ISAI 27
27
Israelhai sansuokna le ṭhuoi khâwmna
1Chu nia chun LALPA chun a kâwlhnâm ngei ṭhatak, lien- tak, ringumtak chun leviathan rûlpui hrâttak le leviathan rûlpui kâwi ngul chu hrem a ta, tuipuia dragon um chu that bawk a tih.
2Chu nia chun, “Uoin grêp huon pakhat chu, chu chu chawimawiin hla sak ro.
3Kei LALPA hi a vêngtu ka nih; mitkhapkâr tinin tui buok ka ta, tukhawma an tâwk nawna dingin a sûn a zânin vêng ka tih.
4Keimaa hin lunginsenna a um nawh ie; buor le hlohlingneihai chun mi doin mi hung thaw hrim hai sien aw! anni chu thaw dingin fêng ka ta, hmun khatah ka raw hlut hlut ding bah.
5An naw vêk leh, keima le inremna dingin ka hrâtna hi chel raw se; anih, mîn rempui ro.”
6Hun la hung tlung dinga chun Jakobhai chun zung kei an ta; Israelhai chu kumûmin pâr an tih; chuongchun, hnuoi chung hi rain suksip an tih.
7Ama vawtuhai a vuok ang takin ama chu a vuok vêm a nih? annawleh, ama thathai that ang takin ama chu thatin a um vêm a nih?
8 #
Jer 24; 1 Kor 10.13 Ama chu în fe hmangtir laiin a hun charin ama chu i sêl a; khawsak thli hrâng ni chun ân thli natak chun ama chu a lên sawn tah a.
9Chuleiin, hi hin Jakobhai rîtlona chu sâwpfai nîng a ta, hi hi an suol fe hmangpuina ra ruok a nih; Aserahai le nisa limhai chu tho nâwk ta lo ding khawpin mâichâm lung po po chu tlak lung suknawi rem rum ang elin an siem hi.
10Khuo kulpui nei chu a khaw- sâwt a, umna, mi hnungsawn le fesan hnung a ni ta sih a, thlalêr ang elin; chutaka chun bâwngtê tlâng a ta, chutaka bawk chun bawk a ta, a kauhai chu fâng a tih.
11A kauhai chu a vuoi pha chun thliekin um a ta, nuhmeihai hung an ta, raw el an tih; hriet theina hrim hrim nei naw mihai an ni sih a; chuleiin, anni siemtu chun anni chu lunginsiet naw nih a, anni inngîrtu chun anni chu a ditin ditsak hrim hrim bawk naw nih.
12Chu nia chun LALPA chun Vadung a kuong sipa luong dûl dûla inthawkin, Aigupta vadungtê chenin a ra vaw thlâng a ta; chuongchun, aw Israel thlahai, a khât khâta rûtin um in tih.
13 #
Mt 24.31; 1 Kor 15.52 Chu nia chun tawtawrâwt lientak mût an ta; chuongchun, Assuria rama bohmang vâng vânghai le, Aigupta rama hnawtdawka umhai chu hung an ta; Jerusalem khuoa tlâng inthienga chun, LALPA chu chibai bûk an tih.
Currently Selected:
ISAI 27: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
