ROM 5
5
1Cucaah zumhnâk thawngin thiamcoter kan si caah, ka Bawipa Jesuh Krih thawngin Pathian he remnâk kan ngei. 2amah thawng lila in atu i kan dirnâk, hi zângfahnâk ah hin, zumhnâk in kan lut i lawmhnâk he Pathian sunparnâk kan i ruahchan. 3Culawng hmanh si loin, kan harnâk zongah kan i lawm. Harnâk nih inkhawhnâk a chuahter ti kha kan hngalh; 4cun inkhawhnâk nih ziaza, ziaza nih ruahchannâk a chuahter. 5Cun ruahchannâk nih kan lung a donghter bal lo, zeicatiah kan sinah a kan pêkmi Thiang Thlarau thawngin Pathian dawtnâk cu kan lungthin chungah toih a si cang. 6Zeitintiah ṭhawnnâk ngei loin kan um ko lioah, cu cân theng te ah Krih cu Pathian-zeirellotu kan caah a thi. 7Zeitintiah miding ca i thih-ngamhmi an har lai nain miṭha ca i thih ngamh cu an um kho men. 8Asinain Pathian nih a dawtnâk cu kan sinah hitihin a langhter. Misual kan si ko rih lioah Krih cu kan caah a thi. 9Culawng hmanh si loin, a thisen i thiamcoter kan si hnu ah, Amah thawngin thinhunnâk chungin khamh kan si lai. 10Zeitintiah ral kan si lio hmanhah a Fapa thihnâk thawngin Pathian he kan i remṭhân ahcun, atu kan i remṭhân hnu ah a nunnâk ruangah khamh kan si chin chin lai. 11Culawng a si lo, atu Amah thawngin remṭhannâk kan co hnu ah kan Bawipa Jesuh Krih thawngin Pathian zongah kan i lawm. 12Cucaah mi pakhat ruangah sual vawlei ah a luh bantukin, sual ruangah thihnâk a lut. Cun mi vialte an sual dih bangin mi vialte sinah thihnâk a phân. 13(Zeitintiah nawlbia um hlanah vawlei ah sualnâk a um cang; nawlbia a um lo ahcun sual cu sualah ruah a si lai lo). 14Asinain Adam thawkin Moses tiangah Adam nawlbuar bantukin sualnâk a tuah lomi hna cung zongah thihnâk nih a uk dih hna, Adam cu Ara laimi hmanthlâk a si. 15Asinain thilpêk le sualnâk hi â lo lo. Zeitintiah mi pakhat sual ruang hmanh i mi tampi an thih ahcun, Pathian zângfahnâk le mi pakhat, Jesuh Krih zângfahnâk thawng i thilpêk cu mi tampi cungah tam chin chin in a um lai. 16Cun mipa sualnâk nih a chuahpimi le thilpêk cu â lo lo. Zeitintiah mi pakhat sualnâk nih thiamlo-coternâk biaceihnâk a chuahter, asinain sualnâk tampi ruangah man loin pêkmi thil nih thiamcoternâk a chuahter. 17Zeitintiah mi pakhat sual ruang hmanhah thihnâk nih a uk a si ahcun, a tlingmi zângfahnâk le dinnâk thilpêk a comi hna nih mi pakhat, Jesuh Krih thawngin nunnâk nih a uk chin chin hna lai. 18Cucaah mi pakhat sual ruangah thiamlocoternâk biaceihnâk cu mi vialte cungah a um bantukin, mi pakhat dinnâk tuahmi thawngin zungzal nunnâk ngeih awkah thiamcoternâk laksawng man loin pêkmi cu mi vialte cungah a um ve. 19Zeitintiah mi pakhat nawl ngaihlo ruangah mi tampi cu misual ah an i cang, cubantukin mi pakhat nawl ngaihnâk thawngin mi tampi cu miding ah an i cang lai. 20Cu hlei ah, nawlbia a um tikah sualnâk a tam chin. Asinain sualnâk a tam pauh le zângfahnâk a tam chinchin ve, 21cuticun sualnâk nih thihnâk in a uk bangin, zângfahnâk nih dinnâk in kan Bawipa Jesuh Krih thawngin zungzal nunnâk tiangin a uk khawh.
Currently Selected:
ROM 5: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
