1CO 12
12
1Cubangin ule nau hna, thlaraulei thilpêk kong hi nan hngalh lo ka duh lo. 2Gentel mi nan si lio ah a holh kho hlei lo milem hna nih a hruai lengmang mi nan rak si. 3Cucaah hihi kan theihter hna Pathian Thlarau in bia an chim tikah Jesuh cu chiatserhmi an ti bal lo, cun Thiang Thlarau dah tilo cun ahohmanh nih Jesuh cu Bawi a si an ti kho lo. 4Thilpêk dangdang a um i Thlarau tu cu â khat ko. 5Rianṭuannâk a phunphun a um i Bawipa cu â khat ko. 6Cun rian ṭuanning a phunphun a um, asinain zeizong vialte i rianṭuantu Pathian cu â khat ko. 7Asinain Thlarau hngalhternâk cu mi vialte ṭhatnâk ding caah mikip sinah pêk a si: 8Mi pakhat sinah Thlarau in fimnâk bia pêk a si, midang sinah cu Thlarau ṭhiamṭhiam ah hngalhnâk pêk a si. 9midang sinah cu Thlarau ṭhiamṭhiam ah zumhnâk pêk a si i midang sinah cu Thlarau ṭhiamṭhiam ah damter khawhnâk pêk a si; 10midang sinah khuaruahhar tuahkhawhnâk pêk a si, midang sinah biaphuan khawhnâk pêk a si; midang sinah thlarau dik le dik lo thleidan khawhnâk pêk a si, midang sinah holh phundang dang i biachim khawhnâk pêk a si, midang sinah holh dangdang leh khawhnâk pêk a si. 11Asinain cu vialte cu Thlarau pakhat le â khatmi chungin mikip sinah a duh ningin a ṭuanmi a si. 12Zeitintiah taksa pumkhat ah nge tampi a um, a nge cu tampi asinain, taksa cu pakhat a si, cubangin Krih zong hi a si. 13Zeitintiah Judah siseh, Grik siseh, sal siseh, zalongmi si hna seh Thlarau pakhat i baptisma in ter in kan um dih, cu Thlarau pakhat cu a kan dinter ciomi a si. 14Zeitintiah taksa hi nge pakhat lawng si loin nge tampi a si. 15Ke nih kut ka si lo ruangah pumah kâ tel lo, ti sehlaw, taksa i â tel lomi a si kho hlei lo. 16Cun hnâ nih mit ka si lo ruangah taksa ah kâ tello ti sehlaw, cuthil ruangah taksa i â tellomi a si kho hlei lo. 17Takpum hi mit lawngte siseh law, thawngtheihnâk kha khuazeiahdah a um kun lai? A dih lak in thawngtheihnâk si sehlaw, rim theihnâk cu khuazeiahdah a um kun lai? 18Pathian nih nge vialte cu pum ah hin a duhnâk pauh ah a um termi a si. 19Cuvialte cu nge khat lawng si sehlaw, pum cu khuazeiahdah a um kun lai? 20Nge tampi a um tak tak asinain pum cu pakhat lawng a si. 21Mit nih kut sinah, “zeihmanhah kan herh lo,” a ti kho lo; asiloah lu zong nih ke sinah, “zeihmanhah kan herh lo,” a ti kho hlei lo. 22Ti kho hrimhrim hlah, pum chung i zângdermi nge i a langmi hi santlai ngaimi a si kho ko. 23Cun santlai lo i kan ruahmi nge hna hi biapi ngai i kan ruah awk tu an si. Cucaah kan pum nge â dawh lomi hna nih â dawhmi hnipuan an herh deuh, 24â dawhmi kan pum nge hna cu thomh len an herh ti lo. Pathian nih dawhnâk ngei lo nge hna cu a thomh deuhmi an si, 25pum hi i ṭhen loin nge dangdang hna he pakhat le pakhat an i zohkhenh awk a si. 26Nge pakhat nih a tuarmi cu nge vialte nih an tuarpi ve. Nge pakhat thangṭhat a si ahcun a dang vialte nih an lawmh pi tawn. 27Cubangin nannih hi Krih pum cu nan si i pumpâk cio hi a nge cu nan si. 28Pathian nih a kawhhran ah hi hna hi a chiah hna, pakhatnâk ah, lamkaltu, pahnihnâk ah profet, pathumnâk ah cawnpiaktu, cu hnu ah khuaruahhar tuah kho tu, cuhnu ah damnâk thilpek ngeitu, mi bawm khotu, biaceihthiam mi, holh phun dangdang chim khotu hna an um. 29An dihlak in lamkaltu an si maw? An dihlak in profet an si maw? An dih lakin cawnpiaktu an si maw? An dihlak in khuaruahhar tuahtu an si maw? 30Andihlak in damnâk thilpêk ngei an si dih maw? An dihlakin holh dangdang in an chim maw? An dihlak in holh an let maw? 31Asinain a ṭha tak takmi thilpêk ngeih kha duh ko u. Cun a ṭha bikmi lam kan hmuhsak hna lai.
Currently Selected:
1CO 12: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
