PHUNGTHLÛKBIA 12
12
1Nunchimhnâk a tlaichantu nih hngalhnâk a tlaihchan, asinain palhmi remhnâk a huatu cu mihrut a si. 2Miṭha nih BAWIPA duhpiaknâk a hmuh tawn, asinain suahsual â timmi hna nih thiamlo an co lai. 3Suahsualnâk in minung a dir ballo, asinain miding hna hram cu thawnkhawh a si lo. 4Nupi ṭha cu ava caah bawiluchin a si i ningzahnâk a chuahtertu cu ava ruh moih tertu a si. 5Miding ruahnâk hna cu an dik, asinain misuaksual hna remruatnâk cu hlennâk a si. 6Misuaksual hna bia cu, “Thisen chuah awkah bawh hna usih” ti kha a si tawn. Asinain midik hmurkâ nih a khamh hna lai. 7Misuaksual hna cu hlonh an si i an um ti lo, asinain miding chungkhar cu a dir lai. 8Mi an fimning cio in thangṭhat an si, asinain lungthin ngawimi cu zomhtaih a si lai. 9Mah le mah â upat i eiawk a ngeiṭunglomi nak cha cun, ahohmanh i ngaihsan theng ṭung lo i umpi ngeihkhawh khi a ṭha deuh. 10Miding nih a saṭil nunnâk a ruah, asinain misuaksual hna velngeihnâk nêm bik zong puarthau a si. 11Amah lei a thuangtu nih ei awk duhdim a hmuh lai i mahduh bangin a nungmi a zultu hna cu theihthiamnâk a ngei lomi an si. 12Misuaksual nih miṭha lo hna tlaihmi kha a hngar hna, asinain miding hna hram nih theitlai a chuah. 13Misuaksual cu amah nawlbuarnâk nih a foih tawn, asinain miding cu buaibainâk ah a lan tawn. 14Mi nih amah hmurkâ chuak theitlai ṭha in â khimter lai, amah kut chuak theipar cu a sinah pêk a si lai. 15Mihrut nih amah lam kha a dik bikah a ruah, asinain fimchimhnâk biapi i a ruatmi cu mifim a si. 16Mihrut hna thinhunnâk cu hngalh zau a si i ṭha tein khua a ruatmi nih ningzahnâk kha an khuh tawn. 17Biatak a chimmi nih dinnâk a langhter, asinain biahngaltu deu nih hlennâk a langhter. 18Vainam chunh bang i biachim tawnmi an um, asinain mifim bia nih a damter tawn. 19Biatak hmurkâ cu zungzal in fehter a si lai i lihchim lei cu chikkhat te ca a si. 20Ṭhatlonâk a ruattu hna lungthin ah hlennâk a um i daihnâk chimtu hna nih lawmhnâk an ngei. 21Miding cu buainâk nganpi nih a tlunhnawh lai lo, asinain misuaksual cu thil ṭhalo in a khat dih lai. 22Lihhmur hi BAWIPA huatmi a si i dik ngaiin a tuahtu hna cu a lomhmi an si. 23Khuaruah thiammi nih hngalhnâk an thuh, asinain mihrut lungthin nih hruhnâk lawng a phuan tawn. 24Mi taima kut nih a uk lai i thathu mi cu ba cikcek in hranhram in ṭuanter an si lai. 25Lungthin i ruahtukmi ngeihnâk nih mi ngaih a chiatter, asinain biaṭha nih mi a lomhter. 26Misuaksual hna lam nih a pialter khawh hna caah miding nih a hawikawm ding ralring tein a thim awk a si. 27Thathu mi nih kahmi sa rawh ding a ngei lo, asinain teihmâknâk hi minung ngeihmi rosung a si. 28Dinnâk lam ah nunnâk a um i culam ah cun thihnâk a um lo.
Currently Selected:
PHUNGTHLÛKBIA 12: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
