Matewu 2
TSO89
2
Ta riendzo ra tintlhari ta le vuxeni
1Kuteloko Yesu a velekiwile eBetlehema wa Yudiya, enkarhini wa Hosi Heroda, tintlhari ta le vuxeni ti fika eYerusalema, 2ti ku: “Yi kwihi Hosi ya Vayuda leyi velekiweke xana?#Kumbe: Ú kwihi la nga velekeriwa vuhosi bya Vayuda xana Hikuva hi vonile nyeleti ya yona le vuxeni,#Kumbe: hi vonile nyeleti ya yona loko yi humelela kutani hi tile ku ta yi gandzela.” 3Loko hosi Heroda a swi twa, a tshuka ngopfu, na vona vaaki va Yerusalema va tshuka hinkwavo. 4A hlengeleta vaprista lavakulu hinkwavo ni vatsari va tiko, a va vutisa a ku: “Xana Mesiya#Mesiya, kumbe: Kriste ú fanele ku velekiwa kwihi xana?” 5Va n'wi byela, va ku: “Emutini wa Betlehema wa Yudiya, hikuva hi leswi nga tsariwa hi muprofeta la nga te:
6 # Mik. 5:2 “ ‘Na wena Betlehema, tiko ra Yudiya,
a wu ntsongo exikarhi ka tihosi ta Yuda,
hikuva eka wena ku ta huma hosi
leyi nga ta fambisa tiko ra mina ra Israele.’ ”
7Hiloko Heroda a vitana tintlhari exihundleni, a va vutisisa nkarhi lowu nyeleti yi nga humelela ha wona. 8Kutani a va rhuma eBetlehema, a ku: “Fambani, mi ya lavisisa xihlangi swinene; kutaku loko mi xi kumile, mi ta ndzi tivisa, leswaku na mina ndzi ta ya xi gandzela.” 9Loko va twile marito ya hosi, va suka va famba; kutani nyeleti yoleyo va nga yi vona evuxeni, yi va rhangela emahlweni, yi ya yima ehenhla ka laha xihlangi a xi ri kona. 10Loko va vona nyeleti, va tsaka hi ku tsaka lokukulu ngopfu. 11Kutani va nghena ndlwini, va kuma xihlangi ni mana wa xona Mariya; kwalaho va nkhinsama, va xi gandzela; kutani va ntshunxa mindzhwalo ya vona, va xi humesela tinyiko ta nsuku, ni mirhi ya risuna, ni mafurha ya mirha. 12Kuteloko va tivisiwile enorhweni leswaku va nga ha hundzi hi le ka Heroda, va tlhelela karikwavo hi ndlela yin'wana.
Ta ku balekela le Egipta
13Kuteloko va tlhelele karikwavo, ntsumi ya Hosi yi humelela eka Yosefa enorhweni, yi ku: “Pfuka, u teka xihlangi ni mana wa xona, u baleka u ya Egipta, u ya tshama kona ndzi ko ndzi ku byela; hikuva Heroda ú ta lava xihlangi leswaku a xi dlaya.” 14Yosefa a pfuka, a teka xihlangi ni mana wa xona nivusiku, a ya le Egipta, 15#Hos. 11:1a ya tshama kona Heroda a kondza a fa, leswaku ku hetiseka leswi nga vuriwa hi Hosi, hi nomo wa muprofeta la nga te: “Ndzi vitanile n'wananga, a huma etikweni ra Egipta.”
Ta ku dlawa ka vana va vafana
16Loko Heroda a vona leswaku ú kanganyisiwile hi tintlhari, a kariha ngopfu, kutani a rhuma vanhu va ya dlaya vana hinkwavo va vafana va le Betlehema ni le tikweni ra kona hinkwaro, va malembe mambirhi ni lava tlhandlamaka, a ringanisa nkarhi lowu a nga vutisisa tintlhari ha wona. 17Kwalaho ke ku hetiseka leswi vuriweke hi muprofeta Yeremiya, loko a te:
18 # Yer. 31:15 “Rito ri twakele eRhama,
ra nkosi ni ra xirilo lexikulu;
i Rahele la rilelaka vana vakwe
a nga pfumeri ku chaveleriwa, hikuva a va ha ri kona.”
Ta ku vuya hi le Egipta
19Kuteloko Heroda a file, ntsumi ya Hosi yi humelela eka Yosefa enorhweni, le Egipta, yi ku: 20“Pfuka, u teka xihlangi ni mana wa xona, u tlhelela etikweni ra Israele, hikuva lava a va lava ku xi dlaya, va file.” 21Kutani Yosefa a pfuka, a teka xihlangi ni mana wa xona, a tlhelela etikweni ra Israele. 22Kambe loko a twa leswaku Arkelawusi ú fuma Yudiya ematshan'wini ya Heroda tata wa yena, a chava ku ya kona; kutani loko a tsundzuxiwile enorhweni, a tlhelela etikweni ra Galeliya, 23#Mk. 1:24; Lk. 2:39; Yoh. 1:45a ya aka emutini lowu vuriwaka Nazareta, leswaku ku hetiseka leswi vaprofeta va nga vula swona hi tlhelo ra Mesiya, loko va te: “U ta vuriwa Munazarene.”

Brought to you with the compliments of the

Bible Society of South Africa. © Bible Society of South Africa. Used with Permission. All rights reserved.

Support us and become a sower of hope.

Learn More About BIBELE Mahungu Lamanene