JEREMIA 24
24
Theichang ṭha le a ṭha nawa inthawka inchûktirna
1 #
Am 7.1,4; 8.1 Chun, ngai ta, LALPA biekin hmaha sie theichang leikhawr pahni LALPA chun a mîn entir a; Babulon lal Nebukadnezzarin Juda lal Jehoiakim naupa Jekonia le Juda rama lalhai le, mi themthiemhai le, thîrsuhai chu Jerusalema inthawka salah a ṭhuoi a, Babulona a hung ṭhuoi tâwl hnung khan. 2Leikhâwr pakhata chun theichang ṭhatak tak el, theichang hmin hmasa ang kha a um a; leikhâwr danga chun theichang setak tak el, fâk thei lo khawpa sie chu a um a.
3Chun, LALPA chun ka kuomah, “Jeremia, ieng am i hmuh a?” a mi ta. Kei chun, “Theichanghai, theichang ṭha, ṭha êm êm le, a ṭha naw, ṭha naw takmeu el, fâk thei lo khawpa sie,” ka tih a.
4Chun, LALPA thu chu ka kuom- ah a hung tlung a.
5“LALPA Israel Pathien chun hieng hin a tih: An ṭhatna dinga, Juda sal intâng, hi hmuna inthawka Kaldai rama ka tirhai chu hi thei- chang ṭhahai ang hin ngai ka ta.
6An ṭhatna dingin an chungah ka mit inlên ka ta; chuongchun, hi rama ma hin hung ṭhuoi nâwk ka tih; chun, anni chu tungding ka ta, keihnuoi naw ningah; anni chu phun ka ta, phawi naw ningah.
7An kuoma chun, LALPA ka nih ti mi hre dingin lungril pêng ka ta; chuongchun, ka mihai nîng an ta, kei khawm an Pathien nîng ka tih; an lungril po po leh ka kuomah an hung kîr nâwk ding a ni sih a.
8Chun, theichang ṭha nawhai, fâk thei lo khawp hiela siehai ang chun, Juda ram lal Zedekia le, a lalhai le, Jerusalema la mahlahai, hi rama la chênghai le chun, Aigupta rama chênghai po po le chun nghatsan ka tih, LALPA chun a tih;
9anni chu thil ṭha nawa hnung- tieng hmatienga sukṭita um dingin hnuoia lalram po pohai lai chun pe suok ka tih; ṭawngsekawk le, thuvara le hrânghla le inkhâmna ni dingin, anni ka hnawt suokna ding hmun po poahai chun pe suok ka tih.
10Chun, anni le an thlatuhai kuoma ram ka pêka inthawka an rênga an bohmang vawng hmakhat chun an hnunga chun kâwlhnâm dâm, hripui dâm, ṭâm dâm tir bawk ka tih,” tiin.
Currently Selected:
JEREMIA 24: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
