Rom Teeb 3

1Tɔn, nyɔlante ki Juu teeb la ki gar binba ki tee Juu teebi? Bi punpotu mɔk nyɔɔtii? 2Li mɔk nyɔɔt bonchiann. Sinsinn tee Yennu din jii u sennu mɔbona na ki guun Juu teebe; 3ki bi siab-i diŋŋi kii tee yadateenteeb, li want nan Yennu ki tee barmɔnii daanɔ amii? 4Aaii, li ki want nna kaa. Niib kur-i bo-i tee fai damm, ŋaan Yennu ŋanin tee barmɔnpakirɔɔe. Li waa nan la sɔb Yennu gbouŋ ni biaŋinba nee a

“Niib-i bu fin Yennu buut,

bi sa la ki a mɔk mɔnii,

ki bia di mɔniie.”

5Ŋaan ti toonbiit-i fiit wann nan Yennu mɔk mɔnii, bee ki ti sa yeti? Wa dat ti tuba na paak, ki ti ji yet a u mɔk biitii? (Nisaarik dudukite ki n yet nna.) Aaii, n kan yet nna kaa. 6Yennu-i kii be fanu, u bo kan fit kii bu tingbouŋ na niib buuti.

7Tɔn, sɔɔ-i boi a “N faak na-i want nan Yennu set tee barmɔnii daanɔ, ki bia tee ki niib-n turɔ baakir, bee teen ki u sa dat n tubir a n tee biitdaanɔ?” 8Siab bia dukii a “Ŋaant ki tin tun toonbiit a bonŋann-n tan baar.” Nisiab sukiin ki yeen a mine yet nna. Yennu sa dat bi tuba kaman nan la jaŋ namm biaŋinba.

Nirɔ kaa ki tee niŋanɔ

9Ki li tee nlee? Timm nba tee Juu teeb na, ti binbeŋ chee binba ki tee Juu teeb binbeŋ amii? Aaii, ti ki chee bi. N poŋ dɔŋ yet a biit yikoo be Juu teeb nan binba ki tee Juu teeb ni 10kaman nan la sɔb Yennu gbouŋ ni a

“Sɔɔ kaa ki tee niŋanɔ,

aaii, nan yenɔkɔɔwa gbaa.

11Sɔɔ kaa ki mɔk minu,

sɔɔ kaa ki loon Yennu.

12Sɔɔ kur kpet sɔnuwa,

sɔɔ kur tuun biite;

sɔɔ kaa ki tuun toonŋana,

sɔɔ kaa nan yenɔkɔɔwa gbaa;

13a bi mɔi yaa nan kaayaant nee,

ki fai nyi bi jerima ni,

ki linba nyi bi mɔi ni tee kaman nan waauk lɔbii nee;

14mɔpora nan mɔtont kuukɔɔe nyi bi mɔi ni.

15Bi sa kpi nirɔ yiama;

16a ki siaminba kur ki bi gar,

parbiir tuu tan baar leŋe.

17Bi ki mi sɔnu nba ki bi sa tɔkin

ki lin baar nan parmaasiri.

18Bi binbeŋ ni, bi ki tiin Yennu.”

19Tɔn, ti mi nan Yennu sennu-i yet linba, li yeen ki teen binba be li yikoo ni, li paake ki niib kur sii muu bi mɔi, ki tingbouŋ na teeb kur be Yennu buut ni, ki u tɔɔnn sɔɔ kaa ki mɔk mɔnii. 20Sɔɔ kaa ki sa fit wei sennu na nba senn biaŋinba ki teen niŋanɔ Yennu tɔɔnn; sennu na paake te ki nifosaarik bann nan u tuun toonbiit.

Biaŋinba ki Yennu te ki nifosaarik tee niŋanɔ u tɔɔnn

21Ŋaan mɔtana, Yennu mɔŋ nba lon sɔnsau nba sa te ki nifosaarik-n teen niŋanɔ na ji be yeenin nie, ki u sɔkiniinba maan nan sennu nee wantit li po, ŋaan li ki nyi sennu na saku ni kaa. 22Yennu te ki nisaarii kur nba teen Yisa Masia yada nee tee niŋamm u tɔɔnn, li nyii ba teen Yisa Masia yada nie, ki lukitin kaa, 23kimaan nifosaarii kur tun toonbiit ki ki be fanu kaman nan Yennu nba loon biaŋinba na. 24Yennu ninbatinu paake ki u yet a bi tee niŋamm u tɔɔnn; li tee piiniie, kimaan Yisa Masia pa bi paak ki nyinnib daabsin ni. 25Yennu te ki Yisa Masia nyii yeenin ni, ki bia te ki u sɔn nba nyii u ni na tee marouŋ ti biit paak, ki ti-i teen linba na yada, Yennu sa nyik chab ti biit; ŋanne wann nan Yennu be fanu. Yoo nba gar, Yennu din ki dat nisaarii tuba bi toonbiit paaki, kimaan u sukuru paak; 26ŋaan mɔtana u nyik chabit ki loon wun wann nan u set be fanu, ki bia yet a wunba teen Yisa yada na mun tee niŋanɔ ŋɔɔ Yennu tɔɔnn.

27Li paak, siar be ki ti mɔk parbifaant nannii? Aaii, li ki tee a nifosaarik nba waa sennu na paak kaa ki ti sa la tinnu, ŋaan li tee ta teen Yisa Masia yada na paake. 28Ti dukii ki yeen a nisaarik yada teenu paake ki Yennu yet a u tee niŋanɔ; ki li ki tee a wa waa sennu na paak kaa. 29Yennu tee Juu teeb kuukɔɔ Yennuee? Aaii, u tee Juu teeb nan binba ki tee Juu teeb Yennue. 30Yennu tee Yen-yenɔkɔɔe ki sa yet a Juu teeb nan binba ki tee Juu teeb na, ki bi kur-n teen niŋamm u tɔɔnn bi yada teenu paak. 31Tɔn, ta yet a nifosaarik laat tinnu u yada teenu nie na, ŋanne te ki sennu na tee yannii? Aaii, li ki tee nna kaa. Ti lek see sennu na poe.

Currently Selected:

Rom Teeb 3: BIM

Highlight

Compare

Copy