ISAI 66
66
Lalpa rorêlnahai le Zion hung phuiinsuina ding chu
1LALPA chun hieng ang hin a tih, “Vân ka ṭhungpha a na, hnuoi ka ke innghatna a nih; in ieng ang am in mi bâwlpêk ding a na? Khâwlai hmun am a na ka châwlna ding chu?
2 #
Mt 5.34; Tt 7.49-50 Hieng thil iengkim hi ka kutin ka siem a ni sih a, chuongchun, hieng thil iengkim hi a hung um tah a nih, LALPAIN a tih; amiruokchu, hi mi rimsitaka um, lungrila insîr ngawi ngawi, ka thua inthin hlaktu tieng hi en lem ka tih.
3Bâwngchal thattu chu mihriem thattu ang a na; berâmtea inthâwitu chu ui rîng suktliektu ang a nih; thilpêk inhlântu chu vawk thisen inhlântu ang a nih; beraw rawtu chu milim malsâwmtu ang a nih, anih, anni lampui chu an thlang tah a, an thil tirdakumahai chun an lungril a lâwm hlak.
4Ka ko lai khan tukhawma an mi dawn nawh a, thu ka hril lai khan nain an hriet nawh a, ka mithmua thil suol chu an thaw lem a, ka thil lâwm naw zâwng chu an thlang leiin kei khawmin anni hlêmna ding chu thlangpêk ka ta, an ṭi zâwnghai chu an chungah intlungtir ka tih,” tiin.
5 #
2 Thes 1.10; Tit 2.13 A thua inthin hlakhai, LALPA thu hi hre ro, “In unau, nangni thei- datu le ka hming leia nangni hnawt suoktuhai cheu chun, ‘In lâwmna kan hmu theina dingin LALPA chu sukro- puiin um raw se,’ an tih a, nisienla- khawm, inzak lem tâng an tih.
6 #
Tp 16.1,7 Ngai ro, khawpuia sa mur mur ri chu! biek ina ri a ni chu! a hmêlmahai thungtu LALPA ri a ni chu!
7Ama chun invawi hman loin nau a nei a; na hre hman loin naupasal a nei a.
8Chuong ang chu tuin am a hriet hlak a? Chuong ang chu tuin am a hmu hlak a? Ni khatah ram a pieng thut dîm a nih? Vawilekhatah hnam a pieng thut dîm a nih? Zion chun nauhase ân vawi phing chun nau chu a nei el ta sih a.
9Pieng hun intlungtir siin kân nei- tir naw ding a ni? LALPAIN a tih; kei inneitir hlaktu hin nau kân neitir phal naw ding am a nih? i Pathienin a tih.
10“Jerusalem hmangaitu po po- hai, Jerusalem chu hlimpui unla, lâwmpui ro; ama sûntu po pohai, lâwm leiin hlimpui ro;
11in nêk, a thlamuongna nêneahai chun in tlai theina ding le, in nêk daa, a ropuina tamtaka chun in lâwm theina dingin,” ti hi.
12LALPA chun hieng ang hin a ti sih a, “Ngai ta u, inremna chu va- dungpui ang elin a kuom chenin inluongtir ka ta, hnam tin ropuina chu vadungtê a kuong liem dûl dûl angin a kuom tlungin inluongtir bawk ka tih, chuongchun, chu chu nêng in tih; hmathlâk a ti cheu a, a khûp chunga chun inchâwmtir a ti cheu.
13Mi, a nuin a thlamuon angin thlamuon ka ti cheu a, chuongchun, Jerusalema chun thlamuonin in um ding a nih.
14Chun, chu chu hmûng in ta, in lungril chu hlim a ta, in ruhai khawm hlohna hring dup angin inno hlut hlut a tih; chuongchun, LALPA kut chu a siehlawhai tieng a um ti hrieng an ta, a hmêlmahai chunga chun lungni naw ni. 15Ngai ta u, a lunginsenna chu hrîkthla ding le, a kâwkna chu mei- chawkhaia hrîkthla dingin, LALPA chu mei leh a hung ding a ni sih a, a tawlailîrhai chu thlivir ang el nîng a tih.
16Meiin a nih LALPAIN a ngaituo ding chu, a kâwlhnâmin a nih mi po po a ngaituo ding chu; chuongchun, LALPA isukhlumhai chu tamtak nîng an tih.
17Huonahai chun an feh a, a laia mi hnunga um nghien dinga insuk- thieng le insukfai hlakhai, vawk sa le thil tirdakum le mazu fa chu bohmang tâwl an tih; LALPAIN a tih.
18An thilthawhai le an ngaituohai chu ka hriet sih a; hnam tinrêng le ṭawng tinrêng ka ṭhuoi khâwm hun a la hung tlung ding a nih; chuongchun, hung an ta, ka ropuina hmûng an tih.
19Chun, anni lai chun inchikna inumtir ka ta, chuongchun, anni laia hremna khêltuhai taphawt chu hnam tin kuomah--Tarsis dâm, Pul dâm, thalngul kuoihai Lud kuoma dâm, Tubal le Javan mihai dâm, thlierkâr hlatak, ka hminginthang la hre ngai lo a ka ropuina la hmu ngai lohai kuoma chun -- tir ka tih; chuongchun, hnam tin lai chun ka ropuina thu hril an tih.
20 #
Rom 15.16 Israel thlahaiin an thilinhlân chu bûrlebêl inthiengtaka LALPA ina an hung lâklût hlak ang hin, LALPA kuoma thil inhlân dingin hnam tin laia inthawka in unauhai po po chu sakawr chunga dâm, tawlailîra dâm, zâwnnaa dâm, sabengtung lien chi chunga dâm, sanghâwngsei chunga dâm, Jerusalem ka tlâng inthienga chun hung ṭhuoi an tih; LALPAIN a tih.
21Chun, chuong laia mihai khawm chu thiempu ding dâmin, Levi mihai ding dâmin lâng ka tih, LALPAIN a tih.
22 #
2 Pet 3.13; Is 65.17; Tp 12.1 Vân tharhai le hnuoi thar ka la siem ding chu ka hmaa a um zing angin, in thlahai le in hming chu a um zing bawk ding a nih, LALPAIN a tih.
23Chun, hieng hi hung nîng a ta, thla thara inthawka thla thar dang chenin, châwlnia inthawka châwlni dang chenin mi po po ka hmaa chibai mi bûk dingin hung zut zut an tih, LALPAIN a tih.
24 #
Mk 9.48
Chun, fe suok hlak an ta, keia chunga bawsetuhai ruok chu en an tih, an ngêhai chu a thiin, an mei chu sukhlumin a um ding a ni si nawh a, mi po po ta dingin thil tirdakumtak nîng a tih”.
Currently Selected:
ISAI 66: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
