Rom Teeb 6

Toonbiit nan yentinu labaar

1Li paak, ti sa yet nlee? Ti bia sii be ti toonbiit tumu nie ki Yennu ninbatinu na-n pukin amii-ii? 2Aaii, ŋann kaa. Li tee kaman nan ti kpo nee, ki li paak biit ki mɔk ti yaaki. Ŋannimi ti kan biar toonbiit tumu ni. 3Timm nba ki bi wurit Yennu nyunwuru nan Yisa Masia sann ni na, li tee kaman nan ti lakin kpo nanɔ nee. 4Li paak, ti din kpoe nan Yisa Masia ki bi lakin piit nanɔ Yennu nyunwuru ni; ki u Baa Yennu din jii u paŋ ki fiinɔ kuun ni, nnee ki ti mun fiir a tii be manfopaann ni.

5Li-i tee ki timm nan Masia lakin kpo, nnee biak ki ti bia sa lakin ki fiir kuun ni nan wa din fiir biaŋinba na. 6Ti mi nan ti binbenkper na lakin ki kpo nan Yisa u dapunpunn paak, a ti binbenkper na ji daa mɔk yaak, ki ti ji kii tee daaba biit paŋ ni. 7Nirɔ-i kpo, u nyii biit paŋ niwa. 8Ta kpo nan Masia na, ti mɔk yada nan ti sii be nanɔ. 9Ti mi nan Yennu fiin Masia kuun niwa ki u ji kan mi kpo; kuun ki mɔk u yaaki. 10U din kpo ti biit paake taar yomm, ŋaan wa ji be u manfoor ni na, u be ki teen Yennue. 11Li paak, i mun dukin nan li tee kaman nan i kpoe ki biit ji ki mɔk i yaaki, ŋaan Yisa Masia paak i ji be i manfoor ni Yennu boor.

12Li paak, i daa te ki biit-n yent i gbanant ki te ki i tuun biit loommu. 13Daa teen i gbanant siar po yaak ki li tuun toonbiit, ŋaan jii i mɔŋ ki tur Yennu, ŋaan kii tee kaman nan i nyii kuun nie ki kɔɔ manfoor ni na; jiin i mɔŋ kur ki tur Yennu ki wun jii-i ki tun yentinu toona. 14Biit daa mɔk i yaak, kimaan sennu na ki yeniini, ŋaan Yennu ninbatinu nee yeni.

Yentinu daaba labaar

15Tɔn, sennu na nba ki yenti, ŋaan ki Yennu ninbatinu nee yent na, ti sa biar toonbiit tumu ni amii? Aaii, ti kan teen nna kaa. 16Fi-i jii a mɔŋ ki pet ki tur nirɔ ki tee u daabir ki saak u mɔb, li tee mɔniie nan a set tee u daabire. Fi-i sak ki tuun toonbiit, a tee biit daabire, ki li joontu tee kuume; ŋaan fi-i sak Yennu mɔb, a tee mɔsakdaanɔe, ki ŋanne sa te ki a teen niŋanɔ Yennu boor. 17Sianyoo, biit din mɔk i yaak, ŋaan mɔtana i mantik saak barmɔnii wannu nba ki bi din wanti na; li paak, ki n teen Yennu niipoouk. 18Mɔtana i ji ki tee biit daaba, ŋaan yentinue ji mɔk i yaak. 19(Yimm nisaarii nba ki fit bant Yennu maan yian na paake ki n yaa n pak nisaarik yan ki wanni u labaar.) Ya din jii i mɔŋ ki tuun toonbiit ki li nɔb na, mɔtana jiin man i mɔŋ kii tuun yentinu toona kii tee popeendamm. 20Ya din tuu tee biit daaba na, i din tuu ki tee yentinu yabi. 21Toona nba ki i din tuun ki li mɔki fei mɔtana na, li mɔk nyɔlante ki turiini? Li toonbooru baat nan kuume. 22Ŋaan mɔtana i ji nyii biit daabsin niwa ki ji tee Yennu daabae; li paak, ki i teen popeendamm, ki mɔk manfoor nba kaa gbennu; ŋanne tee i nyɔɔt. 23Kimaan biit nyɔɔt tee kuume, ŋaan Yennu piinii tee manfoor nba kaa gbennue, ti Yomdaanɔ Yisa Masia paak.

Currently Selected:

Rom Teeb 6: BIM

Highlight

Compare

Copy