Toona 18

Korint doo labaar

1Li poorpoe ki Pɔɔl din nyii Atens ki saan Korint doo nba din be Akaya tiŋ ni na. 2Leŋe ki u din saa la Juu nisɔɔ, ki u sann yi Akuila, ŋaan bi din marɔ Pontuse, ki ŋɔɔ nan u ŋaapoo Prisila nyii Itali ki baar Korint, kimaan kpanbara yudaanɔ Klɔdius din tur mɔb a Juu teeb kur-n nyi Rom. Ba be Korint na, li daa ki yukiri. Ki Pɔɔl din tan baar bi ŋaak ni, 3a wuu be namm, kimaan bi kur din tee gbanjabirae ki din tuun nan leeb. 4Ki foon daar kur u tuu kɔɔ Yenjiantu diiuk ni, ki saa faa nan Juu teeb labaar Yisa po, ki yabii u mɔŋ a wun tunn Juu teeb nan Griik teeb yan ki jiin li po.

5Li poorpoe ki Sailas nan Timoti din tan nyii Masedonia ki baar. Ki Pɔɔl ji din jii u yoo kur ki mɔɔntir Yisa maan ki teen Juu teeb na, ki din want nan nunmɔnn a Yisae tee Yennu Niganntɔɔ Masia na. 6Ŋaan ki bi lek din ki sak maan maŋ, ki sukiiɔ. Ki u din pit pit u nii nan u taa, ŋaan betib a “Li-i tee ki i tan kɔŋ i manfoorie, li jii i mɔŋ mɔŋ yura paake. N nuu kaa jikii. La jii dinna ki saa, see ki n nyiki, ŋaan wann boorganu Yisa maan maŋ.”

7Ŋanne ki u nyikib ŋaan saan saa be sɔɔ ŋaak ni, ki bi yiu Titius Justus. Ki u din tee boorganu nirɔ ki din jiantir Yennu. U ŋaak maŋ din kpia nan Juu teeb jiantu diiuko. 8Ki jiantu diiuk maŋ yudaanɔ Krispus nan u ŋaateeb kur teen Yisa yada ki kpint ki teen u weira. Ki Korint nileeb mun bonchiann din gbat Yisa maan ki teenɔ yada ki ji tee u weira. Ki bi wurib Yennu nyunwuru.

9Nyayouŋo dinn ki Pɔɔl din tan la yerintu. Ki u yerintu maŋ ni ki ti Yomdaanɔ Yisa betɔ a “Daa tiin jaŋmaanii, ŋaan kii mɔɔntir n maan maŋ ki daa nyikiti, 10kimaan n be nana, ki sɔɔ kaa ki sa kpira ki teena daŋi, kimaan niib bonchiann be doo na ni ki sii tee n yab.” 11Li paak Pɔɔl din be leŋ binn nan ŋmaarii ŋannloob, ki din want niib Yennu maan.

12Tɔn, yoo nba ki Galio din tee Akaya tiŋ na yudaanɔ, ki Juu teeb din tan taan leeb ki lek Pɔɔl ki soorɔ, ki saan nanɔ buut boor, 13ki saa yet a “Jɔɔ na paant niib ba jiantir biaŋinba na, ki li mun biir ti sennu.” 14Pɔɔl nba din yaa wun pak yoonba, ki Galio yet Juu teeb maŋ a “Yimm Juu teeb, li-i tee ki maan na tee mabiiuk amii mɔyêtukue, li bo sii ŋan ki n di sukuru ki gbiinti, 15ŋaan la tee maan nba jii ki jiin i mɔŋ mɔmaan, nan i sana, nan i mɔŋ sennu naie, i mɔŋ mɔŋ-n got li ni, kimaan n ki sak a n sa bu li mabooru,” 16ŋaan ber nyinnib buut boor maŋ. 17Ŋanne ki bi soor Sosenes wunba tee Juu teeb jiantu diiuk yudaanɔ, ki bia tunn jen nanɔ buut maŋ boor ni na, ki tan boou niib na ni, ŋaan ki Galio baka taan kaa bi po.

Ba jen Antiok biaŋinba

18Ki Pɔɔl din daa be nan Yisaweira nba be Korint ŋmaarii bonchiann. Ŋanne ki u din tan chabib, ŋaan yaa wun saan Antiok nba be Siria tiŋ ni na. Ki ŋɔɔ nan Prisila nan Akuila saan Senkrea ki kɔɔ ŋaruŋ. Ŋaan ba yaa bin kɔɔ ŋaruŋ ki saan na, ki Pɔɔl por por nan Yennu ŋaan koor u yut.

19Ŋanne ki bi din saa ki saa baar Efesus, siaminba ki Prisila nan Akuila yaa bin biar na; ki Pɔɔl saan saa kɔɔ Juu teeb Yenjiantu diiuk ni, ki faa labaar nan Juu teeb maŋ, Yisa Masia po. 20Ki bi tan yaa a wun biar namm ki yukir, ŋaan ki u ki saki. 21Wa din yaa wun chabib ki saan na, ki u betib a “Li-i tee ki Yennu sakie, n bia sa jen i boor nna,” ŋaan bia jin kɔɔ ŋaruŋ ki saan.

22Wa tan baar Siisarea yoonba ki u tɔɔt gar Jerusalem ki saa foont Yisaweira ŋaan gar sik Antiok biak, 23ki saa yukir leŋ, ki bia tan nyii leŋ ki saa Galasia nan Frijia yaka po, ki saa cheen Yisaweira kur para.

Apolos Po

24Ŋanne ki Juu jasɔɔ nna din be, ki u sann yi Apolos, ŋaan bi din marɔ Aleksandria, ki u din tan baar Efesus. U din tee mamin daanɔe, ki din mi Yennu gbouŋ bonchiann. 25Ki bi din poŋ wannɔ ti Yomdaanɔ Yisa sɔnuewa. Ki u tan baar ki din piak want Yisa po bonŋann nan nunmɔnn, ŋaan u daa din ki bann Yisa maan maŋ kuri, kimaan u kpan din mi Jɔɔnn nba din wuur niib Yennu nyunwuru biaŋinba kuukɔɔe. 26Ki u din piin piak Yennu maan nan parcheenn, Juu teeb jiantu diiuk ni. Ki Prisila nan Akuila gbat u maan maŋ, ki tan jiiu ki fiit Yennu sɔnu bonchiann fanu ki wannɔ.

27Li poorpoe ki Apolos dukin a wun saan Akaya. Ki Yisaweira nba din be Efesus na sommɔ, ki sɔb gbouŋ ki tur Yisaweira nba be Akaya na, a u-i taŋŋi baar, bin gaarɔ saantuk. Wa tan baar leŋ yoonba, ki u set tot binba teen yada Yennu ninbatinu po, 28kimaan ŋɔɔ nan Juu teeb nba din tan nɔi nan leeb, ki u din jikit Yennu gbouŋ, ki wantib a Yisae set tee Yennu Niganntɔɔ Masia, ki din pak nan paŋ ki nyannib niwor ni.

Currently Selected:

Toona 18: BIM

Highlight

Compare

Copy