DIPESALEME 46
46
Modimo ke botshabelo
1Sefela sa boora Kora se se kwaletsweng moopedisi, se opelwa ka lentswe la motenyane.
2Modimo ke botshabelo jwa rona
le thata ya rona;
o itshupile gantsi
e le thuso mo ditlalelong.
3Ke gona ka moo re sa boifeng,
le fa lefatshe le ka roroma,
le fa dithaba di ka kgokgoetsegela
mo botennye jwa lewatle;
4le fa metsi a lone a ka gwasa,
a phoka lefulo,
le fa dithaba di ka roroma
ka go gogomoga ga lone. Sela.
5Dikelelo tsa noka
di itumedisa motse wa Modimo,
e bong Felo-ga-Boitshepo
a maago a Mogodimodimo.
6Modimo o mo teng ga ona,
ga o kitla o tshikinyega;
Modimo o a o thusa,
fa bosigo bo sa.
7Merafe e ne e tsosa moferefere,
magosi a reketla;
wa dumisa maru a ona,
mme lefatshe la roroma.
8 Morena wa masomosomo
o na le rona,
Modimo wa ga Jakobe
ke botshabelo jwa rona. Sela.
9Tlayang lo lebe ditiro tsa Morena
yo o dirang setlhogo mo lefatsheng;
10yo o khutlisang dintwa
go ya kwa bokhutlong jwa lefatshe;
yo o robang bora,
a robaganye lerumo,
a fise dikoloi tsa ntwa ka molelo!
11“Khutlang lo itse,
fa ke le Modimo;
ke mogolo mo merafeng,
ke mogolo mo lefatsheng.”
12 Morena wa masomosomo
o na le rona,
Modimo wa ga Jakobe
ke botshabelo jwa rona. Sela.
Currently Selected:
DIPESALEME 46: TSW70
Highlight
Share
Compare
Copy
Want to have your highlights saved across all your devices? Sign up or sign in
© Bible Society of South Africa 1970, 1987, 2007. Used by permission. All rights reserved.
