Rom Teeb 1

1Min Pɔɔl, wunba tee Yisa Masia toontunnɔ, ki u yiinin a n teen u toomii, ki Yennu gannin a n mɔɔnt u barŋanii.

2Yennu poŋ din dɔŋ senn u mɔsonn barŋanii maŋ poewa, ki u sɔkiniinba din mɔɔntir u mɔsonn maŋ, ki li sɔb u gbounyeeŋ ni. 3Barŋanii maŋ want u Bija poe; ŋɔɔe tee ti Yomdaanɔ Yisa Masia; wa teen nisaarik na, bi marɔ ki u tee David yaaboonne, 4ki Yennu Seyeeŋ din wann nan paŋ nan u set tee Yennu Bija u kuunfiiru paake. 5Ŋɔɔ paake ki Yennu ninbatinu be n paak ki te ki n tee u toomii, ki n jii u sann ki saan nibooru kur boor ni, ki te ki bi teenɔ yada ki saak u mɔb; 6ki i mun be daansiab nba ki Yisa Masia gannib na kann ni.

7Li paak, ki n sɔbin gbouŋ na ki teen yimm nba be Rom doo ni, ki Yennu looni ki ganni a i teen u mɔŋ niib na. Ti Baa Yennu nan ti Yomdaanɔ Yisa Masia-n sommi, ki bia turi parmaasir.

Pɔɔl nba teen Yennu niipoouk biaŋinba

8Sinsinn, n teen Yennu niipoouk Yisa Masia sann ni, i kura paak, kimaan tingbouŋ na teeb kur gbia i yada po. 9Yennu tee n siara daanɔ nan n ki mi nyik Yenmiaru i kura paaki. Ŋɔɔ maŋe ki n waau nan n par kura ki mɔɔntir u Bija barŋanii na, ŋɔɔe tee n siara daanɔ. 10N mei Yennu a li-i tee u loommie li kan yukir ki n sa baar i boor ki tan gɔni, 11kimaan n mantik loon ki n sommi ki yin gaar Yennu Seyeeŋ piinsiar, ki ŋanne sa te ki yin set fanu kii mɔk paŋ u sɔnu ni. 12Ma want linba tee a min nan yimm nba teen yada biaŋinba na, ti sii kɔɔnt ti leeb para, ti yada teenu na paake.

13N naa waas, n loon yin bann nan n yabir nan taar muŋŋa nawa a n baar ki tan gɔni, ŋaan ki siar gɔɔrin mɔkmɔk nan mɔtana ki n ki fit gɔniini. N loon ki n te ki niib-n wei ti Yomdaanɔ i boor ni kaman nan ma daan teen biaŋinba na nileeb sinsuuk ni na. 14Li kpaa talas ki n bet niib kura barŋanii na po, binba mɔk yan, nan binba ki mɔk yan, nan binba mɔk ninyentir nan binba ki mɔk ninyentir. 15Li paak, ki n ninbinn mɔn bonchiann a n mɔɔnt barŋanii maŋ ki tur yimm nba be Rom doo ni na.

Yisa barŋanii nba mɔk paŋ biaŋinba

16Fei ki mɔkin nan ki n mɔɔnt barŋanii maŋ, kimaan li tee Yennu paŋ nba tint wunba kur teen Yisa yada nee; sinsinn li tee Juu teeb yare, ki mun bia tee nibooru kur yar. 17Barŋanii maŋ want nan Yennu yet a nirɔ tee niŋanɔ u tɔɔnn, yada teenu paake; nee nyii paanu ki tur binba teen Yisa yada, kaman nan la sɔb u gbouŋ ni biaŋinba na a “Wunba teen niŋanɔ Yennu boor u yada na paak, li daanɔ sii mɔk manfoor nba kaa gbennu.”

Nifosaarii kur nba mɔk biit biaŋinba

18Yennu wann nifosaarii a u donn wutoor bi paak, kimaan bi tuun toonbiit ki ki waa u sɔnu, ki bi biit sɔnii maŋ te ki niib ki bant u barmɔnii. 19Yennu donn wutoor, kimaan nifosaarik nba sii fit mi u po biaŋinba, ŋanne fiit ki be paanu ni, kimaan ŋɔɔ Yennu mɔŋ mɔŋe fiitir ki wannib. 20Yoo nba ki Yennu din nan dunia mɔkmɔk nan mɔtana, u naamii maŋ ni ki bi bann u benu nba ki nifosaarik ninbinn ki fit laat na, ki bia mi nan u mɔk paŋ nba kaa gbennu, ki set tee Yennu. Li paak, ki bi ji ki mɔk leku Yennu tɔɔnn ki sa yet a bi ki mi bi biiti. 21Bi mi Yennu, ŋaan bi ki teenɔ nibaakir nba ki u yen na. Bi bia ki teenɔ niipoouk; ki bi mɔk jatdudukit, ki bi yan ki yenti, ki ki mɔk nyɔɔti. 22Ki bi yaa a bi mɔk yame, ŋaan tee jatit; 23ba bo sii jiantir Yennu nba kaa gbennu na, bi ki saki, ŋaan jiantir pata nba ki niib nammir ki li naan nisaarii, amii nɔɔnii, amii bonkobit, amii bonfurinkaa nba furin tiŋ ni.

24Li paak, ki Yennu nyikib, ki bi tuun toonbiit nba ki bi para loon, ki bi dint bi mɔŋ fei bi gbanant toona ni nan bi leeb. 25Bi jii linba tee Yennu barmɔnii ki lu, ŋaan sak faak, ki lebit ki jiantir linba ki Yennu nann, ŋaan nyik Yennu mɔŋ mɔŋ, wunba yen baakir kur mɔkmɔk nan yoo nba kaa gbennu. Mɔmɔmm.

26Li paak, ki Yennu nyikib ki bi tuun bi mɔŋ loomm nba mɔk fei, ki bi poob nyik bii dɔɔ nan jab ŋaan ŋmat ki dɔɔ nan bi leeb; 27ki jab mun nyik bii dɔɔ nan poob ŋaan ŋmat ki dɔɔ nan bi leeb, ki bi niauŋ be bi leeb ni bonchiann, ki jab tee bonsia linba mɔk fei nan bi leeb, li paak, ki bi la tubdatu nba jaŋ nan bin gaar bi gbanant ni, bi biit maŋ paak.

28Nifosaarii nba din ki loon ki bin bann Yennu, li paake ki Yennu nyikib nan bi dudukbiit, ki bi tuun toona nba bi bonchiann. 29Ki biit kur din be bi ni, ki bi gbee nan biit nan nianchiauŋ nan yanbɔmm nan funfunbiit nan nikpinu nan kunkɔna nan fai nan dudukbiit, ki bia tee sanjanjanna; 30ki piak biir bi leeb, ki ki loon Yennu, ki sukii bi leeb ki mɔk garuk ki dont bi mɔŋ, ki bia ŋammii dukii dudukbiit sɔnii, ki ki tee bi naanba nan bi baanba nibaakir. 31Bi bia ki mɔk yansian bi ni; bi ki waa bi mɔsona biaki; bi ki mɔk loomm nan ninbatinu bi leeb po. 32Bi mi nan Yennu sennu wann nan binba tuun linba na booru, bi nyɔɔt tee kuume, ŋaan bi lek kpan tuun ŋanne, ki bia mɔk parpeenn nan binba tuun li toonbooru mun.

Currently Selected:

Rom Teeb 1: BIM

Highlight

Compare

Copy