Romekai 7
7
Ɗifni Kristu ɗa aŋ gaini pli edi war gadai par
1Tawalakai, ki siɗi kai ɗi? Mu muɗa na ɗa wiiɗi ɗai n'e siɗi seŋ zi gadai ya ɗa, - gadai ɗa a ŋa spak midini ɗif haa sini mrini ta, ki siɗi ɵa kai ɗi? 2Nɵa lai, muni na gaini tiki ɗaw, t'aŋ gaini niggi sin mofoɗi pin gadai ɗa haa sin mrini ta. Amma na ɓa mofoɗi a mra li ɗa, t'aŋ gaini pli edi sin gadai n'a niggiti sin mofoɗi par. 3Nɵa ɗa, na ɓa karni mofoɗi par te tika wus zamai li, te bunda li aŋ munini ɗif zamai ɗa, e yikiti ɓa te muni zi zawar, amma na ɓa mofoɗi a mra su ɗa, t'aŋ gai pli edi war seŋ zi gadai ɗa par, nɵa ɗa te muni zi zawar kir kai, na ɓa te bunda li aŋ munini ɗif zamai ɗa.
4Nɵa, tawalakaya, tiki lai ki ɗi ka gaini mri sin seŋ zi gadai war sini Kristu, kapai ki zi aŋ wiini ɗif zamai, wiini ni n'a ɵiyasi amai arbaɗi zi mri par, kapai mu wumu ali wiini Alaw. 5Buri ɓa won hlai na mu ɗumusi ka azumai pin dirini neŋ-si ɗa, diri na meefeŋ na wiini a za sda war sumu paŋ pin seŋ zi gadai, a kumu aŋ wa ali wiini mri lai. 6Amma tiyana ɗa, tumu mu ɗumu pin seŋ zi gadai kir kai, buri mu ɗumu gaini niggi, pin wala na mu ɗumusi ka aŋ bagakaini, nɵa ɓa koo mu ɗumu aŋ bagakai tekeɗeɗi, mu ɗumu war zamaŋ na wel na wiini gadai ɗa kir kai, amma mu ɗumu war zamaŋ na hehe na wiini seze.
Sdani gadai
7Aga mu muɗumu a ma ɗa? Seŋ zi gadai a tuwur ɗi? Duk kai zaŋ. Amma mu sɗa ɓa tuwur a na ɗa burini seŋ zi gadai, ɵa kai ɗa mu sɗa fu wala n'e yikiŋ ɓa suuna ɗa kai, na ɓa seŋ zi gadai a muɗa fu ɓa, ku za suuna kai kai ɗa. 8Nɵa tuwur ɗa pin baŋa na gadai a ɵaŋ ɗa, a bla pinzibani suuna paŋ wara, buri ɓa hlai na seŋ zi gadai aŋ warni kai ɗa, tuwur ɗa aŋ gaini mri. 9Ta ɗa a ɗipar won hlai na gadai aŋ kai ɗa, mu na fu kara, amma won hlai na seŋ zi gadai a halasi li ɗa, tuwur a waya a ɵiyasi ka amai ɵiy. 10Ta ɗa mu mra su, nɵa seŋ zi gadai n'a ka sin suŋfa ɗa, a bunda buriya a ka sin mri. 11Buri ɓa tuwur, pin baŋa n'a ɵa ɗa, a wulaŋa edi gaini seŋ zi gadai ɗa, gaini ni a fuɗaŋa edi lai. 12A futini, seŋ zi gadai ɗa a sɗik, seŋ zi gadai n'abai ɗa a sɗik, a jre, a pɗem lai.
13Nɵa ɗa, a bunda buriya aŋ mri na ɗa a pɗem ɗa ɗi? Duk kai zaŋ! Hanɗa a tuwur, na kapai a siŋka sini edi maini hanɗa ɵa ɗa a wa mri wara pini pɗem ɗa, kapai pin seŋ zi gadai ɗa, tuwur a siŋkai edi war spakni zi tuwur ɗa.
Bege na wiini gadaini tuwur
14Buri mu suɗumu ɓa seŋ zi gadai ɗa a wala n'a na sin seze par, amma ta ɗa mu ɗif na war neŋ-si gai wûri edi tin tuwur kai. 15Buri ɓa wala na mu zaŋ ɗa, mu sɗaŋ kai, wala na mu firiyaŋ ɗa a za gaya kai, amma mu za ɗa a na mu firiyaŋ kai ɗa. 16Na ɓa wala na mu zaŋ ɗa a wala na mu firiyaŋ kai ɗa, mu sɗa ɓa seŋ zi gadai ɗa a wala na pɗem. 17Tiyana ɗa, mu za wala hanɗa na ɗa mu ta kai, amma a tuwur n'aŋ wara ɗa.
18Mu sɗa ɵa ya lai, wala na pɗem aŋ wara kai, a dara a muɗa war sa, buri hiini na ɓa mu za wala na pɗem aŋ wuzani ara sme, amma a za gaya kai. 19Pɗem na mu daraŋ ɗa, mu zaŋ kai, amma meefeŋ na mu daraŋ kai ɗa, mu za ɗa a ni ɗa. 20Na ɓa mu za ɗa a wala na ta mu firiyaŋ kai ɗa, mu zaŋ na ɗa mu ta kir kai, amma a tuwur n'aŋ wara ɗa. 21Nɵa gadai na mu navaŋ ɓa: buriya ta na mu dara mu za pɗem ɗa, a cosi wuzani ara ɗa a meefeŋ. 22Buri ɓa gaini wara n'amlai ɗa, mu firiya seŋ zi gadai na wiini Alaw ɗa. 23Amma mu tala war sa paŋ ɗa, gadai zamai a na, n'a hitima gaini seŋ zi gadai n'aŋ war siɗiŋa, a bundaŋa aŋ bege, bege na wiini a gadai na wiini tuwur n'aŋ war sa paŋ ɗa. 24Haw buriya, n'aga a plaŋa edi war si zi mri hanɗa par asiya ɗa? 25Tese sin Alaw war Yesu Kristu, Epiɗ-ɗai na wiimu.
Nɵa ɗa, ta war hiiniŋa, mu bege na wiini gadai na wiini Alaw, amma war neŋ-sa ɗa, mu bege na wiini gadai na wiini tuwur.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964