Toona 10

Piita yerintu labaar

1Tɔn, jasɔɔ nna din be Siisarea, ki u sann yi Kɔnelius. U din tee lanjimanba yudaansɔɔe, ki dia lanjimanba kobik u paabu ni. U paabu maŋ din yi Itali tiŋ paabu. 2U din tee Yenjiantitɔɔe; ki ŋɔɔ nan u ŋaateeb kura din jiantir Yennu. U din sommit Juu teeb ni talasdamm bonchiann, ki bia din mei Yennu yoo kur. 3Li din tan tee kaman nan yenlekir nee, ki u la Yennu malaka yerintu ni peee, ki u kɔɔ u diiuk ni ki tan yiin a “Kɔnelius.”

4Kɔnelius nba din got la malaka maŋ na, ki jaŋmaanii soorɔ, ki u yet a “N yomdaanɔ, bee?” Ki malaka maŋ jiin a “Yennu gaar a miaruwa, ki bia gaar a ninkpabauŋ toona nba ki a tuun ki teen niib, ki bia tian a po. 5Mɔtana, tumin nisiab Jɔpa, ki bin saa yiin jasɔɔ nba ki bi yiu Simon, ki u sanjɔɔk tee Piita na. 6U tee saamɔe ki be gbanfebirtɔɔ nba ki bi yiu Simon na ŋaak ni, ki u ŋaak maŋ kpia nan mɔkgbeŋŋir na.”

7Malaka maŋ nba din pak nanɔ na ji din yaat, ki Kɔnelius ji yiin u ŋaatoontunna bannlee nan lanjima sɔɔ nna, wunba din tee Yenjiantitɔɔ, ki tee u kpaakyenɔ na. 8Wa betib linba kur teen maŋ poorpoe, ki u tumm Jɔpa. 9La yent sanyiɔk, ki bi saa, ki saa per Jɔpa; li yoo na ki Piita mun doo ditɔɔtuk paak yensuuk ni, a wun miar Yennu. 10Ki kon din tan gbatɔ, ki u ji loon a wun di jeet, ŋaan ki bi daa tee jeet siir; li yooe ki u la yerintu, 11ki sanpaapo loot ki bonsiar nna naan chinchenn ki nyii sanpaapo, ki bi dia li mɔgbana ŋanna ki sikint tiŋ ni, 12ki u la ŋamm Juu teeb kɔɔt booru booru kur ki li be chinchenn maŋ ni, bonkobitii, bonfurinkaa, nan bonyuyukit, linba kur kɔɔ na; 13ki u gbat kunkɔr yiin a “Piita, fiit ki kpi ki di.” 14Ŋaan ki Piita jiin a “O! O! O! N Yomdaanɔ, nna kaa. N ki mi dii ti kɔɔti.” 15Ki kunkɔr na bia ŋamm yetɔ a “Linba ki Yennu kpintir a li ki kɔɔ, daa yeen a li kɔɔ.” 16Li din teen nna ki saa jaŋ taar munntaa, ki bi jiin bont maŋ sanpaapo.

Binba ki tee Juu teeb nba teen Yisaweira biaŋinba

17Li din daa yaar lit Piita ki jikit saa wa la yerintu na paak. Li yoo na ki Kɔnelius toomii na boi Simon ŋaak nba be siaminba po, ki bi wannib, ki bi baar ŋaak maŋ tammɔb ni, ki set, 18ŋaan yiin ki boi a “Sɔɔ be nna, ki u sann yi Simon Piita-aa?”

19Ŋaan ki Piita lek koor a wun bann yerintu maŋ paak, ki Yennu Seyeeŋ yetɔ a “Gotir, jab banntaa be nna ki loona. 20Li paak, fiit ki sik, ki daa biris nan a saan nammi, kimaan mine tumm.”

21Ŋanne ki Piita sik, ki bet jab na a “Mine ki i loon na. Bee teen ki i baari?” 22Ki bi jiin a “Chanbaa Kɔneliuse tumit. U tee lanjimanba yudaanɔe, ki tee niburchimɔe biak, ki jiantir Yennu, ki Juu teeb kur teenɔ nibaakir. Tɔn, Yennu malaka won baar betɔ a wun yiina ki a baar u ŋaak ni, ki wun tan gbat linba ki a sa pak ki turɔ.”

23Ki Piita fan yiin jab na ki kɔɔmm, a bii be ki sanyiɔk-n yenta. Ki li tan yent, ki u teen siir, ki bi saa; ki Yisaweira nba din be Jɔpa na, ki bi siab chianɔ.

