SÂM 116
116
1 BAWIPA cu ka dawt; zeicahtiah ka aw le ka nawlnâk kha a ka ngaih piak. 2Keimah lei ah a hna a chit tawn caah, ka nunchung vialte amah cu ka auh lai. 3Thih fahnâk nih anka kulh, seol zawtnâk nih anka tlaih; khuaruahhar vansang in ka um. 4Cutikah BAWIPA min cu au in, “Maw BAWIPA, zângfah nâkin ka nunnâk hi khamh ko sawh,” tiah ka ti. 5BAWIPA cu zângfahtu le dinnâk a si; asi, kan Pathian cu vêl in a khatmi a si. 6BAWIPA nih mi tluangtlam kha a kilven hna, kei tu cu niamter ka si i amah nih aka khamh. 7Maw ka nunnâk, na dinhnâk ah kir ṭhân, zeitintiah BAWIPA nih na cungah ṭha ngaiin a tuah. 8Zeitintiah ka nunnâk hi thihnâk in na khamh i ka mit hi mitthli chungin na khamh, cun ka ke kha tlûknâk chungin na khamh. 9Nunnâk ramah hin BAWIPA hmaiah ka tlongleng lai. 10Ka zumh, cucaah bia ka chim, “Fakpi in hrem ka si.” 11“Mi vialte lihchim an si,” tiah namchan in ka chim. 12Ka cungah thilṭha a tuahmi vialte ruangah, BAWIPA cu zeidah ka pêk ve lai? 13Khamhnâk hrai ka lâk lai i BAWIPA min cu ka auh lai. 14Ka biakammi kha BAWIPA hmaiah ka tlinter hna lai. A mi vialte hna hmaiah. 15BAWIPA hmai i a sunglawi ngaimi cu a mithiang hna thih hi a si. 16Maw BAWIPA, na sal taktak ka si. Na sal, na salnu fapa ka si i ka hrengkhenhmi hna hi ka phoih piak ko. 17Lomhnâk biachim raithawinâk na sinah ka pêkchanh lai i BAWIPA min cu ka auh lai. 18Atu ah ka biakammi cu BAWIPA sin le ami vialte hna hmai zongah ka tlinter lai. 19Maw Jerusalem, na laifangah, BAWIPA biakin tualrawn hrimhrim ah ka tlinter lai. BAWIPA cu thangṭhat u.
Currently Selected:
SÂM 116: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
