Toona 25
25
Pɔɔl nba gaan u maan Siisa boor biaŋinba
1Yudaanɔ Festus nba baar Siisarea, li daa ŋanntaa daar ki u nyii leŋ ki doo Jerusalem. 2Leŋe ki Yennu jiantu yudamm nan Juu teeb yudamm baar Festus peŋ ki pak paan Pɔɔl maan na, ŋaan miar Festus 3a wun te ki bi para-ii mei, ki te ki Pɔɔl-n baar Jerusalem, ŋaan din lor lor a bin bɔr ki laa ki tan kpi Pɔɔl sɔnu ni.
4Ki Festus jiin a “Pɔɔl be dansarik ni Siisarea, ŋaan n mɔŋ mɔŋ lek sa ŋmat ki saan leŋ daa ŋannlelee nawa. 5Li paak, ŋaant man ki i yudamm-n wein, ki tin sik Siisarea. Li-i tee ki jɔɔ na tun bonbiir ki kpetie, bin pak paanɔ mapaauk maŋ.”
6Festus din dii kaman nan daa ŋanniin amii dapiik na ki be namm, ki tan fit ki ŋmat Siisarea. Ki li yent sanyiɔk ni, ki u ji kar u buut paak, ŋaan te ki bi nyinn Pɔɔl ki baar nanɔ. 7Pɔɔl nba baar yoonba, ki u ji jak buut bunu. Ki Juu teeb nba nyii Jerusalem na, ki bi fiir ki ŋaa lint Pɔɔl, ŋaan pak bonbiir bonchiann ki biirɔ, ŋaan bia lek ki fit wann u bonbisiar maŋ paaki.
8Ŋanne ki Pɔɔl pak u mɔŋ mɔŋ paak, ki yet a “N ki tun ki biir Juu teeb sennu. N bia ki tun ki biir Yennu jiantu ŋasaakak siari, amii Rom kpanbara yudaanɔ.”
9Ŋaan ki Festus loon ki wun penn Juu teeb para. Li paak, ki u boi Pɔɔl a “A loon ki a saan Jerusalem, ki n sa bu a buut leŋii?” 10Ki Pɔɔl yetɔ a “N kpan daa see kpanbara yudaanɔ Siisa buut bunbuboore na. Ŋannii ŋan nan ki a bu n buut. N ki tun Juu teeb bisiati, ki a mɔŋ mɔŋ mun bia mi nna. 11Mi-i bo-i tee mɔyêtdaanɔie, ki tun bonbiir nba ki li jaŋ nan kuun, n kan yet a n fit nyi kuun ni. Ŋaan li-i tee ki bi pak paanin mapaauk yannie, sɔɔ kan fit jiin ki kubinin bi nuu ni. Ŋaan see ki n gaan n maan maŋ kpanbara yudaanɔ Siisa boor.”
12Ŋanne ki Festus pak nan u saakab maan maŋ po, ŋaan bet Pɔɔl a “A gaan a maan Siisa boora. Li paak, a set sa saana.”
Bat Agripa nan u ŋaapoo nba gbiintir Pɔɔl maan biaŋinba
13Daa ŋannlee nna nba gar, ki Bat Agripa nan u ŋaapoo Beniis tan baar Siisarea a bin foont yudaanɔ Festus. 14Ŋaan bi din teen leŋ daa ŋaŋŋawa, ki Festus tan wann bat na Pɔɔl maan nba tee biaŋinba, ki yet a “Fiiliks daan yaat, ŋaan ŋaan sɔɔ dansarik ni, 15ŋaan ma daan saan Jerusalem yoonba na, ki Juu teeb saakab nan jiantu yudamm daan pak biirɔ, ki yaa a n bu u maan maŋ ki biirɔ. 16Ki n mun jiin ki betib a ‘Timm Rom teeb yaa boor ni ŋarin, li ki tee ti kaar kaa ki tin chab nirɔ nba ki bi yaa a u tee biirtɔɔ ki bin kpiu, ŋaan u madamm daa ki baar buut boori, ki ŋɔɔ nan u biirteeb daa ki took leeb ki u pak ki yaa wun nyinn u mɔŋi.’
17“Li paak, bi kura nba daan tan baar nna yoonba, n ki taantiri, ki li yent sanyiɔk ni ki n kar n buut paak, ŋaan tur mɔb ki bi kɔɔ nan Pɔɔl.
18“Ŋanne ki binba paau maan maŋ fiir ki set a bin pak ki biirɔ, ŋaan ki fit la u biit nba tee biaŋinba kaman nan ma daan bo dukii mi a la sii bi ki tee biaŋinba, 19ŋaan bi kpan nɔi mɔniɔk ki jikit saa bi mɔŋ mɔŋ Yenjiantu po, nan jasɔɔ nba din kpo, ki u sann yi Yisa na, wunba ki Pɔɔl lek yeen yaa a u be u manfoor ni na.
20“Ki li maan jarin. Li paak, ki n bet Pɔɔl a li-i tee ki u loon ki wun saan Jerusalem ki n sa bu u maan leŋ, wun yetin. 21Ki u yet a bii diau dansarik ni mɔkmɔk nan yoo nba ki bi tan sa saan nanɔ kpanbara yudaanɔ boor, ki wun saa jiar u maan maŋ. Ŋanne ki n tur mɔb ma bii guu-u, ki n tan te ki bin saan nanɔ kpanbara yudaanɔ na peŋ.”
22Ki Bat Agripa yet Festus a “N mɔŋ mɔŋ loon ki n gbat nirɔ maŋ mɔb ni.” Ki Festus jiinɔ a “Wonnewa ki a won sa gbat u mɔb ni.” 23Ki li yent sanyiɔk ni, ki Bat Agripa nan u ŋaapoo Beniis muk mukit bonchiann, ki lanjimanba yudamm nan doo na yudamm wei bi poor ki baar kɔɔ buut diiuk na ni ki kar. Ki yudaanɔ Festus ji tun toomii a bin jii Pɔɔl ki baar nanɔ na.
24Ŋanne ki Festus yet a “Bat Agripa nan yimm nba kur be nna na, i la jɔɔ na nba nee, ki Juu teeb nba be nna na nan binba kur be Jerusalem baar n boor nna nan u maan, ki paanɔ, ki yakii kpayakit nanin, ki yaa a li ki ŋan ki wuu be. 25Ŋaan min ŋarin la ki u ki tun bisiat nba ki li jaŋ nan kuumi. Ki u mɔŋ mɔŋ bia yaa a u loon ki wun gaan u maan maŋ kpanbara yudaanɔ peŋe.
“Tɔn, li paak ki n dukin ma n te ki wun saan. 26Ŋaan n ki mi ma sa sɔb gbouŋ ki tur kpanbara yudaanɔ na ki pakɔ linba ki saan gaan u po. Ŋanne te ki n baar nanɔ i kur numm nna, ŋaan li mantik kpaa fin Bat Agripae. Li paak, u buboit fiitu poorpo, n sii mɔk maan nba ki n sa fit ki sɔb ki tur kpanbara yudaanɔ maŋ, 27kimaan li kaa paak nan ki n te ki dansarkɔɔrɔ-n saan kpanbara yudaanɔ peŋ, ŋaan ki n kan fit wann wa biir linba.”
Currently Selected:
Toona 25: BIM
Highlight
Share
Compare
Copy
Want to have your highlights saved across all your devices? Sign up or sign in
