Toona 5

Ananias nan u ŋaapoo Safaira po

1Jasɔɔ nna mun din be ki u sann yi Ananias, ki u ŋaapoo sann mun din yi Safaira, ki u din tan kɔi u kpaab ki gaar li likirii, 2ŋaan paat likirii maŋ paak ki bɔr, ki u ŋaapoo mi li po, ŋaan jii linba tenn na, ki baar nann ki tan tur toomiinba maŋ. 3Ki Piita boiɔ a “Ananias, bee ki a ŋaan ki Sintaanii kɔɔ ki yent a par ni, ki a faar faak ki loon ki a kpann Yennu Seyeeŋ, ki paat likirii nba ki a daan kɔi a kpaab na paaki? 4Fa daan daa ki kɔi a kpaab maŋ na, li daan ki tee a yar kaa-aa? Ki fa bia daan kɔir na, li likirii maŋ bia daan ki be a yent ni kaa-aa? Ki bee teen ki a dukin a par ni ki tun linba na? A ki faar faak maŋ ki paan nirɔ kaa, ŋaan a faar ki paan Yennue.”

5Ananias nba gbat nna maŋ yoonba, ki u kpo ki baa li yoo na. Ki jaŋmaanchiauŋ kɔɔ binba kur gbat u kuun maŋ po. 6Ki naasimm fiir ki jiiu ki pɔbinɔ chinchenn ni, ki jiiu nyii nanɔ ki saa piiu.

7Ŋanne ki li yann waaminna, ki u ŋaapoo baar ki kɔɔ, ŋaan daa ki bann linba teeni. 8Ki Piita bia boiɔ a “Betirin, li set tee barmɔniie nan fin nan a sɔrɔ kpaab likirii nba ki i gaar na kurii na-aa?” Ki u jiin a “Nn, li kurii na.” 9Ki Piita boiɔ a “Bee ki fin nan a sɔrɔ taan mɔb, ki lor lor a i bikin ti Yomdaanɔ Seyeeŋi? Tɔn, naasimm nba jii a sɔrɔ ki saan ki saa piiu na, ŋammii kɔɔ tammɔb nna, ki bi mun bia sa jiia nnee ki saan piia.” 10Li taakpaak ni, ki u kpo ki baa, ki naasimm na kɔɔ ki la ki u kpoa, ki bi bia jiiu ki nyii nanɔ ki saa piiu ki kpianɔ nan u sɔrɔ. 11Li yoo na ki jaŋmaanchiauŋ soor Yisaweira kur nan binba kur gbat maan maŋ po.

12Li yoo na ki toomiinba na tuun bakitnauŋ toonjaana niib na ni bonchiann. Ki Yisaweira kura tuu taan leeb Yennu Yennu ŋasaakak, Solomon barintir boor. 13Binba ki tee Yisaweira na din ki mɔk par nba ki bi sa lakin nammi, ŋaan niib din piak dont Yisaweira na bonchiann, 14ki jab nan poob bonchiann din teen yada ki pukin Yisaweira na po.

15Ŋanne ki niib din nyi nan baatib, ki dɔɔntib gadɔi nan dundɔɔnii paak sanjokpinii ni, a Piita-i taŋŋi baar ki gaar yoonba, ki u yunyuŋ-n lek baa bi paak ki bin la laafia. 16Ki niib nba din be Jerusalem digbanbis ni mun jikit baatib, nan binba ki narinbiit daamiib na, ki baat namm, ki bi kura din laat laafia.

Toomiinba na fara dinu po

17Li paak ki Yennu jiantu yudaanɔ nan u weinanleeb kur, binba tee Sajusiinba na, din fiin punponn bonchiann nan toomiinba na, ki din te ki bi saan 18ki saa soor toomiinba maŋ ki kɔɔmm dansarik. 19Ki li nyiɔk maŋe ki Yennu malaka sik ki loot dansarik tammɔi, ki nyinn toomiinba maŋ, ŋaan betib a 20“I saa man Yennu ŋasaakak ni, ki saa set, ŋaan mɔɔnt ki tur niib manfoor na maan kura.”

21Ba gbat u maan maŋ, ki bi saan ki saa kɔɔ Yennu ŋasaakak maŋ ni, sanyapob ni, ki ji piin ki want niib maan maŋ.

Ki Yennu jiantu yudaanɔ nan u weinanleeb na din yiin Israel teeb yudamm kura, ki lakimm tituk kaanu, ki bi tan tun lanjimanba a bin nyinn toomiinba maŋ ki baar namm na. 22Ŋanne ki bi saan dansarik maŋ ni ki saa got, ki ki labi, ki ŋmat tituk maŋ ni ki saa betib a 23“Ta baar dansarik ni yoonba, ti la ki tammɔi kpare kenkenkema, ŋaan ki dansarguura na be tammɔi ni ki guu, ki ti loot tammɔi na, ŋaan ki ki la sɔɔ dansarik diiuk maŋ ni.”

