ROM 11
11
1Pathian nih a mi le a hlawt hna maw? hei ti ning law. Hlaw naisai hlah. Zeitintiah keimah zong hi Israel mi, Abraham tefa, Benjamin miphun ka si. 2Pathian nih a hngalh chungmi a mi le kha a hlaw hna lo. Elijah nih Israel mi hna kong i Pathian sinah nawlnâk a tuahning, Cathiang nih a chimmi hi nan hngal lo maw? 3“Bawipa, na profet hna an thah i na biakṭheng hna an chimh. Keimah lawng ka tâng i kei zong thah anka timh,” tiah a rak chimmi kha. 4Asinain Pathian nih a sinah zeitindah a leh? “Baal hmai ah khuk bil in a kun bal lomi 7000 Keimah caah kâ chiah ko hna,” tiah a ti. 5Cubantukin atu chan zongah zângfahnâk thawngin thimmi hna cu a tângmi tlawmte an si. 6Cun zângfahnâk a si ahcun, tuahsernâk thawng a si ti lai lo, culoahcun zângfahnâk hi zângfahnâk a si kho lai lo. Tuahsernâk a si ahcun zângfahnâk a si kho hlei lai lo. Culoahcun tuahsernâk zong cu tuahsernâk a si kho hlei lai lo. 7Zeitindah a si kun lai? Israel mi nih an kawlmi cu an hmu lo i thimmi hna nih an hmuh. A dang vialte hna cu an lung a khong dih cang. 8Hitihin ṭial a si. “Pathian nih nihin tiangin an sinah hngilhnâk thlarau a pêk hna i hmuhkhawh lonâk mit le, theihkhawh lonâk hnâ he” 9Cun David nih hitihin a ti. “An cabuai cu an caah rap le foihnâk si sehlaw, tluknâk le lehrulhnâk zong si seh. 10Hmu kho lo dingin an mit mui sehlaw, an kêng cu i kuai zungzal ko seh.” 11An tluknâk cu an rilh thainâk a si maw? hei ti ning law. Si naisai hlah! Asinain anmah hnahchuahter nâkah, an tluknâk thawngin Gentel mi hna sinah khamhnâk a rak phân. 12Cubangin an tluknâk hmanh vawlei rumnâk a si i an sunghnâk hmanh Gentel caah rumnâk a si ahcun an tlamtlinnâk nih cun a rumter chinchin hna lai. 13Zeitintiah nannih Gentel mi hna sinah ka chim. Gentel mi hna caah lamkaltu ka si caah, ka rian hi biapi ngai ah ka ruah, 14hi thil ruangah hin zeiti tal khin ka phunhawi hna hnah ka chuahter i mi cheukhat khamh an si khawh nâkhnga. 15Zeitintiah anmah hlawtnâk hmanh vawlei he remṭhannâk a si ahcun, anmah cohlan `hannâk cu thihnâk in nunnâk ti ko lo cu zeidah a si lai? 16Zeitintiah theitlai hmasa bik a thian ahcun, a dang zong an thiang. A hram a thian ahcun a nge zong an thiang. 17Cun Oliv nge cheukhat kha tan piakin nang olive deu kha olive tak takah peh na si i a kung cawmtu a hram zong nâ hrawm ahcun, 18a nge ralchanh in i porhlaw hlah. Na porhlawt a si ahcun a hram cawmtu na si lo kha philh hlah, a hram tu nih an cawmmi na si. 19Nang nih, a kung i peh ka sikhawh nâkhnga a nge kha tan an si cang lo maw, na ti khawh men. 20A si ko. An zumh lo ruangah tanmi an si, nang tu cu na zumh ruang i pehmi na si. I porhlaw hlah, a ṭih tu ṭih deuh. 21Zeitintiah Pathian nih a nge tak tak hmanh a zuah lo ahcun, nang zong an zuah hlei lai lo. 22Cucaah Pathian ṭhatnâk le ṭih a nunning hi ruat hmanh, a tlumi caah cun ṭih a nung ngai ngai, A ṭhatnâk i na hmunh ahcun, na caah a ṭha. Culoahcun tan na si ve sual lai. 23Cun annih zong zum lo i an um peng lo ahcun, peh an si ṭhân te ko lai. Pathian nih anmah a peh ṭhân khawh ko hna. 24Zeitintiah nang Olive deu tanmi hmanh Olive kungah peh na si ahcun, cu olive taktak nge hna cu olive kungpi ah peh an si chinchin ko lai. 25Ule nau hna, hi biathli hi nan hngalh lo ka duh lo, culoahcun nanmah le nanmah nan i fimter sual lai: Gentel mi hna tlamtlinnâk a phâk hlan pauh cu Israel mi hna cungah lungpinnâk a um rih. 26Cun Israel mi vialte khamh an si te lai, hitihin ṭial a si. Zion in Khamhtu cu a ra lai i Jakop sinin Pathian-zeirellonâk a lakpiak hna lai.” 27Zeitintiah hihi an sin i ka biakam cu a si, an sualnâk ka lakpiak tikah,” 28Thawngṭha lei in ti ahcun nanmah ruangah ral an si i thimnâk lei in ti ah cun hringtu hna ruangah dawtmi an si. 29Zeitintiah Pathian thilpêk le kawhnâk hi lêt khawh a si ti lo. 30Zeitintiah nannih zong Pathian nawl ngailo nan rak si, asinain atu ah annih nawl an ngaihlo ruangah nannih nih zângfahnâk nan hmu. 31Cubantuk ṭhiamṭhiamin atu ah annih zong nawl ngaihlonâkah an um, cucu nan sin i langhtermi zângfahnâk hi an nih zong nih an co khawh ve nâkhnga caah a si. 32Zeitintiah Pathian nih mivialte a zângfah khawh hna nâkhnga nawl ngaihlo nâkah mivialte a khumh dih hna. 33Aw, Pathian fimnâk le hngalhnâk rumning hi a va thûk hringhran dah! A biaceihnâk cu hngalhcawk le, a lam hna cu hmuhkhawh dih a va si lo dah! 34“Ahonihdah Bawipa ruahnâk kha a hngalh? Asiloah ahodah Amah ruahnâk cheutu a si bal? 35Asiloah Amah cham awkah ahonihdah thil an pêk hmasat? 36Amah sin le Amah thawng le Amah caah thil vialte hi an um i Amah sinah sunparnâk cu zungzal in um ko seh. Amen.
Currently Selected:
ROM 11: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
