Markus 1
1
Ɓikini seŋ na wiini Yohana zi Baptisme
Mat. 3.1-16; Luk. 3.1-6; Yoh. 1.19-23
1Pi zi tiki na wiini labar na pɗem na miɗini Yesu Kristu Ahini Alaw. 2Maini n'aŋ gaini ɗû war ɗû na wiini ɗif na mini Alaw Esaya ɗa nɵa:
Mu na ɵinaɗi ɵeŋŋa wuzaku,
kapai a ɓisitiku futiku
3wule a wa edi war basga na kaɗataŋ ɓa:
ziziniti futi na wiini Epiɗ-ɗai
ɗûpi futini n'agogoi cir cir lai.
4Yohana si Baptisme a luɓasi edi warni basga na kaɗataŋ, a ɓaka miɗini baptisme na wiini bindi na gamai, buri ni na wiini tuwur lai. 5Ɗai na Yudiya gaiɗi na Yeruzalem paŋ, e hili edi sini, e nivi baptisme tini par war Yurdan, won hlai n'e siɗi tuwurɗi wuzaɗi ɗai doogo. 6Yohana sapa na sini ɗa a za gaini ayirni ɵigini, santir z'amur wuzani ɓak lai, a suma ɗa ayuwi gaini emelni ami na buza. 7A ɓaka maini nɵa: Ni n'a na halasi asakala par spakni a suwaŋa ta, mu dai dai na mu kiɗa aŋ goɓo azumai aŋ pla sogom na miɗini harabakni edi kai. 8Ta mu siki baptisme gaini yem, Ni ɗa aga a siki baptisme gaini Seze sɗik.
Baptisme na wiini Yesu gaini tanai n'a za sini
Mat. 3.13-17; Luk. 3.21-22; Yoh. 1.29-34
9War mefeŋ ni ɗa, Yesu a halasi a Nazaret war Galileya par, a nava baptisme tini Yohana par agoɗom warni Yurdan. 10Won hlai n'a niyasi agoɗom arni yem par tar, a tala hlai n'amai ɗa a ɓasa, Seze a yorosi amai par miɗini maini dere nɵa. 11Wule a halasi amai par a muɗa: Tuku k'Ahiya zi diri gara, ku vaŋa firiyiŋa amai ku tuku.
Mat. 4.1-11; Luk. 4.1-13
12-13Won hlai ni tizaw, Seze a kaŋ edi war buza, a faana mefeŋ doogo doogo puɗu edi war basga na kaɗataŋ, Satan a tanaŋ. A na fu gaini wazagai n'edi buza, ɗai zi ɵeŋ na war fuŋ-n'Alaw e zini pini.
Yesu a tika pin sdani
Mat. 4.12-17; Luk. 4.14-15; Yoh. 4.13, 43-46
14Asakal na e ɵi Yohana war daŋgai li, Yesu a halasi a Galileya, a ɓaka labar na pɗem na wiini Alaw, 15a muɗa: Hlai a va li, pai n'Alaw, te cosi li, ki bindi, ki yimi pini labar na pɗem.
Mat. 4.18-22; Luk. 5.1-11; Yoh. 1.35-51
16Won hlai n'a vuga wulani yem-ra n'abai na Galileya, a tala Simun gaini Andre e ɗa agoɗom war yem-ra n'abai aŋ ɵi ava, buri nagai e ɗi ɗai zi yimi hilif. 17Yesu a miɗiɗi: Hilisi pa, aga mu bindiki aŋ ɗai zi tûmi ɗai. 18Tizaw tar, e hinisi avaɗi edi, e tipi pini. 19A hala wuzani sek agwi, a nava Yakob n'ahini Zebedewus gaini Yohana na tawalni. E ɗi fu warni hulumɗi ca aŋ zizini avaɗi. 20Won hlai ni tizaw a yikiɗi, e hini Zebedewus n'epiɗi warni hulum n'abai gaiɗi ɗai zi sda, e tipi pini.
