FESUOKNA 13
13
Nau lutîr inhlân thiengna
1Chun LALPA chun Mosie kuomah a hril a,
2 #
Lk 2.23
“Israel thlahai laia nau lutîr sul hung kêu taphawt, mihriem khawm, ran khawm ka kuomah hung inhlân vawng rawh: ka ta a nih,” tiin.
Chawlṭhanglo Bei
3Mosie chun mipui kuoma chun, “Suoka in umna Aiguptaa inthawk in hung suok ni kha hre zing ro: LALPAIN kut thahrâtin chu hmuna inthawk chu a hung ṭhuoi suok cheu a ni kha; chawl ṭhang bei hrim fâk a ni ding a ni nawh.
4Abib thla, hi ni hin in fe suok a ni hi.
5LALPAIN Kanaan mihai, Hit mihai, Amor mihai, Hiv mihai le Jebus mihai ram, in thlatuhai kuoma pêk ding cheua a itiem, khuoizu le nênetuia luong rama a ṭhuoi lût pha cheu chun hi thlaa bawk hin hi rawngbâwlna hunbi hi in hmang ding a nih.
6Ni sari sûng chawl ṭhanglo bei fâng in ta, a ni sari ni chun LALPA kuomah ruoi ṭhêng in tih.
7Ni sari sûng chu chawl ṭhang- lo bei fâk ding a nih a; chun, in kuoma hrim hrim chawl ṭhang bei hmu a ni ding a ni nawh a, in ram sûng po po le nangni kuoma khawm chawl hrim hrim hmu a ni ding a ni nawh.
8Chu ni chun i naupa kuomah, ‘Aiguptaa inthawka ka hung suok laia LALPA thil mi thawpêk ta leia thaw a nih,’ tiin hril i tih.
9Chun, LALPA Dân chu i baua a um theina dingin, i mithai kâra hriet zingna ding le, i kuthai chunga nangma ta dinga inchikna dingin nîng a tih; LALPA chun kut thahrâtin Aiguptaa inthawkin a ṭhuoi suok ta si cheh a.
10Chuleiin, kum tinin hi hi a hun peiah dân angin i hmang ding a nih.”
Nau lutir le ran pieng hmasa takhai
11Chun i thlatuhai le nanga kuoma a tiem ta anga Kanaan mihai ramah LALPAIN a ṭhuoi lût cheh a, ram chu a pêk pha che chun,
12sul hung keu hmasa tak taphawt chu LALPA ta bîk dingin sie tum i tih. I ran nei tê hmasa tak po po a chal taphawt chu LALPA ta nîng a tih.
13Sabengtung tê hmasa tak chu berâmtein intlan i tih; în tlan naw ding chun a rîng chu her bawng i tih. I naupasalhai lai khawm nau lutîr po po chu intlan i tih.
14Chun, nakie hun la hung tlung dinga khawm i naupain, Hi hi a umzie ieng am a na? tiha ân dawn che chun, a kuomah hieng hin hril i tih, “Suoka umna ram Aiguptaa inthawk LALPAIN kut thahrâtin a mi ṭhuoi suok tah a.
15Pharao chun lulul suoin mîn suoktir naw ṭâl sien khawm, LALPA chun Aigupta rama nau lutîr po po: mihriem le ran tê a pieng hmasa tak po po chu a sukhlum ta vawng a. Chuleiin, sul hung kêutu hmasa tak a chal taphawt chu LALPA kuomah kân hlân a, ka naupasalhai nau lutîr taphawt ruok chu ân tlanin kân tlan a nih.
16Chun, i mithai kâra thilkhim ding le i kut chunga inchikna dingin nîng a tih; LALPA chun kut thahrât chun Aigupta rama inthawkin a ṭhuoi suok ta si cheh a, tiin,” a tih a.
Sûm ngîr le mei ngîr
17Pharaoin mipui chu ân suoktir phing chun, Pathienin, “An fenaa hin indona an va hmu pha mipui chu insîr an ta, Aiguptaa chun kîr nâwk rawi an tih,” a ti leiin a lam chu hnai sien khawm Philistin mihai ram fe thlengna lam tieng chun Pathienin anni chu a ṭhuoi nawh a.
18Tuipui sen tieng, thlalêr tienga lam inhêl zâwng chun mipui chu Pathienin a ṭhuoi ta lem a, Israel thlahai chu râlthuom kim leh Aigupta rama inthawk chun an suok tah a.
19 #
Gen 50.25 Mosie chun Josef ruhai chu a chawi pei a, Israel thlahai chu, “Pathienin hung kan ngei ngei a ti cheu a, chun in fena taphawtah ka ru khawm sawm pei in tih,” tiin a lo tiem ta hrim a.
20Sukkotha inthawkin an fe suok a, thlalêr sîr Ethama chun bûk an khuor tah a.
21Zâna le sûna khawm an fe theina dingin, LALPA chu sûnah sûm ngîrin an hma ṭhuoi dingin le zânah mei ngîrin anni var pe dingin, an hmaah a fe pei a;
22sûna sûm ngîr le zâna mei ngîr chu mipui hmaha inthawk chun ân kieng ngai hrim hrim nawh a.
Currently Selected:
FESUOKNA 13: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
