ACT 26
26
1Agrippa nih Paul sinah, “Na kong chimnâk nawl pêk na si,” tiah a ti. Paul nih a kut thlir in a kong cu chim hram a thawk. 2“Siangpahrang Agrippa, nihin ah Judah mi nih sual anka puhnâk vialte ah ka kong na hmai ah ka chim khawh caah kâ lawm. 3Judah phung le kan bia kongah fiangfai tein thil umtuning hngaltu na sinâk zongah a hleiin kâ lawm. Cucaah lung saunâk he rak ka ngaihpiak dingin kan nawl. 4Ka no lio in Jerusalem khua i ka tlawnlen lioah zeibantuk minung dah ka si ti kha Judah mi vialte nih an hngalh. 5Kan biaknâk ah a hleihluat in â zuammi phu ka si zia zong an duh ahcun a hramthawk in an hngalh khawh. 6Pathian nih kan pupa hna sin i bia a rak kamhmi kong i ruahchannâk ka ngeih ruangah biaceihnâk hmun ah ka um. 7Cu biakam cu kan mi hleihnih nih biatak chuah in Pathian rian chun zan hlanin an ṭuannâk thong in hmuh an i ruahchan. Cu thil ruahchannâk ruangah, siangpahrang, Agrippa, Judah mi nih sual an ka puh hi a si. 8Pathian nih mithi a thawhter timi hi zei ruangah dah zumhkhawh lomi ah nan ruah? 9“A ngaingai tiah, keimah hrimhrim nih Nazaret Jesuh min ralchanhin fak piin kâ rak zuam ve. 10Jerusalem zongah cubantuk in ka rak tuah cang, tlângbawi hna sin in nawlpêk ka lak i mi thiang tampi kha thongah ka thlak hna i an thah lioah ka hnatlakpi hna. 11Sinagog kip ah ka serhsat hna i hranhrâm loin (Pathian)cawhdehnâk bia ka chimter tawn hna. An cungah ka hrâng tuk hringhran i ramlêng khuapi zongah ka hrem hna. 12Cubantuk thil tuah dingin tlângbawi hna sinin hnatlakpinâk ca ka lâk i Damaska khua ah ka kal. 13Chun lai ah, maw, siangpahrang, lamthluan ah van in ceu, ni nâk in a ceu deuhmi cu keimah le ka kalpimi hna vêlchûm ah a rung ceu. 14Kan dihlak in lei i kan tluk lioah Hebru holh in, ‘Saul, Saul, zeicadah naka serhsat? Fungzum chuih hi na caah dahkaw a fah, tiah aw ka theih. 15‘Bawipa, ahodah na si? tiah ka ti i Bawipa nih, ‘ na serhsatmi Jesuh ka si. 16Tho law, na ke in dir, zeitintiah hi na hmuh cangmi le kan hmuhsak hngami ca i rianṭuantu ah le hngalhpitu ah, nasin ka langhnâk cu a si. 17Judah mi hna le Gentel hna kut chungin kan khamh lai, an sinah kan thlah, 18muinâk chungin ceunâk lei ah an i mer i Satan nawlngeihnâk mertâk in Pathian lei an hoihkhawh nâkhnga, keimah anka zumhnâk thawngin zumhnâk i thianter cangmi hna lakah ro an co khawh ve nâkhnga,” tiah a ti. 19“Cucaah, Siangpahrang Agrippa, van lei langhnâk cu ka el kho lo, 20cuticun Damaska khua mi hna sinah le Jerusalem khua mi hna sinah ka phuan hmasa bik, cun Judia ram dihlak i mi vialte sinah le, Gentel mi hna sin zongah, an i ngaihchih i Pathian leiah an i mer i ngaihchihnâk he â tlakmi thil hna an tuah nâkhnga ka phuan tawn. 21Curuangah dahkaw, Judah mi nih ṭempal ah anka tlaih i thah anka timhnâk a si cu. 22Asinain Pathian sinin bomhnâk ka hmuh ruangah mi ngan le mi hme hna sinah bia hngalhter in nihin ni tiang ka dir kho i Moses le profet hna nih a ra laimi thil an chimmi hlei in zeihmanh ka chim lo. 23Cucu Krih nih harnâk a intuarnâk ding le, a thimi hna thawhṭhannâk lam hruaitu a si lainâk le, Judah mi le Gentel mi hna sinah cu ceunâk kong phuanchuahnâk ding bia kha a si,” tiah a ti. 24Cubangin a kong a chim dih tikah, Festas nih aw thang ngai in, “Paul, na hrut cang! Na cawn tamtuk nâk nih an hruhter cang!” tiah a ti. 25Paul nih, “Festas ṭhabik, ka hrut lo dah kaw, biatak le fimnâk bia dah kaw ka chim. 26Zeitintiah hi bia zalong ngai in ka chimmi hna hi, siangpahrang zong nih a theih cang, pakhat te hmanh a philh rih lai lo, ti ka hngalh. A chan cu hi thil hi dai kilkar i a tlungmi thil an si lo. 27Siangpahrang, Agrippa, Profet hna bia na zum maw? Na zumh tiah ka hngalh,” tiah a ti. 28Agrippa nih, “Cân toite chungah Kristian ah canter khawh naka zum maw?” tiah a ti. 29Paul nih, “Cân toi, cân sau lei a si lo, nangmah lawng hmanh si loin, nihin ah ka bia a ngaitu vialte hna zong hi keimah bantuk si dingin Pathian sinah ka nawl, cikcin bel hi tel loin,” tiah a ti. 30Cu bia a chim dih in, siangpahrang cu mangki pa le Bernis he an pawng i a ṭhumi hna he an tho i 31a dang tein anmah lawng bia an i ruahnâk ah, “Hi pa nih hin thihnâk le cikcin khihnâk tlak zeihmanh a rak tuah lo,” tiah an ti. 32Agrippa nih Festas sinah, “Hi pa nih Sizar sin phâk rak hal hlah sehlaw chuah diam awk pei a rak si ko hi,” tiah a ti.
Currently Selected:
ACT 26: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
