ROM 16
16
1Kan farnu Fibi Kenkhria khua kawhhran rianṭuantu hi 2mithiangmi hna cung i an tuah tawn bantukin Bawipa min i nan rak cohlan nâkhnga le bomh a herhnâk pauh ah nan rak bomh awkah nawl kan pêk hna, zeitintiah amah zong hi mi tampi bawmtu tak tak a rak si cang i keimah ca zong ah a si. 3Prisila le Akuila Krih Jesuh i ka ṭuanpi hawi, 4ka nunnâk khamhnâk dingah an hngawng â donhmi hna hi, anmah sin lawngah si loin Gentel kawhhran hna sin zongah lawmhnâk bia ka chim. 5Cuhleiah an innah â pummi kawhhran kha an kut ka tlaih hna i ka dawtmi Epenetas, Asia ram i Krih ah theitlai hmasa bik kha a kut ka tlaih. 6Mary ka caah rian tampi a ṭuntu kha a kut ka tlaih. 7Ka phun hawi Andronikas le Junias ka thong tlakpi hawi kha an kut ka tlaih hna, annih cu lamkaltu hna lakah min thang ngaimi an si i keimah hlan in Krih ah a um hmasami zong an si. 8Amplias Bawipa i ka dawtmi kha a kut ka tlaih. 9Krih i kan rianṭuan hawi Urbanas le ka dawtmi Stakhis kha an kut ka tlaih hna. 10Krih i cohlan awktlâk, Apelles kha a kut ka tlaih. Aristubulas chungkhar hna kha an kut ka tlaih hna. 11Ka phunhawi Herodion kha a kut ka tlaih. Narkissas chungkhar lak i Bawipa ah a ummi kha an kut ka tlaih hna. 12Trifana le Trifosa Bawipa caah ba ngaiin rian a ṭuanmi kha an kut ka tlaih hna. 13Bawipa thimmi Rufas le a nu, ka nu zong a simi kha an kut ka tlaih hna. 14Asyncritus, Flegon, Hermas, Patrabas, Hermes le a sin i a ummi unau hna he an kut ka tlaih hna. 15Filogas le Julia, Nereus le a farnu le, Olimpas le a sin i mithiang ummi vialte he an kut ka tlaih hna. 16A thiangmi hnamh nâkin nan kut i tlai u. Krih kawhhran vialte hna nih nan kut an in tlaih hna. 17Ule nau hna nan cawnmi biatak si loin cawnpiaknâk dang a cawnpiak i i ṭhennâk le tlukrilhnâk a phâktertu cu ralring ngaiin hnulei chit dingah kan nawl hna. 18Zeitintiah cubantuk mi hna nih kan Bawipa Jesuh Krih rian an ṭuan lo i an paw ca i rianṭuantu an si, cun an dangnal le biachim thiam nâkin santlailo lungthin an hlen tawn hna. 19Zeitintiah nawl nan ngaihning kha mi vialte sinah a thang dih. Cucaah nan cungah kâ lawm. Asinain ṭhatnâk lei ah nan fimthiam i sualnâk lei ah mitluangtlam nan si ka duh. 20Cun daihnâk Pathian nih Satan cu nan ke tangah a khuai zau lai. Kan Bawipa Jesuh Krih zângfahnâk cu nan sinah um ko seh. Amen. 21Kan rianṭuan hawi Timote le, ka phunhawi Lusias, Joson le Sosipater hna nih nan kut an in tlaih hna. 22Keimah, Tertius hi ca a ṭialtu nih Bawipa ah nan kut kan tlaih hna. 23Keimah le kawhhran vialte tlunnâk Gaias nih nan kut an tlaih hna. 24Kan Bawipa Jesuh Krih zângfahnâk cu nan dihlak cungah um ko seh. Amen. 25Ka Thawngṭha le Jesuh Krih chimmi bang i an fehter khotu hna, Amah sinah vawlei serka in biathli â thupmi phuan a si bangin, 26cu biathli atu i phuan a simi le mi phunkip theih awkah Cathiang nih a rak chimmi, zungzal Pathian nawlpêk bangin, zumhnâk kha an zumh nâkhnga- 27A fimmi Pathian sin lawnglawng ah Jesuh Krih thawngin zungzal in sunparnâk um ko seh. Amen.
Currently Selected:
ROM 16: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
