DIPESALEME 14
14
Boikepo jwa motho
(Pes. 53)
1Pesalome ya ga Dafita e e kwaletsweng moopedisi.
Lesilo le bua mo pelong ya lone
le re:
“Modimo ga o yo.”
Ba a senya, ba dira tsa maila;
ga go ope yo o dirang molemo.
2 Morena o lebile bana ba batho
a le mo legodimong,
go bona,
fa go le mongwe yo o botlhale,
yo o batlang Modimo.
3Ba fapogile botlhe,
ba senyega mmogo.
Ga go ope yo o dirang molemo,
le e seng a le mongwe fela.
4A botlhe ba ba dirang tshiamololo
ga ba na kitso,
bona ba ba metsang batho ba me
jaaka ba ja senkgwe?
Morena ga ba mmitse.
5Foo ba tla tshoga
mo go boitshegang;
gonne Modimo
o mo losikeng lo lo siameng.
6Maano a ba a logelang mmogisegi
a tla ba tlhabisa ditlhong,
gonne Morena
ke botshabelo jwa gagwe.
7E kete pholoso ya Iseraele
e ka bo e tla e e tswang mo Sione!
E ne e tla re Morena a fetola
tatlhego ya morafe wa gagwe,
Jakobe a duduetse,
Iseraele a itumele.
Currently Selected:
DIPESALEME 14: TSW70
Highlight
Copy
Compare
Share
Want to have your highlights saved across all your devices? Sign up or sign in
© Bible Society of South Africa 1970, 1987, 2007. Used by permission. All rights reserved.
