Romekai 3
3
Ɵinini gat-kai na wiiɗi ɗai
1Nɵa ɗif na Yudiya ɗa a sûwiɗi ɗai na zamai ɗa gaini a ma ɗa? Zaw ɵini-gurgle ɗa pɗemni tiɓ ɗa a ma ɗa? 2Burini suwai ɗa, e suwi ɵa: Seŋ na wiini Alaw a sasi avut ɗa siɗi nagai. 3Na ɓa ɵa maɵa kiɗi? Nɵa na ba zamai e yimi kai ɗa, yimi kai na wiiɗi nagai ɗa, a kiɗa a bunda yimi na war Alaw aŋ wala kadai ɗi? 4Duk kai zaŋ, hanɗa a siŋka edi ɓa: Alaw a jre, ɗif murɗek paŋ ɗa a z'eles, maini n'aŋ gaini ɗû nɵa:
kapai ku siŋka edi aŋ ɗif na jre war seŋku zi miɗi
ku nava rɗi n'amai lai, won hlai n'e kuku wuzaɗi sariya.
5Na ɓa jre-ɗikat-kai na wiimu a siŋka jre-ɗikat na wiini Alaw edi ɗa, mu muɗumu zamai ɗa a ma ɗa? Alaw a jre-ɗikat-kai, won hlai n'a hinasi hiyni mudumu ɗi? Mu muɗaŋ maini na ɗai e miɗiŋ ɵa ɗa. 6Duk kai zaŋ, na ɓa ɵa ɗa, Alaw a siɗa aŋ ɗûklûti sariya midiɗi ɗai na warɗi yai maɵa maɵa ɗa? 7Na ɓa pin eles na wiya ɗa, jre na wiini Alaw a riya wuzani sek buriɗi abaini lai ɗa, ta ɗa e ɗûklûti sariya mada ɓa mu na tuwur katawai ɗa buri ma ɗa? 8Zamai e miisiyi, ɗai nagai ɗa a juva ɓa sariya te ko midiɗi. E piyi seŋ midiyi ɓa mi miɗi ɓa: Zumo meefeŋ, kapai pɗem a halasi pin par. Na ɓa ɵa ɗa tiyi mi zi meefeŋ hanɗa kai buri ma maɗa? 9Nɵa tumu mu suuɗumu na zamai ɗa ɗi? War wazagai paŋ kaalai. Buri ɓa seŋ hanɗa a na burimu paŋ, ɓa: Ɗai gai hlaiɗi, Yudiyakai gaiɗi Grekka paŋ, e ɗa azumai pin tuwur. 10Maini n'aŋ gai ɗû nɵa:
Ɗif na jre aŋ kai, ktai maa aŋ kai;
11ɗif zi yel aŋ kai, ktai n'a paya Alaw aŋ kaalai.
12Nagai paŋ e wûli edi, e sili edi piɗi marɗi kafa.
Ktai n'a za pɗem aŋ kai, ktai maa aŋ kai.
13Gurɗokɗi a waŋ na gaini mili mal, gaiɗi alsiɗi e zi rhai, masnaw na wiiɗi makai aŋ war miɗi.
14Miɗi a va gaini tusa gaini seŋ na ɗewek lai.
15Eziɗi kolek aŋ ma fel edi.
16Hlai n'e vigi li woni ɗaw a na ɗa a ɓilki-n'edi gaini gir.
17Futi zi ɵeɗ e siɗiti kai.
18Hunai ktai na pin Alaw a na wuzani arɗi kaalai.
19Tumu mu suɗumu ya ɓa, wala paŋ na seŋ zi gadai a muɗa midini ɗa, a muɗaŋ na ɗa buriɗi nagai n'e ɗa pini gadai ɗa, kapai miɗi ɗai paŋ a ba, ɗai na warɗi yai gaini abaiɗi paŋ, kapai e siɗi siɗi aŋ ɗai na maafanai wuzani arni Alaw. 20Buri ɓa wuzani arni ɗa, ktai n'aga a za sini edi aŋ jre pini sdani gadai ɗa aŋ kai, buri ɓa gaini seŋ zi gadai ɗa, ɗif a kiɗa aŋ sɗa tuwurni.
Zi n'edi aŋ jre-ɗikat gaini yimi
21Amma tiyana gaini gadai kai ɗa, jre-ɗikat na wiini Alaw, na seŋ zi gadai gaiɗi ɗai na min Alaw e miɗi miɗini ɗa, a siŋkasi edi ya. 22Hanɗa a jre-ɗikat na wiini Alaw pin yimi na war Yesu Kristu, n'a na buriɗi nagai paŋ n'e yimi, buri ɓraw a na arbaɗi ɗai kai. 23Buri ɓa ɗai paŋ e zi tuwur, e kiɗi e gi siɗi abai na wiini Alaw kai. 24Amma e zi edi aŋ jre ɗa kadai, pin yum na wiini kadai, buri pili-n'edi na war Yesu Kristu, 25Ni n'Alaw a varaŋ aŋ wala zi hizi tuwur edi, gaini felni gaini yimi, aŋ siŋka jreni edi, buri ɓa n'a vugasi a ɗipar ɗa, a za gir wiiɗi ɗai pini kai. 26Pin ziyini-seŋ na wiini na gaini hangal, Alaw a firiya a siŋka jreni edi war mefeŋ na tiyana, kapai a siŋkiɗi edi ɓa a na jre, a bunda ni n'a yima war Yesu ɗa aŋ jre- lai. 27Nɵa kûlûni-si na wiimu ɗa aŋ wata ɗa? Aŋ kir kai zaŋ. Pin gadai na wata ɗa? Pin na wiini sɗa ɗi? Zaw kai, amma pin gadai na wiini yimi. 28Buri tumu mu yimumu ɓa, ɗif a za edi aŋ jre-ɗikat ɗa pin yimi, pin sdani gadai kai. 29Zaw Alaw ɗa a Alaw na wiiɗi Yudiyakai kiiɗi ɗi? Ni a Alaw na wiiɗi pinzibaɗi ɗai na zamai ɗa lai kai ɗi? Nkam, a Alaw na wiiɗi pinziba na zamai ɗa lai. 30Na ɓa a jre ɓa Alaw a na ktai ɗa, aga a bindiɗi nagai n'e ɵi gurgle ɗa aŋ jre ɗa pin yimi, a bindiɗi nagai n'e ɵi gurgle kai ɗa pin yimi ɗa lai. 31Nɵa gaini yimi ɗa, mu bundumu gadai ɗa na ɗa aŋ wala kadai ɗi? Duk kai zaŋ! Amma gaini yimi mu suŋkumu edi na ɗa a pɗemni gadai ɗa mal.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964