Ɗif na gaini ksalai na hihir miɗini
Luk. 4.33-37
21E niyi aha war Kapernahum, war mefeŋ ni Sabbat ɗa e hili amlai warni sinagogne, a tika pini aŋ hitriɗi ɗai. 22E bindi hiyak burini hitri n'a hitriɗi ɗa, buri a hitra maini ɗif n'aŋ gaini spak nɵa, maiɗi ɗai zi ɗû wazagai ɗa nɵa kai. 23Amlai warni sinagogne hanɗa, ɗif na ksalai aŋ miɗini a na fu, a ɗuula a muɗa: 24N'a tupuku gaya ɗa a ma ɗa? Yesu na Nazaret par? Ku halasi ɗa aŋ vidiyi edi ɗi? Ta mu suɗuku edi gaglai. 25Amma Yesu a ɓaraŋ a muɗa: Ba muku, niyasi edi warni ɗif hanɗa par; 26Ksalai a bulaŋ azumai, a gidiyaŋ gdaŋ, a niyasi edi sini par, a ɗuula gaini gdaŋni. 27Ɗai paŋ hunai te yimiɗi, e miɗi arbaɗi marɗi: Wala hanɗa a maɗa? A hitri na hehe, zaw a spak na maɵa? A muɗa sini ksalai, a ɵina pini lai ɗa! 28Tizaw, yikini a wa edi midini afti na Galileya paŋ.
Yesu a zûûliti suwulni Peter
Mat. 8.14-17; Luk. 4.38-41
29Won hlai n'e niyisi warni sinagogne par, gaini Yakob lai, Yohana lai e hili ahani Simun gaini Andre. 30Suwulni Simun te na fu azumai waŋ, siɗi a sawa, tizaw e miɗini wiini Yesu gaiɗi. 31A hala siɗi gobi, a yimiti tiɗi, a siniti amai, siɗi zi sûwi a hiniti, te faka amai te zina piɗi.
32Koskoi, asakal na futi te nawa li ɗa, e kiɗinisi ɗai zi veglek ɗa paŋ sini, gaiɗi na ksalai aŋ midiɗi lai. 33-34Ɗai na war fuŋ n'abai ɗa paŋ e tipisi mini magala paŋ. A zuula pinzibani veglek viya, a birga ksalai midiɗi ɗai par viya lai, a hina ksalai a muɗa kai buri ksalai a sɗaŋ ya.
Yesu a ɓaka seŋ war Galileya
Luk. 4.42-43
35Gorof, won hlai na hlai a na gegeŋ hai, a faka amai a hala edi war baŋa, woni a tika pini aŋ siiwa. 36Simun gaiɗi marni na gaini e hili aŋ piyiŋ. 37Won hlai n'e niviŋ, e miɗini: ɗai paŋ e ɗa piyuku. 38A wiyiɗi seŋ a muɗa: Hulumu warni hlai zamai, war fuŋ na ɵimaɗi ɗa kapai mu ɓaka seŋ woni lai, mu niyasi edi burini sɗa hanɗa.
Mat. 4.23; Luk. 4.44
39A hala midini afti na Galileya paŋ, a ɓaka seŋ warni Sinagogneɗi, a birga ksalai edi lai.
Yesu a zuula ɗif na dugum
Mat. 8.1-4; Luk. 5.12-16
40Ɗif zi dugum ktai a halasi sini, a pa kurnaini azumai, a siiwaŋ a muɗa: Na ɓa ku dara, bundaŋa hilu pla kai ɗi! 41Hiinini-haw a yimaŋ, a wa tini, a tetemaŋ a muɗa: Mu dara, bunda hilu. 42Tizaw, veglek zi dugum a hinaŋ, a bunda hilu. 43-44Yesu a gidini mini gdaŋ a muɗa: Ku za hangal kapai ɗif a ɵina hanɗa muku par kai. Hala, ku siŋka suku arɗi paakai n'abakai zi ɓaka ɗa, za wazagai na Musus a gada midini buri bindiku na hilu ɗa. Hanɗa aga a za aŋ wala zi zaida buriku. 45Amma hlai n'a hala ɗa, a tika pini aŋ ɓaka labar hanɗa edi gaini wulani amai, gaini gdaŋ lai, haa Yesu a bunda a niya aha war fuŋ n'abai papɗak kir kai, a bunda a sumna edi warni hlai na baŋa, e kiɗinisi ɗai zi veglek na war hlai paŋ par sini.
Currently Selected:
Markus 1: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
