Toona 20

Pɔɔl sɔnu saanu Masedonia nan Akaya tinii ni labaar

1Fuut maŋ nba din ŋmin na poorpoe, ki Pɔɔl ji din yiin Yisaweira na, ki tan chee bi para, ŋaan ji chabib, ki yaat ki saan Masedonia tiŋ ni, 2ki din lin Masedonia tiŋ yaka po, ki bia pak Yisaweira nba be leŋ na Yennu maan bonchiann ki kɔɔntib para, ŋaan gar saan Akaya, 3ki ji be leŋ ki saa jaŋ ŋmaarii ŋanntaa. Ki li poorpo, ki u ji tee siir a wun saan Siria, ŋaan bann nan Juu teeb lorin lora ki guu-u, ki u ji loon wun ŋmat ki saan gar Masedonia tiŋ ni. 4Ki Pirus bik Sopata, wunba nyii Berea na, nan Aristakus nan Sekondus, binba nyii Tesalonika na, nan Gaius wunba nyii Debe na, nan Tikikus nan Trofimus, binba nyii Asia tiŋ ni na, nan Timoti, ŋamme din saan nan Pɔɔl. 5Ki bi gar tɔɔnn ki ji saa guutit Troas.

6Jaamm nba ki bi din tuu di boroboro nba kaa datiŋ na dinu poorpoe, ki ti ji din kɔɔ ŋaruŋ, ki nyii Filipi, ki saa Troas. Ki daa ŋaŋŋmu daar ki ti baar bi boor Troas, ki biar leŋ ki jaŋ daa ŋannlore.

Troas doo labaar

7Tɔn, ki foon daar dajouk ki ti tikir leeb, ki taan nan Yisaweira nba be leŋ na, a ti di ti Yomdaanɔ jeet. Ki Pɔɔl mɔɔnt Yennu maan dik dik dik nan tansuunii, kimaan la sa yent, ki wun gar na paak. 8Ti din tikir ditɔɔtuk nna nie, ki bi din joo fita bonchiann leŋ. 9Ki naasinsɔɔ nna mun din be ki u sann yi Yutikus, ki u din kar ditɔɔtuk na takorbonn paak. Ki Pɔɔl mɔɔnt Yennu maan mɔkmɔk, ki u kar tiŋŋit gɔɔn, ki ji tan gɔɔn ki libit nyii ditɔɔtuk munntaa na ni, ki tan baa tiŋ ni. Ki bi sik jiiu, ki sɔɔ ki u kpoa. 10Ki Pɔɔl nyii ditɔɔtuk na ni, ki somm sik tan fabin u paak, ki diau, ŋaan yet a “I daa te ki i para biiri. U fo,” 11ŋaan ŋmat ki doo ditɔɔtuk na ni, ki saa dii jeet. Li poorpo biak ki u mɔɔnt Yennu maan mɔkmɔk nan la tan yent, ki u ji nyikib, ŋaan yaan yaat gar.

12Ŋaan ki bi ji jii naasimɔ na ŋarin, ki u mɔk manfoor, ki bi kun nanɔ nan parpeenn, ki li ki tee waaminna.

13Li poorpo ki ti bia kɔɔ ŋaruŋ, ki dɔŋ gar saan Asos. Leŋe ki ti din yaa ti jii Pɔɔl, kimaan ŋɔɔ din betit a tin chetɔ. U din loon wun somm taatiŋe ki baar leŋ.

Pɔɔl nba baat Miletus biaŋinba

14Wa din baar Asos yoonba, ki u lat. Ki ti ji jiiu ki kɔɔnɔ ŋaruŋ na ni, ki saan Mitilene. 15Ki ti bia tan tɔɔt leŋ ki baar Kios li sanyafannuk. Ki li bia yent ki ti baar Samos, ki li bia tan yent ki ti baar Miletus. 16Pɔɔl din ki loon a wun saan Efesusi, kimaan u din ki loon ki wun yukir Asia tiŋ ni, ŋaan u din loon yian yian, kimaan u din loon a li-i sa fit, wun baar Jerusalem dajaann nba ki bi yi Pentekost na.

