Mt 4
4
Satan abobolo Yesus a nkod-nnam
Mk 1,1-2; Lk 4,1-13
1Ndò hm Nsisim ongakë ai Yesus a nkod-nnam asu yë na Satan abobolo nyè. 2Angatòbò tègè di mëlu mëwom mënyii ai mëmos mëwom mënyii. A mvus hala, ndò hm azu wog zie. 3Ndò mbobëlo azu dzo ai nyè na: Ngë onë mòn Zamba, dzoo na e ngòg nyi evëṅan bëmbaṅëla. 4Ndò afèd, nyè na: «Anë ntilan na #4,1-11 Tò Satan, tò Yesus babëlan ai bibug ya Mfufub Ntilan a nlaṅ mëbobëla. Dzam da, Yesus alëdë Satan mbol Mfufub Ntilan watyan.: Mod ayi ki nyiṅ hë ai mbaṅëla etam, anyiṅ ai ebug esë yakui Zamba a anyu#4,4 Em 8,3.» 5Ndò Satan angakë ai nyè a mfufub tisòn, atëlë nyè a ndil tempel 6nyè ai nyè na: Ngë onë man Zamba, suman a si. Amu anë ntilan na: Ayi vë benglès boe tëbëga asu doe; bayi wa bëgë a mò asu yë na të akol doe lakë tobe a ngòg#4,6 Bs 91,11.. 7Yesus nyè ai nyè na: «Anë fë ntilan na: Të wabobolo Nti Zamba woe» #4,7Em 6,16 8Satan adugan fë nyè nòṅ, akëlë ai nyè a mod nkol a yob, ndò alëdë nyè bidzoe bisë ya si ai duma ya ete 9nyè ai nyè na: «Mayi wa vë e byem bisë bi, ngë walaban a si, olugu ma.» 10Ndò Yesus adzo ai nyè na: «Kodogo ma va, a Satan, amu anë ntilan na: Nti Zamba woe ṅnyè olugu, ṅnyè etam osye#4,10: Em 5,9; 6,13.» 11Ndò Satan angadzoge nyè, benglès bëhama, bëngasye nyè.
Yesus atari esye dzie a Galilea
Mk 1,14; Lk 4,14
12Awog angawog na bëkab ya Yohannes, ndò akë a Galilea. 13Aligi dzal die Nazaret, ndò azu loṅ mvog a Kafarnao, a ntsag maṅ, a minkol mi Zebulon ai Neftali#4,13-16 Eyòṅ Yuden bëngakë a mëkaban eyòṅ osu, ndò bod ya edzoe Asiria bëngakë ai mënda më bod më Zebulon ai Neftali. Asu te nkòṅ nnam ya maṅ më Galilea ai a Galilea osë ongabë ai abui mintòbò. Mateus ayi na alëdë ha na Yesus ayedan tò bëhaiden mbëmbë foe.; 14Asu yë na ebug profèt Isaias etoban na: 15A si Zebulon ai Neftali, zen maṅ, nnam Yordan ayat, Galilea efulu mëyòṅ. 16Ayòṅ lëmbë toa a dibi, lëyen mfyè nen. Eba bëmbë toa a nnam nkut awu, mfyè otole bò a mis#4,16 Is 8,23; 9,1. 17Atarigi hala, ndò Yesus azu tari na ayedan na: «Tsendëgan enyiṅ amu edzoe ya yob#4,17 «Edzoe ya yob»: Man Yuden asëki dzam tud dzoe Zamba. Asu te bod bëkarëga loe Zamba na «Yob», ngë ki na «Mfufub Hom». Edzoe ya Yob enë hm Edzoe Zamba. Edzoe te endzò Yesus angazu yedan a si-ndon. esubu ya babi».
Yesus aloe bëlòb bë kòs bënyii
Mk 1,16-20; Lk 5,1-11; Yoh 1,35-51
18Akëlë awulu a ntsag maṅ më Galilea, ndò ayen babënyaṅ bëbè, Simun, ya bëloege na Petrus ai Andreas manyaṅ woe, bëwoaga mvunda a maṅ: bëngabë bëlòb bë kòs. 19Nyè ai bò na: Zaan miatoṅ ma, mayi bò na mivëṅan bëlòb bë bod. 20Etye etye te, ndò bëngadzoge mëvòd maban, bëngatoṅ nyè. 21Ndò angakë osu, antala babënyaṅ bëfë bëbè, Yakob, man Zebede ai Yohannes, manyaṅ, bëbëdë a efunga ai esya waban Zebede, bëkomo mvunda dzaban, ndò aloe bò. 22Etye te, ndò balig efunga dzaban ai esya waban, bëngatoṅ nyè.
Yesus asye mod nkunda bod
Mk 3,7-12; Lk 6,17-19
23Angakë awulu a nkòṅ nnam Galilea osë, ayëgëlë a mënda-bikoan#4,23 Ebug ya biakad ya sòṅ biawog na «sinagoge» endzò biatimi va na «nda-bikoan», amu mënda mëte mëngabë asu yë na bod batoban ete asu bikoan bi ngogëlan biaban ai asu yë na bayëgëlë fë bòngò dòkten ete (nda-sikulu, nda-dòkten). Bënë fë dzama timi ebug te na nda-ngogëlan, dzam da mënda mëte mëngabë ki hë asu ngogëlan. maban, ayëdëgan Mbëmbë Foe edzoe Zamba, alëdëgë akòn asë ai mintye misë a zaṅ bod. 24Mindum mie miyaman hm fò a nnam Siria osë. Bëngazu ai nyè e ba bësë bëngabë bëlë mintye mi okòn kan esë, ai e ba bëmbë bëlë bëbë bivu, e ba bëkònò a nlo, ai mimbobog, angasye bò. 25Abui minkunda ya Galilea, ai Dekapolis (Bëtisòn-Awomo)#4,25 Bëtisòn Awomo: Dzoe nguma aboda nnam ya mfag ya Galilea. Biakad ya sòṅ biawog bëdzoo na «Dekapolis», asu te ndò biatimi na Bëtisòn Awomo., ai Yerusalem, ai Yudea, ai nnam Yordan a yat mingatoṅ nyè. #4,25«Ayëgëlë ya nkol a yob» anë mkpamaṅ ayëgëlë ya Yesus azu ai wò. Yesus anë a mëtari më esye, ndò alëdë bod bësë e zen ya ayi na awulu ai bò. Mod osë, ozaag abë nyè, oyëmë e dzom ya watoṅ. Nkòbò Yesus angakòbò a nkol hi watsende abui mam ya mvende Moses. Yesus akòbò, atëlë a nkol a yob anë Moses, amu anë mkpamaṅ Moses.
Currently Selected:
Mt 4: NTE12
Highlight
Share
Copy
Want to have your highlights saved across all your devices? Sign up or sign in
MKPAMAṄ AMVOE Nouveau Testament en langue Ewondo © Bible Society of Cameroon, 2012.