Zabbu̱li̱ 137
137
1Ha migira mya Bbabbu̱looni̱,
twecali̱i̱ri̱ hansi twalira,
b̯u̱twezu̱ki̱ri̱ Sayu̱u̱ni̱.
2Ha misaali myayo,
hooho twabbani̱ki̱ri̱ ndi̱ngi̱di̱ zeetu̱.
3Kubba banyagi̱ banyakututwala mu b̯unyagwa
baatu̱weereeri̱ ku̱hi̱i̱ma,
baturagira ku̱bahi̱i̱mi̱ra byembu byabaha kusemererwa,
bakoba yati, “Mu̱tu̱hi̱i̱mi̱re ki̱mwei̱ ha byembu bya Sayu̱u̱ni̱!”
4Tu̱hi̱i̱ma teetei̱ kyembu kya Mukama
mu nsi gitali gyetu̱?
5B̯undikwebeera, ai̱ Yeru̱salemu̱,
mukono gwange gwab̯udyo gwalimalanga!
6Lulimi lwange lwalemerenga ha b̯unkudankuda,
b̯u̱ntali̱kwi̱zu̱ka,
b̯u̱ntali̱si̱i̱ma Yeru̱salemu̱
na kusemererwa kukukiirayo ki̱mwei̱!
7Ai̱ Mukama, i̱zu̱ka bantu bʼEdomu̱
ha kiro kya Yeru̱salemu̱ gyanyagi̱i̱rwe,
nka kubalu̱kengi̱ nibakoba, “Bbotola, Bbotola,
bbotolera ki̱mwei̱ ku̱doosya ha mu̱si̱nge!”
8 #
Kuwonekerwa 18:6
Ai̱ Bbabbu̱looni̱, oli̱zi̱ka ye!
Kayeesi̱i̱mi̱ri̱ yogwo alikusasula
kwijanjana na ki̱kyo ki̱watu̱koori̱!
9Kayeesi̱i̱mi̱ri̱ alitwala nkerembe zaamu
akazikenya ha lubbaali!
Currently Selected:
Zabbu̱li̱ 137: LUGUNGU
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
