêt a, an mi hriet si nawh a; naupang invêttak ang, hrietthiemna hrim khawm an nei naw, thil ṭha naw thaw dingin an var a, thil ṭha thaw ding ruok chun hrietna an nei nawh.”
23Leihnuoi chu ka en leh, ngai ta, a ruok le a sie a na; vânhai khawm chun varna an nei nawh a.
24Tlânghai chu ka en leh, ngai ta, an inthin a, muolhai po po khawm chu hnungtieng hmatieng an in- sâwi a.
25Ka hei en a, chun, ngai ta, mihriem hrim hrim an um nawh a, chunglêng vatehai khawm chu an tlân hmang tah a.
26Ka hei en a, ngai ta, ram rahlâwktakhai khawm chu thlalêr a lo ni tah a, chutaka khawpuihai po po chu LALPA hmaihmaa le, a lungin- senna ṭiumtak hmaa chun a lo chim tâwl tah a.
27LALPA chun hieng hin a ti sih a, “Ram pumpui chu râusan nîng a ta, a tâwp ruok chu intlungtir naw ning.
28Hi hi lei hin leihnuoi chun sûn a ta, chun, chunga vânhai inthim a tih; ka hril ta leiin, ka tum tlat tah a; kân sîr bawk nawh a; chutaka inthawk lamlêt bawk naw ning.”
29Khawpui sûng po po chu sakawr chung chuong mihai le, thal kâp mihai ria chun an tlânseh a; chîm- bukahai chun an feh a, râwlkhoahai chun an lâwn a; khawpui tinhai chu mâksanin a um a, mi hrim an chêng ta nawh a.
30Chun, nang suksieta um, ieng am thâwng i ta? Sen inlârin inthuom la khawm, rângkachak thuomhnaw- haiin inchei la khawm, i mithai khawm chu rawnga nâlin suklien la khawm; nang le nang în sukhmêlṭha thlâwn el nîng a tih; i hmangaihai chun an hnâwl cheh a, i hringna lâk an tum a nih.
31Nuhmei pakhat nauhase nat tuor, a nau lutîr hung suok dinga a na tuor râwl ang chu ka hriet sih a, Zion naunu, thuok insama, a kuthai phara, “Tuhin ka chung a rik de! tuolthattuhai hmaa chun ka thla chu a thidang sih a,” titu râwl chu a nih.
Currently Selected:
JEREMIA 4: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
