Matewus 27
27
E ki Yesu wuzani Pilatus
1Won hlai na dawai par a za li, paakai n'abakai zi ɓaka gaiɗi n'abakai n'arbaɗi ɗai, e kiti miɗi miɗini Yesu kapai e siɗi aŋ fiɗiŋ edi. 2E niggiŋ ɓak, e hili gaini, e kiŋ e siŋ tini Lawan Pontiyus Pilatus.
Mrini Yudas
3Won hlai na Yudas n'a saŋ edi, a tala ɓa sariya te ko miɗini li, hinini a tuura, a wayasi siɗi paakai n'abakai zi ɓaka gaiɗi n'abakai gaini sulai zi arzaŋ na doogo doogo hu ɗa, a muɗa: 4Si na mu sa ɗif na tini war seŋ kai edi ɗa, mu za tuwur. E wiyini seŋ e miɗi: Jaayi maa, hanɗa a seŋku. 5Yudas a poko sulai amlai warni hlai na sɗik, a hala a nagga sini amai.
6Amma paakai n'abakai zi ɓaka e mili sulai ɗa e miɗi: Ki mili sulai hanɗa warni zunduk na wiini tempel ɗa kai, buri hanɗa a sulai zi fel. 7E kiti seŋ arbaɗi marɗi buri e wûri vowai na wiini ɗif zi ɵi grak gaini sulai ni aŋ hlai n'e piɗi ɗai na morkokai woni. 8Buri nɵa, vowai hanɗa e sini yiki ɓa: vowai zi fel, yiki hanɗa a hina sini ɵa haa girna. 9Won hlai ni wala n'a muɗa mini ɗif na mini Alaw Yeremiyas a va amai, e mili sulai zi arzaŋ doogo doogo hu, hanɗa a farai n'aliɗi Izrayel, e kitiŋ aŋ siŋ miɗini ni na e firiyiŋ ta ɗa, 10E siŋ miɗini vowai na wiini ɗif zi rgi grak, maini Epiɗ-ɗai a muɗaŋ ɗa ɵa.
Pilatus a zilba Yesu
Mark. 15.2-5; Luk. 23.2-5, 9-10; Yoh. 18.29-38
11Yesu a ɗiya wuzani Lawan Pilatus, Lawan a zilbaŋ: tuku ku paiɗi Yudiyakai ɗi? 12Yesu a miɗini: ku muɗa na ɗa a ni mal. Amma miɗini seŋ paŋ na paakai n'abakai zi ɓaka gaiɗi n'abakai n'arbaɗi ɗai lai e piŋ miɗini, a waya seŋ kai zaŋ. 13Nɵa Pilatus a miɗini: Ku na ɵina seŋ n'e piŋ muduku na tiɓ ɗi? 14Amma a waya seŋ midini ktai kai zaŋ, haa Lawan ɗa a bunda hiyak gara.
Sariya zi mri te ɗukla midini Yesu
Mark. 15.6-15; Luk. 23.13-23; Yoh. 18.39-40
15Miɗi fet paŋ, pini de ɗa, Lawan a ɵa ɗif zi daŋgai ktai suuwa suuwa, ɗif na ɗai e diri ɓa a ɵiŋɗi ɗa. 16War sarti ni ɗa, ɗifɗi zi daŋgai ktai a na, na ɗai paŋ e siɗiŋ, yikini Barabbas. 17Buri nɵa won hlai n'a tala ɓa, ɗai e tipisi li tap ɗa, a zilbiɗi: Ki firiyi ɓa, mu ɵiki edi ɗa asiya ɗa? Barabbas, zaw Yesu n'e yikiŋ ɓa: Kristu ɗa ɗi? 18Buri a sɗa ya ɓa, e siŋ war tini aŋ sile. 19Won hlai n'a sumna warɗi Paramai zi sariya ɗa, munini te ɵinasi ɗif sini aŋ miɗini ɓa: ku wa suku warni seŋni ɗif na jre-ɗikat hanɗa kai, buri mu faana duvuk na ɗa aŋ gir tini weseŋ zi pɵi. 20Paakai n'abakai zi ɓaka gaiɗi n'abakai n'arbaɗi ɗai, e ziɗi piɗi ɗai buri e zilbi ɓa, a ɵiɗisi ɗa a Barabbas, amma e fiɗi Yesu edi. 21Lawan a tika seŋ a miɗiɗi: arbaɗi ɗai na sulu hanɗa, ki firiyi ɓa, mu ɵiki edi ɗa asiya ɗa? E miɗi: Barabbas. 22Pilatus a miɗiɗi: Aga mu za ɗa a ma ɗa gaini Yesu n'e yikiŋ ɓa Kristu ɗa? Paŋ e miɗi: hinaŋ a toko amai sini luwuŋ zi dagra. 23A muɗa: Buri ma ɗa? A za na meefeŋ ɗa a ma ɗa? Amma e ɗûûli abai a suwa pra: hinaŋ a toko amai sin luwuŋ zi dagra.
