BIAPHUAN 13
13
1Cuticun rili kam these lakah ka dir i sahrang ki pahra le lu pasarih a ngeimi rili chungin a chuah kha ka hmuh. A ki ah bawi luchin pahra le a lu ah Pathian thangchiatnâk min an um. 2Sahrang ka hmuhmi cu keite bantuk a si i a ke cu vom ke bantuk a si, cun a kâ cu chiandeih kâ bantuk a si. Rulpi nih amah thiltikhawhnâk, bawiṭhutdan le nawlngeihnâk nganpi kha a pêk. 3Cun alu pakhat cu thihpi tlâk hliamhmâ a put kha ka hmuh, asinain cu thihpi tlâk hliamhma cu a dam. Cun vulei mi vialte nih mak an ti i an zulh, 4Sahrang sin i nawlngeihnâk petu rulpi le sahrang kha an biak i, “Sahrang bantuk hi a hodah a um? Ahonihdah an doh khawh lai?” tiah an ti. 5Cun thil lianngan le Pathian thangchiatnâk hmurkâ a sinah pêk a si i thla 42 chung cubantuk thil tuah dingah cân pêk a si. 6Cuticun Pathian min le a biakthlâm, van i vanmibu hna le Pathian tiangin a thangchiat cuahmah ko. 7Mithiang hna doh i teinâk tiangin nawlpêk a si. Cun miphun kip le holh phunkip le ramkip cungah nawlngeihnâk zong pêk a si. 8Vulei cung i a ummi vialte, vawlei serka i thahmi Tuufa Nunnâk Cauk i minṭial lomi vialte nih amah cu an biak lai. 9Mizei pauh theihnâk dingah hnâ a ngeih ahcun, thei ko seh. 10Sal ah a hruaitu pauh cu sal ah an um lai; vainam in mi a thattu cu vainam in thah a si ve lai. Hika ah hin mithinghlim hna inkhawhnâk le zumhnâk a lang. 11Cun sahrang dang vulei chungin a rak chuakmi kha ka hmuh, tuuki bantuk ki pahnih a ngei i rulpi holh in a holh. 12Sahrang hmasa deuh nawlngeihnâk vialte kha a mithmuh ah a hman hna. Lei le a chung i a ummi vialte cu sahrang hmasa deuh thihpitlâk hliamhma a ngei i a dam ṭhânmi kha a biakter hna. 13A liannganmi hmelchunhnâk a tuah tawn, cuticun mizapi mithmuh ah van in mei tiangin a tlâkter. 14Cun sahrang hmasa deuh mithmuh ah hmelchunhnâk tuah khawhnâk pek a simi kha vulei cungah a ummi minung hna hlennâk ah hmangin, vainam hliam hma a pu i a dam ṭhânmi sahrang milem kha tuah dingin lei cungah a ummi kha a chimh hna. 15Sahrang milem kha bia a chim khawh nâkhnga le sahrang milem a bia lomi pauh a thah khawh hna nâkhnga a sinah thawchuahter khawhnâk nawl pêk a si. 16Mi vialte a ngan a hme, mi rum, mi sifak, miluat le sal, an orhlei kut ah maw an cal ah maw chinchiahnâk a ngeihter dih hna lai, 17cun sanhrang min le a chinchiahnâk siseh a min nambar a ngeimi dah ti lo nih cun ahohmanhnih zeihmanh an caw in an zuar kho lai lo. 18Hika ah fimnâk a um. Theihthiamnâk a ngeimi nih sahrang nambar cu tuak seh, zeitintiah minung nambar a si: A nambar cu 666 a si.
Currently Selected:
BIAPHUAN 13: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
