Pi zi tiki 31
31
1Yakob a ɵina ɓa alini Laban e ɗa miɗi ɓa: Yakob a mula wazagaini apiyi kafa, a za aŋ ɗif zi farai n'abai na ɗa gaini hanɗa. 2Yakob a tala Laban ɗa, hinini a na maini war mefeŋ n'avut par nɵa kai. 3Nɵa EPIƊ-ƊAI a miɗini wiini Yakob: Waya aha midini afti na wiiɗi tamaiku, na wiiɗi zagalakaiku aga mu za gaiku, 4Yakob a ɵina aŋ yikitisi Rakel gaiɗi Leya edi war basga n'a na edi warni gaini fara zi gɗam ɗa sek. 5A miɗiɗi: Mu tala hinini epiki ɗa aŋ sa maini n'avut ɗa nɵa kai, amma Alaw na wiini apa a na fu gaya. 6Tiki kaw ki siɗi ɓa mu za sda wiini epiki gaini gdaŋŋa. 7Epiki a duulaŋa, a bunda vrakŋa azi kadai doogo ɗi, amma Alaw a hinaŋ aŋ zaŋa meefeŋ kai. 8Won hlai n'a muɗa li ɓa: Farai na balawai paŋ a vrak na wiiku, farai paŋ a wa ɗa a ali na balawai. Won hlai n'a muɗa li ɓa vrak na wiiku a farai na jarakai ɗa, farai paŋ a wa ɗa a ali na jarakai. 9Alaw a yimasi farani farai na wiini epiki edi war tini par, a saŋa aŋ wiya. 10Buri nɵa, won hlai na farai a na jivina marni, mu yima ara amai mu tala war siŋki baŋgarakai gaini gamalakai na jarakai, na balawai gaini na gaini bili ɓlok ɓlok a na duɓura na falakai ɗa. 11Ɗif zi ɵeŋ na wiini Alaw a yikaŋa war weseŋ zi pɵi, Yakob, Yakob, mu miɗini: M'aŋ na. 12A muɗa yima arku amai, tala baŋgarakai na jarakai, na gaini bili ɓlok ɓlok gaini na balawai lai, a na duɓura na falakai ɗa, buri mu tala wala na Laban a na zuŋku ɗa. 13Mu ta m'Alaw na ku ma emel midini ahi-fuŋ z'alaw war Betel burini. Tiyana faka amai, hina afti hanɗa waya aha siɗi zagalakaiku.
14Rakel gaiɗi Leya e wiyini seŋ maini nɵa: Tiyi ɗa buri na wiyi war bulum n'aha ahani epiyi a na ɗi, 15a tiliyi na maiɗi morkokai nɵa kai ɗi, a wûriyi edi yaw, a suma farai na midiyi ta koo! 16Nɵa farai n'Alaw a yimaŋsi edi tini epiyi par hanɗa a wiyi gaiɗi aliyi, tiyana za paŋ n'Alaw a muɗuku miɗini ɗa.
17Yakob a faka amai a miliɗi alini gaiɗi falakaini amai midini ɵigini. 18A ka faraini paŋ gaini wazagaini n'a navaŋ paŋ, faraini n'a navaŋsi midini hlai na plas na Mezopotamiya par aŋ wayasi ahani epini midini afti na Kanaan. 19Laban a hala aŋ ɗukla ayirni faraini edi, duɓani par Rakel te halasi alawai zi rgi n'agogoi na wiini epiɗi.
20Yakob a zini arni Laban na Mezopotamiya par, a hala sek ɗa a miɗini kai sam. 21A pra edi gaini wazagai na wiini, a vuga yem-ra Öfrata, a hala sini huwuŋ na Galaad. 22War mefeŋ n'ag'aŋ hu, labar a halasi sini Laban ɓa Yakob a pra edi su. 23Laban a miliɗi ɗai n'ahani par, e tiki futi pini haa mefeŋ muguzak, a navaŋ miɗini huwuŋ na Galaad.
Bonu n'arbani Yakob gaini Laban
24Alaw a halasi sini Laban na Mezopotamiya war duvuk war weseŋ zi pɵi a miɗini: Ku za hangal, ku muɗa seŋ na pɗem sini Yakob kai, ku muɗa na meefeŋ sini kaalai.
25Laban a nava Yakob, Yakob a pa gumuni amai midiɗi huwuŋ Galaad tiɓ, Laban gaiɗi ɗai na ahani e pi gumuɗi midiɗi huwuŋ na tiɓ lai. 26Laban a miɗini wiini Yakob: Na ku za ɵa ɗa a maɗa? Ku zaŋasi ara ta, ku miliɗisi aliya na falakai maiɗi ɗai n'e yimiɗisi mini gaw par ɵa. 27Ku prasi edi war ŋoyai buri maɗa? Ku duula, ku dara ku muɗaŋa kai buri maɗa? Nɵa aga mu hunuku ku halasi war firiyi arbani yama, gaŋga gaini edil. 28Ku hinaŋa aŋ ɵiɓiɗi wuti wiiɗi aliya gaiɗi tiyakaiya kai, ku za nɵa war hiini kai. 29Pini spakŋa mu kiɗa mu ziki wala na meefeŋ, amma Alaw na wiiɗi tamaiki a muɗaŋa war duvuk n'a vuga hanɗa ɓa: Ku muɗa seŋ na pɗem sini Yakob kai, ku muɗa na meefeŋ sini kaalai. 30Tiyana ku halasi ya buri hiiniku a pra edi gara miɗini wiyi n'ahani apuku, ku halasi alawai na wiya buri maɗa? 31Yakob a wiyini seŋ wiini Laban: Buri mu huna, mu hiina ɓa aga ku yimiɗi aliku na falakai pa par. 32Ɗif na ku nava li alawai na wiiku war tini, suŋfani aga a ɓa wuzani arɗi ɗaimu, wala paŋ n'aŋ ta na ku sdaŋ ɓa a wiiku ku tikaŋ. Yakob a sɗa ɓa Rakel te halaŋsi hil nɵa kai.