Mark. 15.15; Luk. 23.24-25; Yoh. 19.16
24Won hlai na Pilatus a tala haa, aga a za wala ktai kir kai ɗa, dûrgûzi a riya amai sek lai ɗa, a tika yem a ma tini edi wuzani arɗi ɗai paŋ, a muɗa: Seŋŋa warni felni ɗif na jre-ɗikat hanɗa kai. Ki siɗi seŋni ki ɗi tiki. 25Ɗai paŋ e wiyi seŋ e miɗi: felni a zilba tiyi tiyi, tiɗi aliyi lai. Nɵa Pilatus a ɵiɗisi Barabbas edi su, a sa miɗi buri e ɵiɓi Yesu gaini daɓala, a saŋ e tûkûŋ amai sini luwuŋ zi dagra. 26Nɵa Pilatus a ɵiɗisi Barabbas edi su, amma Yesu ɗa a ɵoɗo sini edi gaini daɓala, a siŋɗi aŋ tûkûŋ amai sin luwuŋ zi dagra.
Askarai e zi anya sini Yesu
Mark. 15.16-20; Luk. 23.13-25; Yoh. 19.2-3
27Won hlai ni, askarai na wiini Lawan e yimi Yesu, e kiŋ amlai warni kaŋ na wiiɗi askarai, e tipiɗisi askarai zi giɗimi paŋ sini. 28E fiki sapani edi, e wiini kaput na mekele hirra sini, 29e hiti bogorai zi hedek e pitini miɗini, e sini vayai war tini na wus, e hûrgû azumai wuzani e zini yewere e miɗi: Lapiya, paiɗi Yudiyakai! 30E ɵiɓi teenek sini, e tiki vayai ɗa e ɵiɓi miɗini gaini. 31Asakal na e zini yewere ya ɗa, e fiki kaput na sini edi, e wiini sapani dama sini, e hili gaini aŋ tûkûŋ amai sini luwuŋ zi dagra.
Tûkûni n'amai sini luwuŋ zi dagra
Mark. 15.21-32; Luk. 23.26-43; Yoh. 19.16-27
32Won hlai n'e ɗa aŋ hili edi sek ɗa, e yimi ɗif ktai na Kerene par na yikini ɓa: Simun, e yimiŋ gaini gdaŋ aŋ luba dagrani Yesu. 33E cû war hlai na e yikiŋ ɓa: Golgota, a dara a muɗa: Hlai zi Keɵke na Humok. 34E sini vin na e jilniŋ gaini wala na ɗewek. Won hlai n'a tetemaŋ a dara a caŋ kai. 35E tûkûŋ amai sini luwuŋ zi dagra, e ɓûrwi sapani arbaɗi pini wala zi vili. 36E simni azumai aŋ giɗimiŋ. 37Amai par miɗini e ɗû seŋ na e tûkûŋ amai pini ɗa maini nɵa: Hanɗa a Yesu na paiɗi Yudiyakai. 38Gorɓolokai sulu e ɗi fu gaini tûkû amai sini luwuŋ zi dagra lai, ktai war galni na wus par, na ktai war galni na muni par lai. 39Nagai n'e vigi ɗa, e tirkiŋ, e kikiyi miɗiɗi, 40E miɗi: tuku, na ku haɗa tempel azumai, ku rgaŋ amai war mefeŋ hu lai ɗa, kora suku haw kir ka, na ɓa k'ahini Alaw ɗa, niyasi azumai sini luwuŋ zi dagra par haw ka. 41Paakai n'abakai zi ɓaka gaiɗi n'abakai n'arbaɗi ɗai lai e zini yewere e miɗi: 42A kurɗa ɗai zamai kir ka, sini dama a kurɗa gaini kai! A paiɗi Izrayel kir ka, a niyasi azumai sini dagra par haw, kapai mi yimi warni. 43A koraŋ tiyana haw kir ka, Ni a baya tini Alaw, n'a muɗa lai ɓa a Ahini Alaw ɗa. 44Gorɓolokai lai, nagai n'e tûkûɗi amai sini luwuŋ zi dagra gaini ɗa, e zini yewere ɵa lai.
