ROM 2
2
1Cucaah maw minung, midang biaceihtu na si zongah, sawnhtarhnâk na ngei lo, zeitintiah midang bia na ceihnâk ah nangmah le nangmah bia â ceihmi na si, zeitintiah nang midang biaceihtu nangmah zong nih cubantuk thil kha na tuah ve ko. 2Pathian nih cubantuk thil a tuahmi hna cung i bia a ceihmi cu biatak ningin a si ti kha kan hngalh. 3Maw minung, cubantuk thil a tuahtu hna biaceihtu, nangmah zong nih cubantuk na tuah ve tikah, Pathian biaceihnâk in na luat kho lai maw? 4Asiloah, Pathian ṭhatning hngalhnâk nih ngaihchihnâk ah an hruai khawh ti kha hngal loin, Pathian ṭhatnâk, lungsaunâk, a in khawhnâk kha na zomhtaih lai maw? 5Na luhlul le na lungkhawnning rupin thinhunnâk ni le Pathian biaceihnâk fel a ra laimi caah thinhunnâk nâ khon luaimai mi a si. 6Amah nih “Mikip an tuahning cio in a pêk ṭhân te hna lai.” 7Ṭhatnâk a tuah lengmang i sunparnâk le upatnâk le thihkhawhlonâk kawltu sinah zungzal nunnâk a pêk lai, 8asinain mah zawn lawng ruatin biatak zul duh loin dinlonâk a zultu hna sinah thinhunnâk le thinhannâk, 9harnâk le ngaihchiatnâk kha sualnâk a tuahtu hna thlarau cungah a um lai. Judah mi thlarau cungah a um hmasa lai i Grik mi thlarau cung zongah a um lai. 10Asinain ṭhatnâk a tuahtu hna cungah sunparnâk le upatnâk le daihnâk kha pêk an si lai. Judah mi sinah pêk hmasat a si lai i Grik mi sin zongah pêk a si lai. 11Pathian ah thleidannâk a um lo. 12Zeitintiah nawlbia loin sualnâk a tuahtu pauh cu nawlbia loin a lotlau lai, nawlbia in sualnâk a tuahtu pauh cu nawlbia in ceih an si lai. 13(Zeitintiah nawlbia hngaltu men hi Pathian hmaiah miding an si lo. Nawlbia ningin a tuahtu kha thiamcoter an si lai. 14Zeitintiah nawlbia a ngei lomi Gentel hna nih, nawlbia nih a tinhmi kha anmah lung chuakin an tuah tikah, nawlbia an ngei lo nain, anmah caah nawlbia cu an i ser ve ko. 15an lungthin chungah nawlbia cu ṭial a si kha an tuahsernâk nih a langhter, an chiaṭha hngalhnâk nih a hngalhpi hna, a cân ah thiamlo an i coter i a cân ah thiam an i coter tawn), 16thawngṭha ka chimmi ningin Pathian nih minung hna biathli cu Jesuh Krih in a ceih te lai. 17Nang cu Judah ti na si taktak, nawlbia nâ bochan i Pathian ah nâ porhlaw, 18A duhnâk na hngalh i nawlbia ah cawnpiak na si ruangah thilṭha taktak cu na pompi. 19Cuticun mitcaw hna caah hruaitu, muinâk i a ummi hna caah ceunâk, 20mihrut hna chimhringtu, ngakchia hna caah cawnpiaktu, nawlbia ning i fimnâk le biatak umtuning ngeitu ah nâ ruah. 21Cucaah nang, midang cawnpiaktu, nangmah ta nâ cawnpiak bal lo maw? Nang fir lo ding i cawnpiaktu nih na fir maw? 22Nang, ‘ṭangdang kai hlah’ titu nih ṭangdang na kai maw? Nang milem a fihtu nih, ṭempal thil kha na fir maw? 23nang nawlbia â porhlawt pitu, nawlbia buarin Pathian min na chiatter maw? 24An rak ṭial bantukin “Pathian min cu nanmah ruangah Gentel mi hna lakah thangchiat in a um.” 25Nawlbia na zulh ahcun cuarpartan cu san a tlai ko, nawlbia buartu na si ahcun na cuarpar tan cu tanlo bantuk a si. 26Cucaah cuarpar tan lomi nih nawlbia a zulh ahcun cuarpartanlo cu tanmi bangin ruah a si lai lo maw? 27Cun taksa leiin cuarpar tan lomi nih nawlbia a zulh dih ahcun, ca chung bia le cuarpartan phung le a ṭialnâk ca ngei ko nain a buartu cu bia an ceih lai lo maw? 28Zeitintiah lenglei men i Judah mi si cu Judah mi taktak an si lo i lenglei men i cuarpartan cu cuarpartan taktak an si lo; 29chunglei i Judah mi a simi cu Judah mi taktak a si; cun cuarpartan cu ca chung bia si loin, Thlarau in Lungthin ah a si, cuhna cu minung sinin thangṭhat an co lo nain Pathian sin tuin thangṭhat an co.
Currently Selected:
ROM 2: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
