1 PETER 1
1
1Peter, Jesuh Krih lamkaltu nih, Pontas, Galitia, Kapadosia, Asia le Bithinia ram i â ṭhekmi, 2Jesuh Krih thisen thehnâk pom dingin Thlarau i thiantermi hna le, Pa Pathian hngalh chungmi bangin thimmi hna sinah, zângfahnâk le daihnâk karhter in um ko seh. 3Kan Bawipa Jesuh Krih Pathian le Pa cu thangṭhat in um ko seh, Amah nih a tammi a vêl thawngin thihnâk in Jesuh Krih a thawhṭhânnâk thawngin ruahchannâk nung hmu dingin a kan hrin ṭhân, 4hrawhkhawh a si lomi le thûrter lomi, a ziamkho lomi ro cu nan caah vanah chiahpiak nan si, 5zumhnâk thawngin khamhnâk, cân hmadung i langhter awkah timh ciami cu co dingin Pathian ṭhawnnâk in kilven nan si. 6Cu thil ah nan i lawm ngaingai, atu ah cân tawite chung, tukforhnâk ruangah nan ngaih a chia; 7a taktak a simi nan zumhnâk cu, a rawk khomi sui mei in hniksak cangmi nâkin a sung lawi deuh, cucaah Jesuh Krih a rat tikah thangṭhat le upatnâk le sunparnâk he hmuh nan si khawh nâkhnga, 8Amah cu nan hmu lo nain nan dawt, atu ah nan hmu lo nain Amah cu nan zumh, cucaah nan zumh chan nan thlarau khamhnâk kha nan hmuh caah, 9holh in chim khawh lomi le sunparnâk in a khatmi lawmhnâk in nan i lawm. 10Nan cungah a phânmi zângfahnâk hi profet hna nih an rak chimchung i hi khamhnâk kong hi ṭha tein an rak dothlatmi a si. 11Krih nih a teminnâk ding le, cuhnu ah sunparnâk ahmuh lai ding hna cu, zeibantuk set dah a si lai i zeitik cân set ahdah a si lai tiah an rak kawl lio ah an chung i Krih Thlarau nih a hlan kan in a rak hngalhter cang hna. 12Cuhna nih anmah ca si loin, kanmah ca tu ah rian an rak ṭuan, Van in thlahmi Thiang Thlarau thawngin nan sinah thawngṭha a chimtu hna nih khan cucu an in chimh hna. Cucu vanmi hna hmanh nih hmuh an duhmi cu a si. 13Cucaah a herhmi pauh ṭuan awkah nan ruahnâk cu timhcia in um sehlaw, mah le mah i tei in, Jesuh Krih a langhtikah, nan sinah a run phorh laimi zângfahnâk cungah nan ruahchannâk kha bunh u, 14nawlngaimi fa bangin, hngalh lo ruang i hlanlio pumsa duhnâk nun hlun ah khan um ti lo in, 15an kotu hna a thian bantukin nannih zong nan cawlcanghnâk vialte ah thiang tein um u. 16Zeicatiah “Keimah ka thian bangin, nan nih zong thiang ve u,” tiah ṭial a si. 17Cun thleidannâk um loin mikip tuahning cio i ceihpiaktu kha Pa ah nan i ngeih ahcun, hika i nan câm chung pauh cu Amah ṭihzahnâk he nung u. 18Nan pupa hna sinin nan comi, san tlailo nan nunnâk chungin a rawk khomi sui le ngun men i tlanh nan si lo, 19asinain sawi le mawhchiat awk um lomi tuufa thisen bantuk a sunglawimi Krih thisen in tlanhmi nan si kha nan hngalh. 20Amah cu vawlei serhlan in khaukhih a si cang, asinain hi ni hmadung bik ah hin nanmah caah langhter a si. 21Thihnâk in a thawh tertu le sunparnâk petu Pathian cu nan zumh i nan zumhnâk le ruahchannâk cu Pathian ah a um. 22Unau dawtnâk taktak kha ngei in, Thlarau thawngin biatak zum in, nan thlarau nan thianter cang caah, lungthin thiang te le biatak tein pakhat le pakhat i daw u, 23a rawk khomi thlaici ah si lo in, a nungmi Pathian bia le zungzal in a hmunmi a rawk kho lomi thlaici ah hrinṭhân mi nan si. 24Zeicatiah “Mi vialte hi ram bantuk men an si, An sunparnâk vialte zong ram pangpar bantuk men an si. Ram cu a uai i a par cu a tla. 25Asinain BAWIPA bia cu zungzal in a hmun.” Hihi thawngṭha in nan sinah chimmi bia cu a si.
Currently Selected:
1 PETER 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