Mrini Yesu
Mark. 15.33-41; Luk. 23.44-46; Yoh. 19.28-30
45Girvudi n'arba par haa sa hu ta, gegeŋ a wa tini edi midini afti paŋ. 46Sini sa hu ɗa, Yesu a ɗuula gaini wulani amai a muɗa: Eli, Eli, lema sabaktani! a dara a muɗa: Alaw wiya, Alaw wiya, ku hinaŋa edi buri ma ɗa? 47zamai arbaɗi ɗai n'e ɗi fu woni ɗa, e ɵini hanɗa e miɗi: A na yika Eliyas aŋ tiki na. 48Tizaw, ktai arbaɗi a lawa, a tikasi tipeɵ, a jiibaŋ arni vin na hahayaŋ, a hagaŋ amai mini vayai a siŋni aŋ ci. 49Amma na zamai e miɗi: Hiniŋ, mu tuluŋmu haw, na Eliyas aga a halasi a kurɗaŋ ɗi ɗa. 50Amma Yesu a ɗuula gaini gdaŋni pra, suŋfani a wa edi. 51Won hlai ni, sapa na warni hlai na sɗik a ɓasa amai par haa azumai ta, afti a ziriya, huwaŋai a ɓasa, 52mini waŋ na wiiɗi zi mri a mala edi, ɗai na sɗik viya n'e kili weseŋ e ɵiyisi amai. 53E niyi edi warni waŋ par asakal ɵiyi n'amai na wiini Yesu, e niyi aha war fuŋ n'abai na sɗik, e siŋki siɗi arɗi ɗai viya. 54Amma won hlai na paiɗi askarai na miya ktai pini gaiɗi nagai n'e giɗimi Yesu ɗa, e tili afti a ziriya ɗa, hunai n'abai te yimiɗi, e miɗi: ɗif hanɗa a Ahini Alaw fakat.
Pini Yesu
Mark. 15.40-47; Luk. 23.49-56; Yoh. 19.25, 38-42
55Falakai viya e tipi pini Yesu war Galeliya par buri e zini pini, e ɗiyisi e tili edi gaigai par. 56Maria Magdalene, gaiɗi Maria emini Yakob gaini Yosef, gaiɗi emiɗi alini Sebedewus lai e ɗi fu gaiɗi. 57Amma won hlai na futi koskoi te za li, ɗif zi farai ktai na war Arimateya par, na yikini ɓa: Yosef, a halasi, ni a ɗif zi hitri na wiini Yesu lai. 58A hala sini Pilatus, a zilba kopoŋni Yesu, nɵa Pilatus a sa miɗi buri e sini kopoŋ ɗa. 59Yosef a tikaŋ, a faɗaŋ war sapa na selte sini kai. 60A tikaŋ war waŋ na hehe n'a ɓulaŋ siɗi huwuŋ aŋ wiini, a likititi fukuni n'amai a dûgûti mini waŋ, a hala wiini. 61Maria Magdalene gaiɗi Maria na ktai e ɗi fu azumai ca, wuzani hlai n'e pi Yesu woni.
Ɗai zi giɗimi waŋ
62Dawaini, a dara a muɗa mefeŋ na asakalni mefeŋ zi zinisi-si par ɗa, paakai n'abakai zi ɓaka gaiɗi Farisekai e tipi sini Pilatus, 63e miɗini: Epin-gezayi, midiyi a kɵa gaini wala na ɗif z'eles hanɗa a miɗiŋyi won hlai n'a na ka karni hai ɗa, a muɗa ɓa: Mu za li mefeŋ hu ɗa aga mu ɵiya amai. 64Buri nɵa ku miɗi buri e giɗimi yeɵni pɗem haa sini mefeŋ n'ag'aŋ hu ta, kapai ɗaini zi hitri e hilisi e hiliŋ hill, kapai e miɗi wiiɗi ɗai ɓa a ɵiya amai war mri par ɵiy ɗa kai; wili n'edi na asakal ɗa aga a bunda meefeŋ a suwa n'avut ɗa pra. 65Pilatus a miɗiɗi: Askarai zi giɗimi ɗa, e hili e giɗimi maini na e diri nɵa, 66E hili e mili ɗai aŋ giɗimi waŋ ɗa, e dûgû mini waŋ azumai gaini futini, e ɗiyiɗi ɗai zi giɗimi ca ca lai.
Currently Selected:
Matewus 27: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
