FESUOKNA 6

1LALPA ruok chun Mosie kuomah, “Tuhin Pharao kuoma ka thil thaw ding chu hmûng i tih: kut thahrâtin anni chu a rama inthawkin khal suok a ta, kut thahrâtin anni chu ân suoktir ding a ni sih a,” a ta.

Mosie ko nâwka a um thu

2 # Sm 68.4; Jn 8.58; Tp 1.4 Chun, Pathienin Mosie kuomah thu a hril a, “LALPA ka nih.

3Abraham kuoma dâm, Isak kuoma dâm, Jakob kuoma dâm Pathien Iengkimthawthei#El shaddai angin kân lâr hlak a, nisienlakhawm, ka hming LALPA ang hin an kuomah inhriettir ka ni ngai nawh.

4Khuolchâm anga an umna ram, Kanaan ram chu anni pe dingin an kuomah thuthlung ka siem bawk a.

5Chu naw khawm chu, Aigupta mihaiin suoka an inumtir Israel thlahai inrûm ri chu ka hriet a; ka thuthlung chu ka hriet zing a.

6Chuleiin, Israel thlahai kuomah hril la, ‘LALPA ka nih a, Aigupta mihai rikphurhai hnuoia inthawkin la suok ka ti cheu a, an suok in nina chu sukbopêk ka ti cheu a, bân pharin rorêlna nasatak leh intlan suok ka ti cheu.

7Ka mihai ni dingin lâng ka ti cheu a, in ta dingin Pathien ni bawk ka tih; chun, Aigupta mihai rik- phurna hnuoia inthawka la suoktu cheu, in Pathien LALPA ka nih ti hre tâng in tih.

8Abraham, Isak le Jakob kuoma pe dinga ka bân ka pharna hlak rama chun ṭhuoi lût ka ti cheu a; chu ram chu ro dingin pêng ka ti cheu: LALPA ka ni hi,’” tiin.

9Chuong thu chu Mosien mipuihai kuomah a hril a; an lungril inrimna lei le an suok intângnaa an rimsik êm lei khan, Mosie thuhril chu an ngaisak nawh.

10Chun LALPA chun Mosie a biek a,

11“Va fe la, Aigupta ram lal Pharao chun Israel thlahai chu a rama inthawkin insuoktir raw se va ti rawh,” tiin.

12Mosie chun LALPA kuomah, “Ngai ta, Israel thlahai chun ka thu an ngai si nawh a, iengtin am Pharao chun kei hmûr themthiemlotak#Heb sertanlo hmûr. Ziek Ṭhena chun sertanlo hmûr ti a nih thu hi ngai a ti leh?” a tih a.

13Nisienlakhawm, LALPA chun Mosie le Aron chu a biek a, Aigupta rama inthawka Israel thlahai chu hung ṭhuoi suok dingin, Aigupta lal Pharao le Israel thlahai chungah anni chu mawphurna a pêk tah a.

Mosie le Aron thla suina

14 # Gen 46.8-11; Nam 26.5-14 Hieng hi an pahnam tin luhai chu an nih: Israel nau lutîr Reuben naupasalhai chu: Hanok, Pallu, Hezron le Karmi: hieng hi Reuben sûngkuohai chu an nih.

15Simeon naupasalhai chu: Jemuel, Jamin, Ohad, Jakin, Johar le Saul, Kanaan nuhmei le an naupasal le chun: hieng hi Simeon sûngkuohai chu an nih.

16 # Nam 3.15-20; 26.57-58; 1 Chr 6.1,16-19 Levi naupasalhai hming chu an thlatuhai chanchin suina ang peiin hieng ang hi a nih: Gerson, Kohath le Merari hi; chun Levi dam sûng kumhai chu kum za khat le sawm- thum pasari a nih.

17An sûngkuo ang peia Gerson naupasalhai chu Libni le Simei.

18Kohath naupasalhai chu Amram, Izhar, Hebron le Uzziel. Kohath dam sûng kumhai chu kum zakhat le sawmthum pathum a nih.

19Merari naupasalhai chu Mahli le Musi. Hieng hi an inthla dân suina ang peia Levi mi sûngkuohai chu an nih.

20Amram hin a pa farnu Jokebed chu nuhmeiin a nei a; ama chun Aron le Mosie a neipêk a. Amram dam sûng kumhai chu kum za khat le sawmthum pasari a nih.

21Izhar naupasalhai chu: Kora, Nepheg le Zikri.

22Uzziel naupasalhai chu: Misael le Elzaphan le Sithri.

23Aron chun Amminadab naunu, Nason farnu, Eliseba chu nuhmeiin a nei a; ama chun Nadab, Abihu, Eleazar le Ithamar a neipêk a.

24Kora naupasalhai chu Assir, Elkana le, Abiasaph; hieng hi Kora sûngkuohai chu an nih.

25Aron naupa Eleazar chun Putiel naunuhmei pakhat chu nuhmeiin a nei a, ama chun Phinehas a neipêk a. An sûngkuohai ang peiin, hieng hi Levi mihai pahnam#Pahnam hi a Hebraia a umzie tak chu hnam (clan) ti el nêka lien lem a nih. Ch.25a khawm tin luhai chu an nih.

26Hieng hi an nih Mosie le Aron kuoma LALPAIN, “Israel thlahai chu Aigupta rama inthawkin an pâwl ruol ang peiin hung ṭhuoi suok ro,” a tihai chu.

27Hi Aron le hi Mosie hi an nih Aigupta lal Pharao kuoma Israel thlahai Aiguptaa inthawka ṭhuoi suok dinga hriltuhai chu.

Mosie le Aron kuoma Pathien thupêk

28Aigupta rama LALPAIN Mosie kuoma thu a hril ni chun,

29LALPAIN Mosie kuomah, “Kei LALPA chu ka nih; i kuoma thu ka hril po po hi Aigupta lal Pharao kuomah hril rawh,” tiin, a hril tah a.

30Mosie chun LALPA kuomah, “Ngai ta, kei chu hmûr themthiem- lotak ka nih a, Pharao chun iengtin am ka thu ngai a ti leh?” a tih a.

Currently Selected:

FESUOKNA 6: HMARCLBSI

Highlight

Copy