I Vakorinto 4
4
Ntirho wa vaapostola
1Loko swi ri tano, mi fanele ku hi vona hi ri malandza ya Kriste, ni valanguteri va swihundla swa Xikwembu. 2Sweswi ke, leswi lavekaka eka valanguteri hileswaku munhu a kumeka a ri la tshembekeke. 3Eka mina i mhaka leyitsongo ngopfu ku avanyisiwa hi n'wina, kumbe hi huvo ya vanhu; naswona hambi a ri mina a ndzi tiavanyisi. 4A ndzi titwi ndzi ri ni nandzu wa nchumu; kambe leswi a hi swona swi ndzi endlaka la lulameke; loyi a ndzi avanyisaka i Hosi. 5Hikokwalaho mi nga avanyiseli nchumu makumu, nkarhi wu nga si fika. Yimelani Hosi yi ko yi vuya; hi yona leyi nga ta humesela erivaleni swilo swa munyama leswi fihliweke, ni ku paluxa makungu ya timbilu ta vanhu; kutani hi kona un'wana ni un'wana a nga ta kuma ku dzunisiwa ka yena loku humaka eka Xikwembu.
6Hikwalaho ka n'wina, vamakwerhu eHosini, leswi hinkwaswo ndzi swi tekile swi ri leswi kongomaka mina na Apolosi leswaku hi va swikombiso, mi ta dyondza leswi marito lawa ya vulaka swona lama nge: “U nga tluri leswi tsariweke.” Nakona ku nga vi na un'we wa n'wina la tikurisaka hi ku tsakela un'wana a sandza un'wanyana. 7Hikuva i mani la ku tlakuseke ku tlula van'wana xana? Xana u na yini lexi u nga nyikiwangiki xana? Kutani loko u nyikiwile, hikwalaho ka yini u tidzunisa, wonge hi loko u nga swi kumanga hi ku nyikiwa xana?
8A ndzi ri, mi ri mi ni hinkwaswo leswi lavekaka! A ndzi ri, mi ri mi hundzukile swifumi! Mi nga ku, mi hundzukile tihosi hi n'wexe mi nga ri na hina! Mawaku loko onge mi hundzukile tihosi hakunene, na hina hi ta va tihosi swin'we na n'wina. 9Mina ndzi vona onge Xikwembu xi vekile hina vaapostola ku yima hi le ndzhaku ka hinkwavo, hi fana ni vanhu lava xa vona ku nga ku dlawa ntsena, hikuva hi hundzukile xihlamariso emisaveni hinkwayo, emahlweni ka tintsumi ne mahlweni ka vanhu. 10A ndzi ri, mi ri hi swihunguki hina hikwalaho ka Kriste, kambe n'wina mi vanhu va vutlhari eka Kriste! A ndzi ri, mi ri hina hi hava ntamu, n'wina mi na wona; a ndzi ri, mi ri n'wina ma chaviseka ngopfu, hina ha soleka! 11Ku fikela sweswi hi twa ndlala ni torha, hi swerile, ha bukuteriwa, a hi na kaya; 12 hi tihlakata hi ku tirha hi mavoko ya hina. Loko hi rhukaniwa, ha katekisa; loko hi xanisiwa, hi lehisa mbilu; 13loko hi lumbetiwa, hi hlamula hi marito ya tintswalo. Hi hundzukile thyaka ra misava ni tala ra hinkwaswo leswi cukumetiwaka, ku fikela namuntlha.
14Ndzi tsala timhaka leti, ku nga ri ku mi khomisa tingana kambe ku mi tsundzuxa, tanihi vana va mina lava rhandzekaka. 15Hikuva hambi mi nga va ni vadyondzisi va madzana-dzana eka Kriste, a mi na vatatana lavo tala; hikuva, eka Kriste Yesu, ndzi hundzukile tata wa n'wina hi ku mi tivisa Mahungu Lamanene. 16 Hikokwalaho, ndza mi khongotela leswaku mi tekelela mina. 17Hi swona leswi endlaka leswaku ndzi mi rhumela Timotiya, n'wana wa mina la rhandzekaka, la tshembekeke eHosini; ú ta mi tsundzuxa mahanyele ya mina eka Kriste Yesu, hilaha ndzi ma dyondzisaka hakona hinkwako, ekerekeni yin'wana ni yin'wana.
18Van'wana va n'wina va tikurisa wonge hi loko ndzi ta ka ndzi nga ha ti le ka n'wina; 19kasi ndzi ta ta eka n'wina hi ku hatlisa, loko Hosi yi swi rhandza; hi kona ndzi nga ta kuma, ku nga ri leswi vatikurisi lava va vulavulaka swona, kambe leswi ntamu wa vona wu nga swona. 20Hikuva Mfumo wa Xikwembu a hi mhaka ya marito, i mhaka ya ntamu. 21Xana mi tsakela yini? Xana ndzi fanele ku ta eka n'wina hi nkhavi, kumbe hi rirhandzu ni moya wa musa xana?
Currently Selected:
I Vakorinto 4: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.