HEBRU 6
6
1Cucaah, Krih kong zumhnâk hramthawknâk hna kha kal takin tlamtlinnâk leiah hmai nawr u sih, a thimi tuahsernâk, i ngaihchihnâk, Pathian lei zumhnâk, 2baptisma zumhnâk, kutchuannâk, mitthi thawhṭhannâk le zungzal biaceihnâk timi hna hram kha bunh ti lo in. 3Pathian nih a sian ahcun cucu kan tuah te ko lai. 4Zeitintiah voikhat ceunâk a hmu cang i van thilpêk a tep cang i Thiang Thlarau co terin, 5Pathian bia ṭha le a ra laimi chan ṭhawnnâk a teh hnu ah, 6an tluk ṭhân ahcun, ngaihchih dingin tharchuah khawh an si ti lo, zeicatiah Pathian Fapa kha an khenhchih ṭhân i mual an photer ṭhân caah a si. 7Ruahnih a surh tawnmi vulei, rianṭuantu hna caah theipar a chuah ahcun Pathian thlauchuah an hmuhmi a si. 8Asinain hling le burbuk a chuah ahcun an mâk i chiatserh a nai cang, a donghnâk ah khangh in a um lai. 9Asinain ka dawt le hna, cubantukin bia chim hmanh ning law, nannih cu cunâkin a ṭha deuhmi khamhnâk he â peh tlaimi thil kha nan tuah lai tiah kan zumh. 10Zeicatiah Pathian hi nan ṭuanmi le Amah minin dawtnâk i nan langhtermi rian le mithiang hna ca i nan rak ṭuan cangmi le nan ṭuan cuahmah mi hna philh ding tiangin mi dinglo a si lo. 11Cun nan i ruahchanmi hi a taktak i a phâk khawh nâkhnga, a dongh tiangin taihmâk chuah in pehzulh u, ti hi kan duh hringhran ko, 12cuticun zumhnâk le lungsaunâk thawngin biakam a co cangmi hna zohchunh in nan tha thu hlah seh. 13Zeitintiah Pathian nih Abraham sinah bia a rak kamh lio ah khan, Amah nâk ngan deuhmi chalh in chiat a serh khawh lo caah, Amah le Amah chalh in, 14“Thlua kan chuah hrimhrim lai, kan karhter hrimhrim lai,” tiah chiat â serh. 15Cuticun lungsau ngaiin a ṭuan hnu ah, kamhmi kha a co. 16Zeicatiah minung hna nih anmahnâk i a ngan deuhmi hna chalh in chiat an i serh tawn, an i elnâk ṭanfung fehternâk le biakhiahnâk ah cubantukin chiat an i serh tawn. 17Cubantukin Pathian nih, roco dingin bia a kamhmi hna sinah a bia â lêt lai lo ti kha fianter chinchin nâkah chiatserh in a fehter ṭhân, 18cucu thlenkhawh lomi thil pahnih: lihchim kholo Pathian a sinâk le, kan hmai i a chiahmi ruahchannâk hmuh awkah le himnâk ca i a zâmmi hna caah a ṭhawngmi hnangamnâk kan ngeih khawhnâk kha an si. 19Hi ruahchannâk hi kan nunnâk caah thir cangai bantukin kan ngei, zumhawk a tlâk i a fekmi a si i puanzar phên i hmunthiang ah khan a lut; 20cuka ah Jesuh, Melkhizeedek Tlângbawi bangin zungzal Tlângbawi Nganbik a simi kha kan ai awh in a rak lut.
Currently Selected:
HEBRU 6: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