Biaŋinba ki Pɔɔl chabit Yisaweira saakab

17Ŋanne ki Pɔɔl din tun toomii a bin nyi Miletus doo ni, a ki saan Efesus ki saa yiin Yisaweira saakab na. 18Ba baar yoonba, ki u betib a “I mi n binbeŋ nba tuu be biaŋinba, ma din sint baar Asia tiŋ nna ki jikit saa. 19I bia mi ma din tuun Yennu toona nan sikininmɔŋ bonchiann, nan ninnyuut, ki bia la fara Juu teeb lora paak. 20Ki i bia mi nan ma din mɔɔntir Yennu maan, ki bia wanti niib ni nan i ŋei ni na, n din paki linba kur sa sommi, ki ki nyiki, ki bia ki tenn siari, 21ki bia kpaan Juu teeb nan binba ki tee Juu teeb kur a bin nyik bi biit kii waa Yennu sɔnu, ki teen ti Yomdaanɔ Yisa yada.

22“Tɔn, ki mɔtana Yennu Seyeeŋe mabin ki n yaa n saan Jerusalem, ŋaan n ki mi linba sa saa teenin leŋi. 23Ŋaan ma lin doo kur na ni, Yennu Seyeeŋe tuu wantin nan nunmɔnn a dansarik nan fara tan sii tee n yare Jerusalem. 24Ŋaan n ki yi n manfoor ki li tee siari, kimaan min ŋarin loon ki n tun toona nba ki ti Yomdaanɔ Yisa turin nee ki gbenn, ki li toona tee ki mii mɔɔntir barŋanii nba want Yennu ninbatinu poe.

25“Nnara, i mi nan n din lin i kura ŋei ni, ki mɔɔntir Yennu naan labaar. Tɔn, ki mɔtana, n mi nan i ji kan mi ki lami. 26Li paake te ki n beeri dinna daar na, ahoo, wunba kɔŋ manfoor nba kaa gbennu na, n nuu kaa jiki, 27kimaan n ki mi ki fɔrint ki ŋmat poorpo nan ki n mɔɔnt Yennu maan maŋ kur ki wanniini. 28Li paak, i dia i mɔŋ man bonŋann, nan Yisaweira nba ki Yennu Seyeeŋ kubin i nuu ni a yii tee bi yudamm kii goriib. Ŋamme ki Yennu jiib ki teemm u niib, kimaan u Bija Yisa nba din kpo na paak. 29N mi nan mi-i kaa, nibiit tan sa baar i sinsuuk ni, ki biir Yisaweira siab kaman nan kinkata nba tuu so pei biaŋinba na. 30Ki yoo bia baat ki nisiab tan sa nyi i mɔŋ mɔŋ sinsuuk ni, ki fa fai Yennu barmɔnii wannu po, ki biir Yisaweira, ki tunnii bi yan ki te ki bii waa ŋamme. 31Li paak, i guu man, ki daa tammit ma din kpaan i kur nan ninnyuut, ki ki nyik, yennu nan nyiɔk, ki tan jaŋ bina ŋanntaa na ni.

32“Mɔtana, n jikiti ki teei Yennu nuu ni, ki bia mi nan ya bann u maan nba want u ninbatinu po, li maan maŋ sa fit te ki i waau fanu, ki bia sa fit turi yiar sanpaapo, binba kur ki u teemm u niib na sinsuuk ni. 33I mɔŋ bia mi nan n ki nian sɔɔ likirii amii tiati. 34Ma din be i sinsuuk ni na, i mɔŋ mɔŋ bia mi nan n din dia n nii nee ki tuun, ki min nan n weinanleeb di ki bia gbab. 35Ma din tuun nna maŋ paake want nan see ki tii tuun bonchiann ki fit ki somm talasdamm. Li ŋan ki ti tiar ti Yomdaanɔ Yisa maan, nan wa yet yaa a ‘Parpeenn sii tee daanɔ nba piin piinii yare, ki gar wunba gaan.’ ”

36Pɔɔl nba gbenn maan maŋ yoonba, ki bi kura lakin gbaan ki miar Yennu. 37Ŋaan ki bi ji yaa bin chab Pɔɔl, ki mɔnii soorib, ki bi kura mɔ, ŋaan jii bi nii ki kokin kokinɔ, 38kimaan bi para mantik din biir nan wa yaa a bi ji kan lau na paak. Ki bi din chianɔ ki saan nanɔ mɔkgbeŋŋir na ni, a bin saa chabɔ ki wun kɔɔ ŋaruŋ.

Currently Selected:

Toona 20: BIM

Highlight

Compare

Copy