24Yennu jiantu ŋasaakak lanjimanba yudaanɔ nan jiantu yudamm nba gbat nna maŋ, ki li teemm yaarlituk nan toomiinba na botu maŋ paak, ki bi ji biris linba sa teen. 25Ki taan sɔɔ ki jasɔɔ nna kɔɔ, ki yetib a “Gotir man, jab nba ki i won kɔɔmm dansarik wonn na, bi see Yennu jiantu ŋasaakak ni ki want niib Yennu maan.” 26Li yoo na ki lanjimanba yudaanɔ na jii u jab, ki bi saan ki saa nyinn toomiinba maŋ ki jen namm, ŋaan bi ki nyimm nan paŋ kaa, kimaan bi tiin jaŋmaanii a niib na tan sa mann jaatib tana.

27Ba baar namm yoonba, ki bi te ki bi saan set tituk teeb na sinsuuk ni. Ki Yennu jiantu yudaanɔ na yetib a 28“Ti daan turi mɔb nan nunmɔnn, ki yaa a i daa want niib Yisa sann ni, ŋaan gotir ya tan tun linba na, ya jii i wannu maŋ ki yat Jerusalem kur po, ŋaan ji loon a i teent Yisa kpiira.” 29Ki Piita nan toomiinba leeb na jiin ki yetib a “See ki ti lek-ii saak Yennu mɔb ki gar nirɔ mɔb. 30Yisa maŋe ki i daan poŋ kpaa tabinɔ dapunpunn paak ki kpiiu na, ŋaan Yennu nba tee ti yejamm Yennu na, ŋɔɔe fiin Yisa kuun ni, 31ki jiiu donnɔ ki kaanɔ u niidiitu po, ki teenɔ Yudaanɔ nan Tinntɔɔ, a Israel teeb-ii nyik bi biit, ki wun nyik bi toonbiit ki chabib. 32Timm nan Yennu Seyeeŋe tee Yisa kuunfiiru maŋ siara damm; ki Yennu jii u Seek maŋ ki tur wunba saak u mɔb.”

33Yudamm maŋ nba gbat nna maŋ, ki bi wutoa fiir, ki bi ji yaa bin kpi toomiinba maŋ. 34Ŋaan Farisiisɔɔ nna din be tituk na ni, ki u sann yi Gamaliel, ki u din tee sennu wanntɔɔe, ki niib kur din teeu nibaakir; ki u din fiir ki set, ŋaan yet a bin daa nyinn toomiinba maŋ nanyer po waan; 35ŋaan bet tituk kaanu damm maŋ a “Hei, Israel teeb, i mi man nan ya yaa i teen niib na linba na fan. 36Sianyoo nba din gar, ki Tiudas din want u mɔŋ nan u tee nijaansɔɔe, ki niib kaman nan kobii ŋanna na din tee u poorpojɔɔmu, ŋaan niib nba din tan kpiiu, u jɔɔmu na kura din yate, ki u jagberin na gbenn. 37Ki ŋann tan gar nna, ki Judas, wunba din tee Galilee nirɔ mun din nyii ki set nikant yoo na, ki want u mɔŋ, ki din tunn niib bonchiann yan ki bi waau; ki niib bia mun din tan kpiiu, ki u jɔɔmu na kur yat. 38Mɔtanara, kpan ŋaant Yisaweira maŋ man, ki daa teeb siari; ki li-i tee ki bi dudukit nan bi toona na-i tee nisaarik yarie, li tan sa gbenna. 39Ŋaan li-i tee ki li tee Yennu yarie, i kan fit ki nyannibi. I sa la ki i mann kpet ki kɔn nan Yennue gbaa.”

Ŋanne ki tituk teeb maŋ ji sak Gamaliel mɔb na, 40ki yiin toomiinba maŋ ki kɔɔmm, ki te ki bi boob kpaasir, ŋaan ŋaab, ŋaan turib mɔb a “I mi man ki i ji kii yi Yisa sann maŋ.”

41Ŋann maŋe ki toomiinba maŋ nyii tituk kaanu na ni nan parpeenn, Yennu nba la ki bi jaŋ nan feidinu, Yisa sann paak na. 42Ki daar kur ki bi saa Yennu jiantu ŋasaakak ni, ŋaan bia lin niib ŋei ni, ki want niib a Yisa tee Yennu Niganntɔɔ Masiae, ki bia mɔɔntir u barŋanii na, ki ki nyikiti.

Currently Selected:

Toona 5: BIM

Highlight

Compare

Copy