ISAI 48
48
Thil thar chanchin hrillâwkna
1Aw Jakob sûng, Israel hming inṭâwmpuia, Juda tuihaia inthawk suok a, thutakah ni si loa, felnaa khawm ni bawk si lo, LALPA hming sâla ṭawng inkhâma, Israelhai Pathien hming lam hlaktuhai, hi hi lo ngai ro.
2(Khawpui inthienga mi an inti si hlak a, Israelhai Pathien chungah ringna an innghat bawk a nih; a hming chu sipaihai LALPA a nih).
3Kha hma thilhai chu tiena tlângah ka lo hril tah a, anih, ka baua inthawkin a suok a, kân hriettir a; kârloin ka muolsuo thut a, a hung tlung tah a.
4Mi kâwmaw in na, in rîng chu thîr tha a na, in chal chu dâr a ni ka hriet leiin,
5tienlaia inthawkin in kuomah ka hril a, a hung tlung hma khawma in kuomah kân hriettir cheu kha; chuong naw chun, “Ka milim chun a ti a nih, ka milim siem fâwm le ka milim sung chun thu a pêk a nih,” ti rawi in tih.
6In hriet de kha; hieng po po hi en ro; nangnîn in hril ding a ni lem ta naw am a nih? Tuta chen chu thil thar inhriettir tâng ka ti cheu, thil inthup in hriet ngai nawhai chu.
7Chuong chun inhmaa siem ni loin, tuta siem a nih; vawisûn ni hma khan chu in na khawma in hriet ngai nawh; chuong naw chun, “Ngai ta, chuong chu kan hriet zing annâwm,” ti rawi in tih.
8Anih, in nain in hriet ngai nawh a; anih, in lungrilin in hriet ngai bawk nawh; anih, inhma hrim hrim khan in na chu hawngin a um ngai nawh; vervêktak takin in thaw hlak ti le, sula inthawk hrimin bawsetuhai an ti hlak cheu ka hriet sih a.
9Ka sukbohmang nawna ding cheuin, ka hming leiin ka lunginsen chu khêk hrîng ka ta, inpâk ka hlawna dingin in chungah insûm ka tih.
10Ngai ta u, ka sukthieng cheu a na, nisienlakhawm, tangka suk- thieng ang chun a ni nawh; rinumna raw tuina meia chun ka fie cheu a nih.
11Keima le keima leiin, anih, keima le keima lei ngawtin a nih ka thaw ding chu; ka hming hi ieng dingin am suksietin um a ta? Ka ropuina hi mi dang kuomah pe naw ning ah.
Lalpain Israel intlan a tih
12 #
Is 44.6; Tp 1.17; 2.8; 22.13 Aw Jakobhai le ka ko Israelhai, ka thu hi ngai ro; kei hi ama chu ka nih; a hmasa tak chu ka na, a nu- hnung tak khawm ka nih.
13Anih, ka kut hin leihnuoi innghatsan chu a phûm a, ka kut changtieng hin vânhai khi a keiphar a; ka ko phingleh an ngîr khâwm hlak.
14Nangni rawi po pohai, inkhâwm unla, ngai ro; anni lai chun tuin am hieng thil hi a hril hlak a? LALPA chun ama chu a hmangai a, ama chun Babulon chunga chun a dit zâwng thâwng a ta, a bân chu Kaldaihai chungah inletin um a tih.
15Kei, keima ngei hin thu ka hril tah a; anih, ama chu ka ko a, ka ṭhuoi a, a lampui chu suktluong pei ka tih.
16Nangnirawi hin mi hung hnai unla, lo ngai ro; a tira inthawk khan arûkin thu ka hril ngai nawh a; a um tîr laia inthawk khan chutaka chun ka um a; tuhin LALPA Pathien chun keima le a thlarau chu a mi tir tah a.
17LALPA, nangni intlantu, Israel- hai Mi Inthieng chun hieng ang hin a tih, “Kei hi LALPA in Pathien, in ṭhatna dinga nangni inchûktirtu, in fena lampuia ṭhuoitu ding cheu chu ka nih.
18Aw nangni hin ka thupêkhai chu lo ngai chu ni unla chu aw! In chungah inremna chu vadung ang ela umin, in felna chu tuisuoriet fâwnhai ang elin a um ding bah;
19in thlahai khawm ṭieu phaiphin zâta umin, in rîla rahai khawm ṭieu pilvut mal tê tê zât rauin an um ding bah: an hming chu ka hmaa inthawka thaihmangin um naw nih a, sukbo- hmangin um bawk naw ni,” tiin.
20Babulona inthawkin suok unla, Kaldaihai chu tlân hmangsan ro, hi hi hla sak riin inhriettir unla, hril unla kâwlkawdawng chen khawma sukri ro, “LALPA chun a siehlaw Jakobhai chu ân tlan tah,” ti ro.
21Thlalêrahai chun a ṭhuoi lai khan an dang a châr nawh a; lung- puia inthawk chun an ta dingin tuihai ân luong suoktir a; lungpui chu a sukkawi a, chuongchun, tuihai chu a hung suok ta zur zur a.
22LALPA chun, “Mi rilohai ta ding chun muongna hrim hrim a um nawh,” a tih.
Currently Selected:
ISAI 48: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