33Laban a niya amlai war gumu na wiini Yakob, war na wiiɗi Leya, asakal par war na wiiɗi bagakaiɗi na sulu a nava wala kai, a niyasi anene war na wiiɗi Leya par buri a niya amlai warɗi na wiiɗi Rakel. 34Rakel te mula alawai te mulaŋ azumai pini serde na duɓani ɵigini, te sumna miɗini dam. Laban a guzurasi warni gumu tak a nava wala kai. 35Nɵa te miɗini wiini epiɗi: Epin-geza warni a tuura sa kai, na ɓa mu faka amai wuzaku kai ɗa hanɗa buri walaɗi falakai aŋ sa. A paya haa a nava alawaini kai.
36Yakob a sawa a zini hiy mini Laban a muɗa: Meefeŋ na wiya aŋ wata ɗa? Tuwurŋa a na wata ɗa? Na kapai ku tikasi futi pa gaini kurfuk maini hanɗa ɵa ɗa? 37Won hlai na ku guɵura wazagaiŋa paŋ, ku nava wala ktai n'ahaku par arbani ɗi? Siŋkaŋ edi wuzani arɗi ɗaiŋa lai, ɗaiku lai; nagai e tili seŋ arbamu tumu na sulu ɗa. 38Buza a za caaɓa, mu na gaiku, duk adumaiku zaw, afkasaiku a sirɓa edi kai. Mu luma ka adime ktai arbani faraku kai. 39Hiiki na wala a limiti li mu kutukusi kai, te pɵa mada, hiiki n'e hiliti li girvudi zaw duvuk ku zilbiti ta! 40Girvudi hlai z'afu a gulvaŋa, duvuk smer a giryaŋa, weseŋ lai a dara ara kai! 41Buza a za caaɓa mu na ahaku, mu zuku sda buza doogo pi puɗu buriɗi aliku na falakai na sulu, buza ɵaara burini faraiku; ku bunda vrakŋa azi kadai doogo. 42Na ɓa Alaw na wiini apa, Alaw na wiini Abraham, zi mili hunai pini Isaak a na fu gaya kai ɗa, ku hinaŋa fu aŋ hala kadai ta pa ca. Amma Alaw a tala gir na wiya gaini sda na gdaŋ na mu zaŋ gaini ta, duvuk n'a vuga ɗa, a ɗiya seŋ ɗa zaw.
43Laban a wiyini seŋ wiini Yakob a muɗa: Ali na falakai hanɗa e ɗi aliya, ali na maɵagai hanɗa e ɗi tiyakaiya, adumai hanɗa a adumaiŋa, na ku talaŋ na ɗa paŋ a wiya. Girna wala n'aga mu za siɗi aliya na falakai ɗa a ma ɗa? Zaw siɗi aliɗi na maɵagai n'e wiiɗi ɗa a ma ɗa? 44Halasi, tiyana mu zumu bonu arbamu, kapai a za aŋ zaida arba ta gaiku tuku.
45Yakob a tika ahi-fuŋ ktai, a ɗiyaŋ amai zaw aŋ ahi-fuŋ z'alaw.
46Yakob a miɗiɗi wiiɗi ɗaini: Milisi ali-fuŋ. E milisi ali-fuŋ e tipiŋ amai midini marni. E simi amai midini ali-fuŋ n'a tapa hanɗa. 47Laban a sini yiki ɓa Yegar Sahaduta. Yakob a sini yiki ɓa Galeed.
48Laban a muɗa: Ali fuŋ na gaini tipi amai hanɗa a zaida girna arba ta gaiku tuku. Buri hanɗa e sini yiki ɓa Galeed a dara muɗa ali-fuŋ zi tipi amai zi zaida. 49E sini yiki zamai ɓa Mispa, a dara a muɗa: EPIƊ-ƊAI aga a mula arni mudumu, hlai na mu ɓurwumu gaiɗi marmu, n'armu a kiɗa siɗi marmu kai. 50Na ɓa ku ziɗi gir li wiiɗi aliya na falakai, na ɓa ku mula falakai zamai li siɗi aliya ɗa, koo ɓa ɗif aŋ gaimu kai tekeɗeɗi, Alaw a zaida arbamu.
51Laban a miɗini wiini Yakob: Tala ali-fuŋ na gaini tipi amai midini marni na mu mulaŋ arba ta gaiku tuku, tala ahi-fuŋ z'alaw na mu ɗiyaŋ amai ɗa. 52Ali fuŋ na gaini tipi amai midini marni a zaida, ahi-fuŋ z'alaw a zaida lai, ta mu ha wala ma buri aga mu vugaɗi edi miɗini ali-fuŋ na gaini tipi amai hanɗa, aŋ halaɗi war gal na suku sek gaini hiini na meefeŋ kai. Tuku ku ha wala muku ɓa aga ku vugasi ali-fuŋ na gaini tipi amai hanɗa aŋ halasi war gal na sa sek gaini hiini na meefeŋ kaalai. N'a za hanɗa li a nava mri. 53Alaw na wiini Abraham, na wiini Nakor, Alaw na wiini epiɗi ɗa a ziti sariya arbamu. Yakob a ha wala mini gaini Ni n'a milini hunai abai pini Isaak n'epini. 54Yakob a za ɓaka amai midiɗi huwuŋ, a yikiɗisi ɗani sini simi, e simi e fini amai midiɗi huwuŋ.
Currently Selected:
Pi zi tiki 31: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964