BIAPHUAN 17
17
1Cuticun vanmi pasarih hrai pasarih â kenmi hna lak i pakhat nih aka chawnh i, “Ra law, ti tampi cungah a ṭhumi a lianngan hlawhhlangnu biaceihnâk cu kan hmuhsak lai, 2vulei siangpahrang hna he nupa sualnâk an tuah, cun leicung i a ummi hna kha a horduhcuainâk misur zu in ritter an si,” tiah a ti. 3Cuticun amah nih ramcar ah Thlarau in aka kalpi. Cun lu pasarih le ki pahra a ngei i Pathian thangchiatnâk min lawng tein a khatmi sen-eu sahrang cungah â citmi nu pakhat kha ka hmuh. 4Cu nu cu sen-eu le senduk in â thuam, sui le lungvar le rili lungvar man sung ngaimi in â ṭamh, a kut in fihnung le thurhnawmhnâk in a khatmi horduhcuainâk hrai â put. 5Cun a cal ah hi min hi â ṭial. A LIANNGANMI BABILON, HLAWHHLANG HNA LE VULEI I FIH A NUNGMI HNA NU BIATHLI, tiin. 6Cu nu cu mithiang hna thisen le Jesuh ca i martar hna thisen in a rît kha ka hmuh. Cun cunu ka hmuh tikah, ka khuaruah a har tuk i ka ar ko. 7Asinain vanmi nih ka sinah, “Zeiruangahdah na khuaruah a har? Hi nu biathli le â citmi sahrang lu pasarih le ki pahra ngeimi biathli kan chimh lai. 8Na hmuhmi sahrang a rak um cang i a um ti lomi kha, taw a ngeilo khor in a rak chuak i lohtlaunâk i a kal hngami a si. Cun vawlei i a ummi vawlei serka in Nunnâk Cauk ah min ṭial lomi hna nih sahrang a rak um cang i a um ti lomi kha an hmuh tikah mak an ti lai. 9“Hika ah hin fimnâk lungthin ngeih a herh: Lu pasarih hna cu minu ṭhutnâk tlâng pasarih an si. 10Siangpahrang pasarih zong an si. Panga hna cu an tlu cang, pakhat cu a um ko rih, cun pakhat cu a um rih lo. Cun a um tikah, cân tawite lawng a si lai. 11Sahrang a rak um cang i a umti lomi zong kha a pariatnâk a si, cun pasarih hna chungin a si i lohtlaunâk ah a kal ve lai. 12Ki pahra na hmuhmi kha siangpahrang pahra hna pennâk a ngei rih lomi kha an si, asinain sahrang he nawlngeihnâk suimilam pakhat chung an ngei lai. 13Lungkhat in an um lai i an nawlngeihnâk le ṭhawnnâk cu sahrang kha an pêk lai. 14Cuhna nih Tuufano kha an doh lai i Tuufano nih a tei hna lai, zeitintiah Amah cu bawi hna Bawi le siangpahrang hna Siangpahrang a si; cun a sinah a ummi hna cu zumhawktlak le thimmi tiah kawh an si lai. 15Cuticun ka sinah, “Hlawhhlangnu ṭhutnâk ti tampi na hmuhmi kha, mizapi, mibu hna le miphun hna le holhphun kip kha an si. 16Cun sahrang cung i na hmuhmi ki pahra hna nih khan hlawhhlang nu kha an huat lai i taklawng le zeihmanhlo ah an canter lai, a sa an ei lai i mei in an khangh lai. 17Zeitintiah Pathian bia a tlin hlan tiang, an pennâk kha sahrang sinah pêk dingin, Pathian nih â tinhmi kha tlinter awkah an lungthin ah ruahnâk pakhat a ngeihter hna. 18Cun minu na hmuhmi kha khua lianngan, vawlei siangpahrang hna cung i uktu kha a si.
Currently Selected:
BIAPHUAN 17: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