24Li daar din tan bɔnn yente, ki bi baar Siisarea, ŋaan sɔɔ ki Kɔnelius poŋ yiin u ninjamm nan u yɔɔsinba, ki bi kur ji kar guu Piita baaru. 25Piita nba din tan baar ki teen nan u yaa wun kɔɔ na, ki Kɔnelius chetɔ tammɔb ni, ki gbaan, ki pukiiɔ. 26Ki Piita yetɔ a “Fiit, n mɔŋ mɔŋ tee nirɔe,” ŋaan fiinɔ sennɔ. 27Wa din piak nan Kɔnelius ŋaan kɔɔ ŋaak maŋ ni na, ki u la niib bonchiann tikir ki guu-u. 28Ki u betib a “I mɔŋ mɔŋ mun mi nan timm Juu teeb sennu ki chabit nan tin saan gɔn binba ki tee Juu teebi, amii ki taan nammi; ŋaan Yennu wannin a n daa yêen nisɔɔ, wa ki tee Juu nirɔ na paaki. 29Li paak, ya yiinin na, n baar, ki ki birisi. Ŋanne ki n boi-i ma n laan bee teen ki i tun ki yiinimi.” 30Ki Kɔnelius yetɔ a “Li daan tee nna yooe dinna daar, ki n daan mei Yennu n ŋaak ni kut munntaa yoo yenlekir. Li yoo na ki n la ki nisɔɔ nna see ki lia liatnyinyira n tɔɔnn po, 31ki yet a ‘Kɔnelius, Yennu gbat a miaruwa, ki bia tian a ninkpabauŋ toona po. 32Li paak, tumin sɔɔ Jɔpa, ki wun saa yiin wunba ki bi yiu Simon, ki u sanjɔɔk tee Piita na. U tee saamɔe, ki be gbanfebirtɔɔ Simon ŋaak nba kpia nan mɔkir na.’ 33Ki li paake ki n daan tun a po yiama na, ki a mun teen bonŋann ki baar na. Tɔn, ti kura be Yennu tɔɔnn, ki ji guu a ti gbat linba ki ti Yomdaanɔ Yennu tura mɔb a a pak turit na.”

34Ŋanne ki Piita piin paku ki yaa a “N ji bann nan li tee mɔniie nan Yennu set ki lukitir sɔɔ, 35ŋaan nibooru kur ni, daansɔɔ nba jiantirɔ ki bia teenɔ nibaakir, ki bia tee popeendaanɔ, ŋɔɔe ŋan nan Yennu. 36I mi nan Yennu din tur Israel teeb u maan nba want barŋanii na po, a Yisa Masia nie ki timm nan Yennu maŋ nan leeb; ŋɔɔ Yisa Masiae tee ti kur Yomdaanɔ. 37I poŋ mi nan Jɔɔnn nba din mɔɔnt u nyunwuru po na ki gbenn, li poorpoe ki Nasaret nirɔ Yisa din piin ki tuun u toonn Galilee tiŋ ni, ki tan saan tuun Judea tiŋ kur ni. 38I bia poŋ mi biaŋinba ki Yennu nyinn senn Yisa maŋ, ki turɔ u Seyeeŋ nan u paŋ, ki u lin ki tuun toonŋana, ki bia te ki binba kur ki Sintaanii teemm baatib na la laafia, kimaan Yennu be nanɔ. 39Ki ti la toona kur nba ki u tun Juu teeb tingbouŋ ni nan Jerusalem, ki ti tee u siara damm. Ki bi kpaau dapunpunn paak ki u kpo. 40Ŋaan ki Yennu fiinɔ kuun ni daa ŋanntaa daar, ki te ki u fint, ki ti laatɔ ki u tee nirɔ. 41Ŋaan niib kur kaawa din laatɔ. Li din tee timm nba ki Yennu gannit a tii tee u siara damm nee din laatɔ, ki bia din tuu di ki nyu nanɔ u kuunfiiru poorpo maŋ. 42Ki u chabit mɔb a tii mɔɔntir kii teen niib Yennu barŋanii, a kii beerib nan nunmɔnn a Yisae tee daanɔ nba ki Yennu nyinn sennɔ a wuu tee footib nan kpeemm barbuurɔ. 43Li tee Yisa nee ki Yennu sɔkiniinba kur din tuu piak u po, ki yeen a sɔɔ kur nba teenɔ yada, a Yennu sa nyik chab u toonbiit Yisa maŋ sann ni.”

44Piita nba din daa piak na, ki Yennu Seyeeŋ sik kɔɔ binba kur din gbiintir maan maŋ ni. 45Ki Yisaweira nba tee Juu teeb ki nyii Jɔpa ki chian Piita na, ki li teemm bakitnauŋ nan Yennu nba jii u piinii nba tee u Seyeeŋ, ki tur binba ki tee Juu teeb mun na, 46kimaan bi gbia ki bi piak barganii ki dont Yennu sann. Ŋanne ki Piita yet a 47“Niib na gaar Yennu Seyeeŋ, kaman nan ta mun din gaar nee, amii sɔɔ be nna ki sa tiat a ti daa wuurib Yennu nyunwuru-uu?” 48ŋaan chab a bin wurib; ki bi wurib Yennu nyunwuru nan Yisa Masia sann ni. Ŋanne ki bi gɔɔr Piita a wun biar namm kaman nan daa ŋannlee nna; ki u biar.

Currently Selected:

Toona 10: BIM

Highlight

Compare

Copy