Pi zi tiki 9
9
Alaw a za bonu gaini Nowa
1Alaw a ɓaka Nowa gaiɗi alini a miɗiɗi: Ki sisiɗi viya, ki bindi viya, ki vi midini afti.
2Wazagai na gaini ezini puɗu puɗu na midini afti gaini wazagai zi ɗufli n'arbani hlai n'amai paŋ aga a hûniki. Wazagai zi hidi li na midini afti paŋ, gaini hilif na warni yem-ra n'abai paŋ lai aga a sa war tiki. 3Mu siki wazagai paŋ, maini mu siki evek zi gûɗi nɵa, wazagai na karni paŋ, wazagai zi hidili paŋ lai aga a sa siki aŋ walaki zi simi. 4Amma wala zi rûzû gaini n'a mra kiini, ki limiŋ kai buri ɓa felni a ma edi kai. 5Nɵa lai, burini felki n'a suŋfaki dama ɗa, aga mu zilbaŋ war tini wala n'ezini puɗu puɗu, war tini ɗif lai, asiya siya paŋ n'arbaki n'a fuɗa maini li aga mu zilba felni war tini.
6Ɗif n'a ma felni maini edi,
maini aga a ma felni edi lai;
buri Alaw a rga ɗif maini sini Ni n'Alaw nɵa.
7Amma tiki ɗa, ki sisiɗi viya, ki bindi viya, ki ɵiri edi midini afti, ki vi midini afti paŋ.
8Alaw a miɗini wiini Nowa gaiɗi alini:
9Mu dara mu za bonuŋa gaiki, gaini pinzibaki n'asakal sek ɗa lai. 10Gaini wazagai na karni n'a na gaiki paŋ: Wala zi ɗufli, farai, wazagai n'ezini puɗu puɗu n'edi buza n'a na gaiki, gulaini ɓa, wala paŋ n'a niyasi edi war hulum par gaiki, koo a wazagai n'edi buza. 11Aga mu za bonuŋa gaiki, wala na karni ktai ma aga a ba mini yem n'abai nɵa kir kai, yem n'abai aga a biti yai kir kaalai.
12Alaw a muɗa: Wala n'a siŋka bonu n'arba gaiki gaini wazagai na karni n'a na gaiki lai haa sini pinziba na wuzaki sek haa kureɗ ɗa a hanɗa.
13Mu tika kraŋ na wiya amai arbani ɗugul kapai a za aŋ wala zi siŋki na wiini bonu n'arba gaiɗi yai. 14Won hlai na mu kasi ɗugul zi faŋ li amai par midini afti, won hlai na ɗai e tili kraŋ li amai arni ɗugul, 15mada aga a kɵa gaini bonu n'arba gaiki tiki gaini wazagai na karni paŋ, koo a na wata ɗi, yem aga a bunda aŋ yem n'abai n'aga a ɓulka wala edi kir kai zaŋ. 16Kraŋ aga a ɓasa amai arbani ɗugul, aga mu talaŋ kapai mada a kɵa gaini bonu n'a vada kai n'arba gaini wazagai na karni paŋ, wala na karni n'a na midini afti paŋ.
17Alaw a miɗini wiini Nowa: Hanɗa a wala n'a siŋka bonu na mu zaŋ arba gaiku, gaini wazagai na karni n'a na midini afti ɗa paŋ lai.
Sini Nowa par haa sini Abraham ta
Alini Nowa na hu
18Alini Nowa na e niyisi edi warni hulum n'abai ɗa par: A Sem, Kam gaini Yafet. Kam ɗa a epini Kanaan.
19Nagai na hu hanɗa e ɗi alini Nowa, gaiɗi nagai afti paŋ a va gaini pinzibaɗi.
20Nowa a ɗif zi hirim n'a pa luwuŋ zi vin avut.
21A ca vin n'a yimaŋsi sini luwuŋni par, a ciina gaini, a hina ganala amlai warni gumuni. 22Kam n'epini Kanaan a tala epini a na ganala, a hala a virniŋɗi seŋ hanɗa wiiɗi tawalakaini na sulu na e ɗa anene. 23Sem gaini Yafet e mili sapa na wiini Nowa, e miliŋ gaini sulogoiɗi paŋ amai wulaɗi, e wiyi gaini duɓaɗi, e ŋûyi ganala na wiini epiɗi, arɗi gaini bindi edi sini par, e tili ganala na wiini epiɗi kai.
24Won hlai na vin a ɵara arni par li, a ɵina labar na ahini n'arba a zaŋ sini ɗa,
25A ɗuula a muɗa:
Tusa a sumna miɗini Kanaan,
a hina aŋ begeɗi bagakaiɗi tawalakaini.
26A muɗa pra: Kol sini EPIƊ-ƊAI, Alaw na wiini Sem, Kanaan aga a sumna aŋ begeni.
27Alaw a sini afti viya wiini Yafet,
Yafet a sumna war gumu na wiini Sem lai,
amma Kanaan a hina aŋ begeɗi!
28Asakal yem n'abai par, Nowa a za buza miya hu gaini doogo doogo ɵim. 29Buzani Nowa paŋ a za miya ɵeeŋe gaini doogo doogo ɵim, asakal par a mra.
Currently Selected:
Pi zi tiki 9: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964