ISAI 44
44
Lalpa chau chu Pathien a nih
1“Tu ruok hin chu aw Jakobhai ka siehlawhai, aw Israelhai ka ithlanghai, ngai ro khai;
2LALPA nangni siemtu, sula in- thawka nangni inngîrtu, nangni ṭhangpuitu ding chun hieng ang hin a tih, ‘Aw Jakobhai ka siehlawhai, nangni Jesurun ka ithlanghai, ṭi naw ro,’
3Dangchâr chunga chun tui ka hung buok ding a ni sih a, hnuoi ṭâwlahai chun tuiluonghai chu ka hung buok bawk ding a nih; in thlahai chungah ka thlarau buok ka ta, in nauhai chungah ka malsâwmna buok bawk ka tih:
4chuongchun, anni chu tuiluong- na kâwla phahrâm mâwng ang hin, hlohna lai chun mâwng an ta.
5Mi pakhatin LALPA ta ka nih tîng a ta, mi dangin Jakob hming inbûk a ta; mi dangin a kutah, LALPA ta tiha ziekin, Israel hming chu a chi hmingah hmang a tih,” tiin.
6 #
Is 48.12; Tp 1.17; 2.8; 22.13 LALPA Israelhai Lal, an intlantu sipaihai LALPA chun hieng ang hin a tih, “Kei a hmasa tak chu ka na, a nuhnung tak khawm ka nih; keima naw chu Pathien hrim hrim an um nawh.
7Tienlaia mihai ka siem china inthawk tah keima thaw angin tuin am ko a ta, tuin am chuong chu hril a ta? Tlung dinghai le la hung um dinghai chu hril raw se.
8Inlau naw unla, ṭi bawk naw ro, inhma khan in kuomah ka hrilin kân hriettir ta cheu a ni naw am a nih? Chuongchun, nangni hi a mi hriet- puituhai in nih. Keima naw hi Pathien dang hrim hrim an um am? Lungpui hrim hrim a um nawh, pakhat khawm a um ka hriet nawh,” tiin.
Milim biek indik nawna
9Milim siem fâwm siemtuhai chu an rêngin boruok el an na; an thil dit zâwnghai ienga ṭhahnem ni naw ni hai; an muolphona ding hrim hrimin anni hrietpuituhai khawmin an hmu thei nawh a, an hriet thei bawk nawh.
10Tuin am pathien chu ân ngîr chai leh? Annawleh, tuin am ienga ṭhahnem chuong lo milim siem fâwm a sung hrim leh?
11Ngai ta, a pâwlpuihai po po chu muolpho an tih; sinthaw mihai khawm mihriem laia mi an nih; an rêngin inkhâwm vawng hai sienla, ngîr raw se; ṭîng an ta, muolpho tâwl an tih.
12Thîrsuin hreipui a sut hlak a, meihawla chun a thun lût a, tubau- haiin a sut a, a bân hrâttak chun a sut hlak, anih, a phîng a hung ṭâm a, a tha chu a hung zawi hlak; tui hrim hrim a dâwn nawh a, a châu hlak.
13Thingrem siemtuin hrui a kei- mar a, pensilin a riruong a, thing- nâwtnahaiin a sukruol a, inkhina hmangin a riruong a, mihriem ruongâmin ân ngîr a, ina um dingin mihriem mawina angin ân ngîr hlak a.
14Sidar thinghai a ta dingin a phûr a, sething le thingsaisuo a lâk a, ramhnuoi thing laia pakhat chu a puola um dingin a sukdet a, fâr kûng a phun a, ruotuiin a châwm hlak.
15Chu hnunga chun mi ta dinga meia ti ding ni tâng a tih; chutaka mi chu a lâk a, ân suklum hlak, anih, meiah a sêm a, bei a em hlak; anih, pathien a siem a, a biek hlak; chu thing chu milim siem fâwmah a siem a, chu chu bawkkhupin chibai a bûk hlak.
16Chu thing chu aṭhen chu meiah a tih a, aṭhen chu sa fâkna dingin a hmang a; sa a rawh a, a tlai hlak; anih, mei lum a awi a, “Chei, ka lum tah, mei hmêl ka hmu ta le!” a tih a.
17A mahla chu pathienah a siem a, a siem fâwm milim ngeia chun; chu chu bawkkhupa chibai bûkin a biek a, a kuomah a ṭawngṭai a, “Mi sanhim rawh, ka pathien i ni sih a,” a ti hlak.
18An hriet nawh a, an ngaituo bawk nawh; ama chun an hmu thei nawna dingin ân sîmtir ta sih a; an hrietthiem nawna dingin an lungril khawm a khârpêk tah a.
19Tukhawma an hriet suok nâwk nawh a, “Ṭhenkhat chu meiah ka ti sih a; anih; a aia khawm bei ka em nghe ngheh a; sa khawm ka rawh a, ka fâk sih a, a mahla chu thil tirdakumah ka siem ding am a nih? Thinga mi bawkkhupin chibai ka bûk ding am a nih? ti dingin annia chun hrietna le hrietthiemna a um bawk nawh.
20Vut chau a fâk hlak a; a lungril hlêma um chun, a hringna ân sanhim thei nawna ding le, ‘Ka kut chang- tieng hin khêl a um naw am a nih?’ a ti thei nawna dingin ama chu ân pêttir tah.
Lalpa Israel intlantu chu
21Aw Jakobhai, chuong thilhai chu hre zing ro, Israelhai, hre zing bawk ro; ka siehlawhai in ni sih a; keiin kân ngîr cheu a; ka siehlawhai in nih; aw Israelhai, ka theinghilin um naw ti niu.
22In bawsietnahai chu sûm sâmup sukboin ka sukbo tah a, in suolhai chu sûm sukbo angin ka sukbo ta bawk a; ka kuomah hung kîr nâwk ro, kân tlan ta si cheu a.
23 #
Jer 51.48; Tp 12.12; 18.20 Aw vânhai, hlimtakin hla sak ro, LALPAIN chu chu a thaw ta sih a; leihnuoi hnuoitienghai, khêk ro, tlânghai, aw ramhnuoi le a sûnga thing um tinrênghai, hla sak suok phut ro: LALPA chun Jakobhai chu ân tlan tah a, Israelhaia chun ân chawimawi ding a ni sih a.
24LALPA, nangni intlantu, sula inthawka nangni inngîrtu cheu chun hieng hin a tih, “Kei hi LALPA, thil po po siemtu, mâni chaua vân keiphar- tu, hnuoi suklientu chu ka nih; tu am ka kuomah a um a?
25Kei hi khêlhliphai inchiknahai chu teploa siem a, aisânthiemhai in- vêta siemtu, mi varhai innghat kîrtir a, an hrietna invêtthlâka siemtu,
26mâni siehlaw thu sukdet a, mâni palaihai remruot sukmuol- suotu, Jerusalem chungchâng thua, ‘Chutaka chun mi um nâwk an tih,’ titu le, Juda ram khawpuihai chung- châng thua, ‘Siemin um nâwk tâwl an ta, a sietna laihai chu siem ṭha nâwk ka tih,’ titu,
27tui inthûktak kuoma, ‘Kang intan rawh, i vadunghai khawm ka sukkang ding a nih,’ titu,
28Kura chungchâng thua, ‘Ama chu ka berâm vêngtu a nih, Jeru- salem chungchâng thua, siemin um nâwk a tih, ti le, Pathien biekin kuoma, I lungphûm chu remin um nâwk a tih, ti hiel khawpin ka dit zâwng po po chu thâwng a tih,’ titu ka nih,” tiin.
Currently Selected:
ISAI 44: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
